އެންދެރިމާގެއަށް ވަންނަ މީހުންގެ ނަން ނޯޓް ކުރަނީ ރައީސް ޔާމީންގެ އަމިއްލަފުޅު އެޖެންޑާއެއްގެ ތެރެއިން: ނާދިރާ

ރައީސް މައުމޫން ދިރިއުޅުއްވާ ގެކޮޅުކަމަށްވާ އެންދެރިމާގޭގައި ސިފައިން ބައިތިއްބަނީ ރައީސް ޔާމީންގެ އަމިއްލަފުޅު އެޖެންޑާއެއްގެ ތެރެއިން ކަމަށް ރައީސް މައުމޫން ފެކްޝަންގެ ނައިބް ރައީސާ އައިމިނަތު ނާދިރާ ވިދާޅުވެއްޖެއެވެ.

މައުލޫމާތު ލިބިފައިވާ ގޮތުގައި ހޯމަ ދުވަހުން ފެށިގެން ރައީސް މައުމޫން މިހާރު ދިރިއުޅުއްވާ ގެކޮޅުކަމަށްވާ އެންދެރިމާގެ ސެކިއުރިޓީ އެމްއެންޑީއެފުން ބަލަހައްޓަން ފަށާފައިވެއެވެ. ރައީސް މައުމޫން ދިރިއުޅުއްވާ ގެކޮޅުގެ ސެކިއުރިޓީ އެމްއެންޑީއެފުން ބަލަހައްޓަން ފެށީ އިންޓެލިޖެންސް ރިޕޯޓަކާއި ގުޅިގެން ކަމަށް ވަނީ މައުލޫމާތު ލިބިފައެވެ.

Advertisement

މިކަމާއި ގުޅިގެން ނާދިރާ ކުރެއްވި ޓްވީޓެއްގައި ވިދާޅުވީ ރައީސް މައުމޫންނަން ގެއްލުންދޭ ބަޔަކު އުޅޭކަމުގެ މައުލޫމާތު މިހާތަނަން ހިއްސާކޮށްފައި ނުވާ ކަމަށެވެ. އަދި ކުއްލި ގޮތަކަށް އެންދެރިމާގެ ސެކިއުރިޓީ ވަރުގަދަކޮށް އެގޭގައި ސިފައިން ބައިތިއްބަން ފެށީ ރައީސް ޔާމީނާއި އެމަނިކުފާނުގެ ކެމްޕެއިން ޓީމުގެ އަމިއްލަ އެޖެންޑާގެ ތެރެއިން ކަމަށް ނާދިރާ ވިދާޅުވިއެވެ.

މިހާރު 24 ގަޑިއިރު އެންދެރިމާގޭގައި ސެކިއުރިޓީ ބަލަހައްޓަން ސިފައިންގެ ދެމީހުން ތިބެއެވެ. ރައީސް މައުމޫނާއި ބައްދަލުކުރައްވަން އެ ގެއަށް ޒިޔާރަތް ކުރައްވާ ހުރިހާ ބޭފުޅުންގެ ނަން އެމްއެންޑީއެފުން ނޯޓު ކުރާ ކަމަށާއި އެންދެރިމާގެއަށް ވަދެވެނީ އެމްއެންޑީއެފުން ބަލާ ފާސްކުރުމަށް ފަހު ކަމަށް ވަނީ މައުލޫމާތު ލިބިފައެވެ. އެހެން ނަމަވެސް މިކަމާއި ގުޅިގެން އެމްއެންޑީއެފްގެ ރަސްމީ ބަހެއް ވަނީ ލިބޭ ގޮތް ނުވެފައެވެ.