މުސްލިމުން އުޅޭ ތަނެއްގައި އެމްޑީޕީގެ ފިކުރު ގެންގުޅެން ހެޔޮ ނުވާނެ: އަބްދުއްރަހީމް

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ފިކުރަކީ މުސްލިމުން ދިރިއުޅޭ ތަނެއްގައި ގެންގުޅެން ހެޔޮ ނުވާނެ ފިކުރެއް ކަމަށް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ނާއިބު ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

ތުޅާދޫގައި ސަރުކާރުން ކުރިއަށް ގެންދިޔަ ބައެއް މަޝްރޫއުތައް ރަސްމީކޮށް ފެށުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން އަބްދުއްރަހީމް ވިދާޅުވި ގޮތުގައި އެމްޑީޕީގެ ފިކުރަކީ މުސްލިމުން ދިރިއުޅޭ ތަނެއްގައި އެމްޑީޕީގެ ފިކުރު ގެންގުޅެން "ހެޔޮ ނުވާނެ" އެވެ. އޭނާ ވިދާޅުވި ގޮތުގައި ތަރައްގީ އާއި އެކުވެރިކަން ގާއިމްކުރުމަށް ރާއްޖޭގައި ޖާގަދޭން ވާނީ ހަމައެކަނި ޕީޕީއެމްގެ ފިކުރަށެވެ.

"އެމްޑީޕީއަކީ ރަށެއްގައި އެއްގޮތަކަށް ވެސް ގެންގުޅެން ހެޔޮވާވަރުގެ ފިކުރެއް ނޫނޭ، މުސްލިމުން ދިރިއުޅޭ ތަނެއްގައި އެމްޑީޕީގެ ފިކުރު ގެންގުޅެން ހެޔޮ ނުވާނެޔޭ، ތަރައްގީ ބޭނުންވާ ތަނެއްގައި އެމްޑީޕީގެ ފިކުރަކަށް ޖާގަދީގެން ނުވާނެޔޭ، އެކުވެރިކަން ބޭނުންވާ ތަނަކަށް އެމްޑީޕީގެ ފިކުރު އެއްގޮތަކަށް ވެސް އަޔަދީގެން ނުވާނެޔޭ، އެކުވެރިކަމާއި އެއްބައިވަންތަކަން ގާއިމްކުރަން ބޭނުންވާ ތަނަކަށް އެމްޑީޕީގެ ފިކުރު ފެތުރުނަ ދީގެން ނުވާނެޔޭ، އެކަންކަމަށް ޖާގަދޭން ވާނީ މި ރާއްޖޭގައި ހަމައެކަނި ޕީޕީއެމްގެ ފިކުރަށޭ،" އޭނާ ވިދާޅުވިއެވެ.

އަބްދުއްރަހީމް ވިދާޅުވީ ތުޅާދޫއަކީ ވަރަށް ގިނަ އަދަދެއްގެ އެމްޑީޕީގެ ސަޕޯޓަރުން ދިރިއުޅޭ ރަށެއް ކަމަށް މައުލޫމާތު ލިބޭ ކަމަށެވެ. އެކަން ފާހަގަކުރައްވައި އޭނާ ވަނީ އެރަށުން އެމްޑީޕީ ފޮހެލަން މަސައްކަތް ކުރަން ފެށުމަށް ރައްޔިތުންނަށް ގޮވާލައްވާފައެވެ.

މީގެ އިތުރުން، އަބްރުއްރަހީމް ވިދާޅުވީ ތުޅާދޫގައި އެހާ ބޮޑަށް ޕީޕީއެމްގެ ހަރަކާތްތައް މިހާރު ކުރިއަށް ނުދިޔަ ކަމުގައިވީ ނަމަވެސް، ކުރިއަށް އޮތް ތަނުގައި ޕީޕީއެމްގެ ބޮޑު ޖަގަހައެއް ހުޅުވައި، ބ. އަތޮޅުގައި ޕީޕީއެމްގެ އެންމެ ވަރުގަދަ ރަށަކަށް ތުޅާދޫ ހެދުމަށް ރައީސް އަބްދުﷲ ޔާމީނާ އެކު މަޝްވަރާ ކުރެއްވުމަށް ފަހު ނިންމާފައިވާ ކަމަށެވެ.

އަބްދުއްރަހީމް ވަނީ، އުންމީދުތަކުގައި ކުލަޖައްސަން ބޭނުންވާ ކަމަށްވާ ނަމަ 2018 ވަނަ އަހަރުގެ ރިޔާސީ އިންތިހާބުގައި ރައީސް ޔާމީނަށް ތުޅާދޫ އިން 75 އިންސައްތައަށް ވުރެ ބޮޑު އަޣްލަބިއްޔަތެއް ހޯދައިދިނުމަށް ގޮވާލައްވާފައެވެ.

އޭނާ ވިދާޅުވި ގޮތުގައި، ރައީސް ޔާމީންގެ ސަރުކާރުން ދަނީ ވަކި ސިޔާސީ ޕާޓީއަކަށް ތަފާތު ކުރުމެއް ނެތި ރާއްޖޭގެ ރަށްރަށް ތަރައްގީ ކުރަމުންނެވެ. ތުޅާދޫއަކީ އެކަމުގެ މިސާލެއް ކަމުގައި ފާހަގަކުރައްވަމުން އޭނާ ވިދާޅުވި ގޮތުގައި، ތުޅާދޫ ރައްޔިތުން އެކަމަށް ހެކިވާނެއެވެ.