އިރާނުގައި ހިނގަމުންދާ ހަމަނުޖެހުންތަކާ ގުޅިގެން އދ. އިން ކަންބޮޑުވެއްޖެ
އިރާނުގައި ކުރިއަށްދާ މުޒާހަރާތަކުގައި މިހާތަނަށް 20 އަށް ވުރެ ގިނަ މީހުން މަރުވެފައިވޭ
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް
އިރާނުގައި ހިނގަމުންދާ މުޒާހަރާތަކުގައި މީހުން މަރުވަމުންދާތީ އެކަމާ ގުޅިގެން އދ. އިން ކަންބޮޑުވުން ފާޅުކޮށްފިއެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސްގެ ޑެޕިއުޓީ ސްޕޯކްސްޕާސަން އަންގާރަ ދުވަހު ނިއު ޔޯކްގައި ނޫސްވެރިންނަށް ވިދާޅުވީ "އިރާނުގެ އެކި ސިޓީތަކުގައި ކުރެވެމުންދާ މުޒާހަރާތައް ސެކްރެޓަރީ ޖެނެރަލް ވަރަށް ގާތުން ބައްލަވަމުންދާ ކަމަށާއި، ފުރާނަތައް ގެއްލެމުންދާތީ ކަންބޮޑުވާ ކަމަށެވެ." އަދި ކުރިއަށް އޮތްތަނުގައި އިތުރު ހަމަނުޖެހުން ނުހިނގާނެ ކަމަށް އުންމީދު ކުރައްވާ ކަމަށް ވެސް، ސެކްރެޓަރީ ޖެނެރަލް އެންޓޯނިއޯ ގުޓަރޭސްގެ ޑެޕިއުޓީ ސްޕޯކްސްޕާސަން ފަރްހާން ހައްގު ވިދާޅުވިއެވެ. ފަރްހާން އިތުރަށް ވިދާޅުވީ އދ. އިން އުންމީދު ކުރަނީ ސުލްހަވެރިކަމާއެކު އެއްވެއުޅުމުގެ މިނިވަންކަމާއި ހިޔާލުފާޅުކުރުމުގެ މިނިވަން ކަމަށް އިރާނުގެ ސަރުކާރުން އިހްތިރާމް ކުރާނެ ކަމަށެވެ.
އިރާނުގައި ކުރިއަށްދާ މުޒާހަރާތަކުގައި މިހާތަނަށް 20 އަށް ވުރެ ގިނަ މީހުން މަރުވެފައި ވެއެވެ. ބުރާސްފަތި ދުވަހު މުޒާހަރާތައް ކުރަން ފަށާފައި ވަނީ ގައުމުގެ ކޮރަޕްޝަނުގެ ހާލަތާ ގުޅިގެންނާއި އަދި ދިރިއުޅުމުގެ ހާލަތު ދަށްވުމުގެ ސަބަބުންނެވެ.
ތަކެއްޗާއި ހިދުމަތުގެ އަގު ބޮޑުވުމުގެ މައްސަލައިގައި ފެށި މުޒާހަރާތައް ފުޅާވެ، ސިޔާސީ މުޒާހަރާތަކަކަށް ބަދަލުވެފައިވާއިރު، މުޒާހަރާގައި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީގެ އިތުރުން ރައީސް ހަސަން ރޫހާނީގެ އިސްތިއުފާ އަށް ވެސް ދަނީ ގޮވަމުންނެވެ. މީގެ އިތުރުން ސިޔާސީ ކުށްވެރިން މިނިވަން ކުރުމަށާއި، ފުލުހުންގެ އަނިޔާވެރިކަން ނިމުމަކަށް ގެނައުމަށް މުޒާހަރާގެ ބައިވެރިން ދަނީ ގޮވާލަމުންނެވެ. އަދި މުޒާހަރާގެ ބައިވެރިން ބުނަމުންދަނީ އީރާނުގެ ސަރުކާރުން ކުރަން ނުޖެހޭ ޚަރަދުތައް ކުރަމުންދާ ކަމަށެވެ.
