ރައީސް ނަޝީދުގެ އާ އަހަރުގެ އަމާޒު: އެއް ކެނޑިޑޭޓަކު ނެރެގެން ރައީސް ޔާމީން ބަލިކުރުން!
31 ޑިސެމްބަރު 2017 | އާދީއްތަ 10:202018 ވަނަ އަހަރަކީ ވިސްނުންތެރިކަމާއި ހިކުމަތްތެރިކަން އިސްކުރަންވީ އަހަރެއް
ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު
އާ އަހަރުގެ އަމާޒަކީ އެއް ކެނޑިޑޭޓަކު ނެރެގެން ރައީސް އަބްދުﷲ ޔާމީން ބަލިކުރުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ 2018 ވަނަ އަހަރަކީ ވިސްނުންތެރިކަމާއި، ހިކުމަތްތެރިކަން އިސްކުރަންވީ އަހަރެއް ކަމަށެވެ.
ރައީސް ނަޝީދު ވިދާޅުވީ، އެމަނިކުފާނުގެ އަމާޒަކީ ރިޔާސީ އިންތިހާބަށް އެއް ކެނޑިޑޭޓަކު ނެރެގެން ރައީސް ޔާމީން ބަލިކޮށް، ދިވެހިރާއްޖެ އަނެއްކާ ވެސް ދިވެހިންނަށް ހޯދައި ދިނުން ކަމަށެވެ.
"2018 ވަނަ އަހަރަށް މަރުހަބާ! މިއަހަރަކީ ވިސްނުންތެރިކަމާއި، ހިކުމަތްތެރިކަން އަމްދުން އިސްކުރަންވީ އަހަރު. އަޅުގަނޑުގެ މުޅި އަމާޒަކީ މިއަހަރުގެ ރިޔާސީ އިންތިހާބަށް އެއް ކެނޑިޑޭޓް ނެރެ، ރައީސް ޔާމީން ބަލިކޮށް، ދިވެހިރާއްޖެ އަނެއްކާ ވެސް ދިވެހިންނަށް ހޯދައި ދިނުން،" ރައީސް ނަޝީދު ވިދާޅުވެފައިވެއެވެ.
އަމާޒަކީ އެއް ކެނޑިޑޭޓަކު ނެރެގެން ރައީސް ޔާމީން ބަލިކުރުން ކަމަށް ރައީސް ނަޝީދު ވިދާޅުވެފައިވާއިރު، އެމަނިކުފާނު ވަނީ ރިޔާސީ އިންތިހާބުގައި ވާދަކުރައްވާނެކަން ހާމަކުރައްވާފައެވެ.
އެމްޑީޕީއިން ވަނީ އެޕާޓީގެ ރިޔާސީ ޕްރައިމަރީ މެއި މަހު ބާއްވާނެކަން އިއުލާނުކޮށްފައެވެ. ރިޔާސީ ޕްރައިމަރީގައި ބައިވެރިވުމުގެ ފުރުސަތު ހުޅުވާލަން ނިންމާފައިވަނީ މާޗް މަހުގެ ތެރޭގައެވެ.
އެއްކެނޑިޑޭޓަކު ނެރުމާއި ގުޅޭގޮތުން، ގުޅިފައިވާ ޕާޓީތަކުގެ މެދުގައި މަޝްވަރާ ކުރުމަށް ޕާޓީތަކުން މިހާރުވަނީ މަންދޫބުން ކަނޑައަޅާފައެވެ.
