ރާއްޖެ އާއި ލަންކާއިން އެކްސްޕޯޓްކުރާ ހުރިހާ މުދަލަކަށް އެމެރިކާއިން ޑިއުޓީ ނަގަނީ
ޑިއުޓީ މަޢާފްކޮށްދެނީ 122 ޤައުމަކުން އެތެރެކުރާ ވަކި ބާވަތްތަކަކަށް
ޔޫއެސް ޑިޕާޓްމަންޓް އޮފް ކޮމާރސް
ފަޤީރު އަދި ކުރިއަރަމުން އަންނަ ޤައުމުތަކަށް ޑިއުޓީ މަޢާފްކޮށްދޭ ސްކީމް ކޮންގްރެސްއިން އައުކޮށްދީފައިނުވާތީ، ޖެނުއަރީ 1 އިން ފެށިގެން ރާއްޖެއިން އިމްޕޯޓްކުރާ މުދަލަށްވެސް އެމެރިކާގައި ޑިއުޓީ ނަގަންފަށާނެއެވެ.
އެމެރިކާއިން އަމަލުކުރަމުން އަންނަ ޖެނެރަލައިޒްޑް ސިސްޓަމް އޮފް ޕްރިފަރެންސަސް އުޞޫލު ޑިސެމްބަރު 31 އަށް ވަނީ ހަމަވެފައެވެ. 122 ޤައުމަކުން އެމެރިކާއަށް އެތެރެކުރާ ބައެއް ބާވަތްތަކަށް ޚާއްސަ އުޞޫލެއްގެ ދަށުން ޑިއުޓީ މަޢާފްކޮށްދެމުން އަންނައިރު، ކޮންގްރެސްއިން މި އުޞޫލު އައުކޮށް، ފާސްކޮށްނުދޭހާ ހިނދަކު އެ އުޞޫލުގެ ދަށުން ޑިއުޓީ މަޢާފްވާ މުދާތަކަށް ވެސް ޑިއުޓީ ނަގާނެއެވެ. ކޮންގްރެސް ޗުއްޓީއަށް ދިޔައިރު އުޞޫލު އައުކޮށްދީފައި ނުވި ނަމަވެސް، އަނެއްކާ ވެސް ކޮންގްރެސްގެ ޖަލްސާތައް ފެށުމުން އުޞޫލު އައުކުރާނެކަމަށް ބެލެވެއެވެ. 1974ވަނަ އަހަރު ފާސްކޮށް، 1976 ވަނަ އަހަރު ޢަމަލުކުރަން ފެށި މިއުޞޫލަކީ ޔޫއެސް ޓްރޭޑް އެކްޓްގެ ދަށުން ކުދި އަދި ކުރިއަރަމުން އަންނަ އިޤްތިޞާދުތައް ކޮޅަށް ޖެހުމަށް އެމެރިކާއިން އެހީވެދިނުމަށް އެކުލަވާލި ޕްރޮގްރާމެކެވެ.
އެންމެ ފަހުން މި އުޞޫލުގެ މުއްދަތު 2013ވަނަ އަހަރުގެ ޖުލައި މަހު ހަމަވިފަހުން އުޞޫލު އައުކޮށްދީފައިވަނީ 2015ވަނަ އަހަރުގެ ޖޫން މަހުއެވެ.
މި އުޞޫލުގެ ދަށުން ޑިއުޓީ މަޢާފްކޮށްދޭ ޤައުމުތަކުގެ ތެރޭގައި ރާއްޖޭގެ އިތުރުން ސްރީލަންކާ، އިންޑިއާ، ޕާކިސްތާން، ފިލިޕީންސްފަދަ ޤައުމުތައްވެސް ހިމެނެއެވެ.
