ރައީސް ޔާމީން ތިން އަތޮޅަކަށް ކުރެއްވި ދަތުރުފުޅު ނިންމަވާލައްވައިފި

ރައީސް އަބްދުﷲ ޔާމީން ތިން އަތޮޅަކަށް ކުރެއްވި ދަތުރުފުޅު ނިންމަވާލެއްވުމަށް ފަހު މާލެ ވަޑައިގަންނަވައިފިއެވެ.

ބ. އަތޮޅާއި، ނ. އަތޮޅާއި ޅ. އަތޮޅުގެ އަށް ރަށަކަށް ކުރެއްވި ތިން ދުވަހުގެ ދަތުރުފުޅުގައި ރައީސް ޔާމީން މާލެއިން ފުރާވަޑައިގެންނެވީ އާދިއްތަ ދުވަހެވެ.

ރައީސް ޔާމީންގެ މިދަތުރުފުޅުގައި ނ. އަތޮޅު މާޅެންދޫ، ހޮޅުދޫ އަދި ވެލިދޫއަށް ވަޑައިގެން އެ ތިން ރަށުގެ ބަނދަރު ހުޅުއްވައިދެއްވައި، މާޅެންދޫއަށް ވަޑައިގެން އެރަށުގައި ބިނާކޮށްފައިވާ މިސްކިތް ހުޅުއްވައިދެއްވާފައިވެއެވެ. އެ އަތޮޅު ހެނބަދޫ އަށް ވަޑައިގެން އެރަށުގެ ނަރުދަމާ ނިޒާމުގެ އަމަލީ މަސައްކަތް ވެސް ފައްޓަވައިދެއްވިއެވެ.

ޅ. ހިންނަވަރަށް ވަޑައިގެން، އެރަށުގައި އެމެރިކާ ސަރުކާރުން ގާއިމުކޮށްފައިވާ ރައްކާތެރި ބޯފެނުގެ ޚިދުމަތް ރައީސް ޔާމީން ރަސްމީކޮށް ފައްޓަވައިދެއްވާފައިވެއެވެ.

ރައީސް ޔާމީންގެ މި ދަތުރުފުޅުގައި ބ. އަތޮޅު ކެންދޫ އާއި ތުޅާދޫގެ ބަނދަރު ހުޅުއްވައިދެއްވައި، އެ އަތޮޅު އޭދަފުށީ ބިން ހިއްކުމުގެ މަޝްރޫއު ނިންމުމުގެ ރަސްމިއްޔާތާއި، އޭދަފުއްޓާއި ތުޅާދޫގެ ގޮނޑުދޮށް ހިމާޔަތްކުރުމުގެ މަޝްރޫއުގެ ނިންމުން ފާހަގަ ކުރުމުގެ ރަސްމިއްޔާތު ޝަރަފުވެރި ކޮށްދެއްވާފައިވެއެވެ.