ޗައިނާ ކުންފުނިން ފޭދޫ ފިނޮޅުގައި ރިސޯޓު ހެދުމުގެ މަސައްކަތް ފަށައިފި
ރިސޯޓު ހެދުމުގެ އަމަލީ މަސައްކަތް ފައްޓަވައިދެއްވީ ކޮމިޝަނަރ އޮފް ޕޮލިސް
ފޭދޫ ފިނޮޅު، ރިސޯޓެއްގެ ގޮތުގައި ތަރައްގީ ނުކުރުމަށާއި ޕިކްނިކް އައިލެންޑެއްގެ ގޮތުގައި ބޭއްވުމަށް އެތައް ފަރާތަކުން ގޮވާލި
ފުލުހުންގެ ބޭނުންތަކަށް ކުރިން ބޭނުންކުރަމުން ދިޔަ ކ. ފޭދޫ ފިނޮޅު ރިސޯޓެއްގެ ގޮތުގައި ތަރައްގީކުރުމުގެ އަމަލީ މަސައްކަތް ފަށައިފި އެވެ.
ފޭދޫ ފިނޮޅު ރިސޯޓެއްގެ ގޮތުގައި ތަރައްގީކުރުމުގެ އަމަލީ މަސައްކަތް ފަށާފައިވަނީ އަންގާރަ ދުވަހު އެރަށުގައި ބޭއްވި ރަސްމިއްޔާތެއްގަ އެވެ. އެ މަސައްކަތް ރަސްމީކޮށް ފައްޓަވައިދެއްވީ ކޮމިޝަނަރ އޮފް ޕޮލިސް އަހުމަދު އަރީފު އެވެ.
ހުޅުވާލެވިފައިވާ ވާދަވެރި ނީލަމަކާއި ނުލައި، ސަރުކާރުން ފޭދޫ ފިނޮޅު ދީފައިވަނީ ޕާލް އެޓޯލް ޕްރައިވެޓް ލިމިޓެޑް ކިޔާ ކުންފުންޏަކުންނެެވެ. އެ ރަށް ވިއްކާލާފައިވަނީ ގާތްގަނޑަކަށް ހަތަރު މިލިއަން ޑޮލަރު (61 މިލިއަން ރުފިޔާ) އަށެވެ.
ޕާލް އެޓޯލް ކުންފުންޏަކީ ޗައިނާގެ 'ޝެންޒެން ސުންޕެން އިންވެސްޓްމެންޓް' ނަމަކަށް ކިޔާ ކުންފުންޏަކާއި ހޮންކޮންގެ 'މިރީޗް އިންވެސްޓްމެންޓް' ނަމަކަށް ކިޔާ ކުންފުންޏެއްގެ އިތުރުން އައްޑޫ ވިޔަފާރިވެރިޔަކު ހިއްސާވާ ކުންފުންޏެކެވެ. ކުންފުނީގެ މައި ހިއްސާދާރަކީ ޗައިނާގެ ކުންފުންޏެވެ.
ފުލުހުންގެ ވެލްފެއާ ކުންފުނިން ބަލަހައްޓަމުންދިޔަ، 4.1 ހެކްޓަރުގެ ފޭދޫ ފިނޮޅު އެ ކުންފުންޏަށް ވިއްކާލާފައިވަނީ 50 އަހަރުގެ މުއްދަތަކަށެވެ. އަދި އެ މުއްދަތު 99 އަހަރަށް އިތުރު ވެސް ކުރެވޭނެ އެވެ.
ޓޫރިޒަމް މިނިސްޓަރު މޫސާ ޒަމީރު ވިދާޅުވެފައިވާ ގޮތުގައި އެ ރަށް ވިއްކާލާފައިވަނީ، ފުލުހުންގެ ވެލްފެއާ ކުންފުންޏަށް 50 އަހަރުގެ ތެރޭގައި 80 މިލިއަނެއްހާ ޑޮލަރު ވަންނަ ގޮތަށެވެ.
ބީލަމަކާ ނުލައި ރިސޯޓް ތަރައްގީ ކުރުމަށް ދޫކުރާ ރަށްތަކުގެ ލިސްޓު 2016 ވަނަ އަހަރުގެ އޮކްޓޯބަރު މަހު އިއުލާނުކުރުމާއެކު ފޭދޫ ފިނޮޅު ވިއްކާނުލުމަށް ރައީސް މައުމޫން އަބްދުލްގައްޔޫމާއި އެމްޑީޕީއާއި ބައެއް އަމިއްލަ ޖަމިއްޔާތަކުން ގޮވާލާފައި ވެއެވެ. މި ފަރާތްތަކުން ސަރުކާރަށް ގޮވާލާފައިވަނީ، ޕިކްނިކް އައިލެންޑެއްގެ ގޮތުގައި އެ ރަށް ބޭއްވުމަށެވެ.
