ރައީސް އަބްދުﷲ ޔާމީން ވަނީ އެމަނިކުފާނުގެ ކަންފަތުން މަޑު ނަގަން ޖެހޭ ވާހަކަ އަމިއްލަފުޅަށް ވިދާޅުވެފައެވެ. މިއީ ދެން ޤައުމެއްގެ ވެރިޔަކާ ބެހޭ ގޮތުން މީޑިއާގައި ހާމަކަން ބޮޑު ގޮތެއްގައި ދައްކަން މާ ތާހިރު ވާހަކައެއް ވެސް ނޫނެވެ. އެކަމަކު އެވާހަކަ ފެއްޓެވީ ރައީސް ޔާމީނެވެ. ވަލިއްޔުލް އަމުރު ފެއްޓެވި ވާހަކައެއް އިތުރަށް ކުރިއަށް ގެންދިޔުމަކީ މުހިއްމު ކަމެއް ކަމަށް ފެންނާތީ އެވާހަކަ ދައްކާލަނީއެވެ.

ރައީސް ޔާމީނަށް އިވެނީ ހަމައެކަނި އެމަނިކުފާނު ހިތްޕުޅު ހަމަޖެހިވަޑައިގަންނަވާ، އެމަނިކުފާނު އަޑު އިވެން ބޭނުންފުޅުވާ ވާހަކަތައް އެކަންޏެވެ. އެމަނިކުފާނު އެވިދާޅުވި އެއްޗަކުން ދޭހަވީ އެހެންނެވެ. އެމަނިކުފާނު އެ ވަޑައިގަންނަވަނީ އެކަން ދައްކަވަމުންނެވެ. ބައެއް ވާހަކަތައް އަޑުނީވޭ ކަމަށް އެމަނިކުފާނު ވިދާޅުވާއިރު، ބައެއް ވާހަކަތައް އަޑު އިވިވަޑައިގަތަސް، އިވިވަޑައިގަންނަވާ ކަމަށް ނުހައްދަވާ ކަމަށް ފެނެއެވެ.

އާއަހަރު ފާހަގަކުރުމުގެ ޝޯވއަށް ބަލާލިޔަސް، މިއީ ތެދެއްކަން ސާފުވެއެވެ. އެމަނިކުފާނުގެ ވެރިކަމުގެ ދިފާޢުގައި ބަޔަކު ވާހައެއް ދައްކައިފި ނަމަ، އެ ވާހަކައެއް އެމަނިކުފާނަށް ވަރަށް ސާފުކޮށް، ސަރީޙަކޮށް އިވިވަޑައިގަނެއެވެ. އެހެން ނަމަވެސް ދީނާ ޚިލާފަށް ސަރުކާރުން ކުރާ ކަމެއްގެ ވާހަކަ ބަޔަކު ދެއްކިޔަސް އެމަނިކުފާނަށް އަޑުއިވިވަޑައެއް ނުގަނެއެވެ. އާއަހަރުގެ ޝޯވގައި ނިވާކަން ކުޑަ ހެދުން އަޅައިގެން ނެށުމުން އެތައް ދީނީ ޢިލްމުވެރިންނެއް އެކަން ކުށްވެރިކުރެއްވިއެވެ. އެވާހަކަ އެމަނިކުފާނަށް އިވިވަޑައެއް ނުގަނެއެވެ. އިވިވަޑައިގަތް ނަމަ އެކަން ކުށްވެރިކުރައްވާނެ ނޫންތޯއެވެ؟ އެކަމަކު ހަމަ އެއިލްމުވެރިން މާދަމާ ނިކުމެވަޑައިގެން އެމަނިކުފާނުގެ ވެރިކަމާ ދެކޮޅަށް ތެދުވުމަކީ ކޮށްގެންވާނެ ކަމެއް ނޫން ކަމަށް ވިދާޅުވެއްޖެ ނަމަ، އެ އިލްމުވެރިޔަކު އެދެއްކެވި ވާހަކަފުޅެއް އެމަނިކުފާނަށް އިވިވަޑައިގަންނަވާނެއެވެ.

ރައީސް ޔާމީންގެ ސަރުކާރުގެ ކޮރަޕްޓް ވާހަކަޔާއި، ވައްކަންކުރާ ވާހަކަ ދައްކަވާ ދީނީ ޢިލްމުވެރިން ވެސް މިރާއްޖޭގައި އެބަތިއްބެވިއެވެ. އެކަމަކު އޭގެ ރައްދުގައި ސަރުކާރުން ކުރާ ކަމަކީ އެ ދީނީ ޢިލްމުވެރިންގެ އަގު ވައްޓާލައި، އެދީނީ އިލްމުވެރިންނަށް ރައްދު ދިނުމެވެ. އަދި އޭގެ ބަދަލުގައި ސަރުކާރާ ދެކޮޅަށް ވާހަކަ ނުދެއްކުމަށާއި، ވައްކަމާއި ކޮރަޕްޝަނަށް މަގުފަހިވާ ފަދަ ވާހަކަ ނުދެއްކުމަށް ނަސޭހަތްދީ، ދީނީ ދަރުސްތައް ޓީވީ މެދުވެރިކޮށް ދައްކަމުންދެއެވެ.

ރައީސް ޔާމީނެވެ! ކަންފަތް ސާފުކުރައްވާށެވެ. ދީނީ އިލްމުވެރިން ދައްކާ ވާހަކަތައް އަޑުއައްސަވާށެވެ. މިއީ ސައްތައިން ސައްތަ އިސްލާމީ ޤައުމެކެވެ. އައު އަހަރު ފާހަގަކުރެވޭނެ ވަރަށް ގިނަ ގޮތްތަކެއް ހުރެއެވެ. މީގެ ކުރީގައި ވެސް ޝޯވތައް ބާއްވައެވެ. އެކަމަކު މިހާރު ތިއީ ދެން ތަންކޮޅެއް ބޮޑުވަރެކެވެ. އިސްލާމީ ދައުލަތެއްގެ ރަސްމީ ޓީވީ ޗެނަލުން ދައްކަމުން، އެތައް ބަޔަކު އެއްކޮށްގެން، މަނިކުފާނު ވެސް އަނބިކަނބަލުން އަރިހުގައި ބަހައްޓަވައިގެން ނިވާކަން ކުޑަ ހެދުން އެޅި އަންހެނުން ލައްވާ ނައްޓުވަމުންދިޔައިރު، އެއްޗެއްކޭ ހިތްޕުޅަށް އަރައިވަޑައެއް ނުގަނޭތޯއެވެ؟ މީހަކު ކޮށްލި ޓްވީޓަކަށް މަނިކުފާނުގެ ޕާޓީ އިން ބޮޑެތި ބަޔާންތައް ނެރެމުން ދިޔަ ހަނދުމަ މިހާ އަވަހަށް ނެތުނީތޯއެވެ؟

ކަންފަތް ސާފުކުރައްވާށެވެ. ދީނީ އިލްމުވެރިން ދައްކާ ވާހަކަ އަޑުއައްސަވާށެވެ. އެހެން ނޫން ނަމަ އަނެއްކާ ވެސް 23 ޑިސެމްބަރު އިއްތިޙާދެއް އުފެދި މަނިކުފާނުގެ ވެރިކަން ވެސް ވައްޓާލަފާނެއެވެ. އެކަހަލަ ކަމެއް ވެދާނެކަމުގެ ބިރު އެބަ އޮތް ކަމަށް، އެފަދަ ކަމެއް ދިމާވި ބޭފުޅަކު އިހަކަށްދުވަހު ވިދާޅުވެ، ޓްވީޓްކުރައްވާފައި އޮއްވައި ދުށީމެވެ. އެބޭފުޅާއަކީ އެފަދަ ދީނީ އިލްމުވެރިންގެ ބަސް އެއްސެވި ބޭފުޅެކެވެ. މަނިކުފާނުގެ އަމަލުތައް ހުރީ ދިމާ އިދިކޮޅަށެވެ. އެހެންކަމުން މަނިކުފާނަށް ޖެހޭ ހާލު ގޯސްވެދާނެ ކަމަށް ފެނެއެވެ.