ރާއްޖެއަކީ މިއަހަރުގެ ފިނި މޫސުމުގެ ޗުއްޓީ ދުވަސްވަރު ޓެރަރިސްޓް ޙަމަލާއެއް ދީފާނެ ކަމުގެ ބިރު ބޮޑު ޤައުމުތަކުގެ ތެރެއިން ޤައުމެއްކަމަށް އިނގިރޭސިވިލާތުން ބުނެފިއެވެ.

ޗުއްޓީގެ ދުވަސްވަރު ޓެރަރިސްޓް ޙަމަލާއެއް ދީފާނެކަމުގެ ބިރު ބޮޑު ޤައުމުތަކުގެ ގޮތުގައި އިނގިރޭސި ޚާރިޖީ އޮފީހުން ފާހަގަކޮށްފައިވާ ޤައުމުތަކުގެ ތެރޭގައި ހިމެނޭ މިސަރަހައްދުގެ ޤައުމުތަކަކީ ރާއްޖޭގެ އިތުރުން އިންޑިއާ، އިންޑޮނީޝިއާ އަދި މެލޭޝިއާއެވެ. މީގެ އިތުރުން އޮސްޓްރޭލިއާ، ބެލްޖިއަމް، ފަރަންސޭސީވިލާތް، ޖަރުމަނުވިލާތް، ކެންޔާ، ފިލިޕީންސް، ތައިލެންޑް އަދި އެމެރިކާއަށްވެސް ޒިޔާރަތްކުރާ ފަތުރުވެރިން ޓެރަރިސްޓް ހަމަލާއެއް ދީފާނެކަމަށް ސަމާލުވުމަށް އިލްތިމާސްކޮށްފައިވެއެވެ.

ޓެރަރިސްޓުން ޙަމަލާ ދިނުމުގައި އާއްމުން ގިނައިން އެއްވާ ތަންތަނާއި، ހުޅަނގުގެ މީހުން އެއްވާ ތަންތަނަށް އިސްކަންދޭކަން އިނގިރޭސި ޚާރިޖިއްޔާއިން ފާހަގަކޮށްފައިވެއެވެ.

ރާއްޖޭގައި ޓެރަރިސްޓް ޙަމަލާއެއް ދިނުމުގެ ފުރުސަތު ބޮޑުކަމަށް އިނގިރޭސި ޚާރިޖިއްޔާއިން ބުނެފައިމިވަނީ މެދުއިރުމަތީގެ ދާޚިލީ ހަނގުރާތަމަތަކުގައި ބައިވެރިވުމަށްފަހު ހަނގުރާމަވެރިން އަނބުރާ ޤައުމަށް ގޮސް، ހަމަލާއެއް ދީފާނެކަމުގެ ބިރު އޮތް ޤައުމުތަކުގެ ތެރޭގައި ރާއްޖެ ހިމެނޭކަމަށް ބޮޑެތި ބައެއް ޤައުމުތަކުގެ ޖާސޫސީ އިދާރާތަކުން ބުނަމުން ދަނިކޮށެވެ.

ފަހަކަށް އައިސް ބޮޑެތި ޤައުމުތަކުން ވަރަށް ގިނައިން ރާއްޖެއަށް ޒިޔާރަތްކުރުމުގައި ފަރުވާތެރިކުރުމަށް އެޤައުމުތަކުގެ ރައްޔިތުންނަށް އިލްތިމާސްކުރެއެވެ.

ޓްރެވަލް އެޑްވައިޒަރީތައް ނެރުނުނަމަވެސް 2017 ވަނަ އަހަރުވެސް ލައްކައެއްހާ ފަތުރުވެރިން އިނގިރޭސިވިލާތުން ރާއްޖެއަށް ޒިޔާރަތްކުރިއެވެ. އަދި މިއަހަރުވެސް ރާއްޖެއަށް އެންމެ ފުރަތަމަ އައިސްފައިވަނީ އިނގިރޭސި ފަތުރުވެރިޔަކާއި އޭނާގެ އާއިލާއެވެ.