އަޖޭގެ އެންމެ ފުރަތަމަ މަރާތީ ފިލްމަކީ "އާޕްލާ މާނަސް" ކަމަށް އޭނާ ބުނެފިއެވެ.
އާދީއްތަ ދުވަހު އަޖޭ ކުރި ޓްވީޓެއްގައި ވީޑިއޯއެއް އާންމުކުރަމުން ބުނެފައި ވަނީ އޭނާގެ އެންމެ ފުރަތަމަ މަރާތީ ފިލްމަކީ "އާޕްލާ މާނަސް" ކަމަށެވެ. އަދި އެ ފިލްމު ރިލީޒްކުރާނީ އަންނަ ފެބްރުއަރީ މަހުގެ 9 ގައި ކަމަށް އަޖޭ ޓްވީޓްކޮށްފައިވާ ވީޑިއޯގައި ވަނީ ބުނެފައެވެ. އަޖޭގެ މި ޓްވީޓްގައި ވަނީ މަރާތީ ފިލްމު ޑައިރެކްޓަރ ސަތިޝް ރަޖުވާޑޭ ވެސް ޓެގް ކޮށްފައެވެ.
އެ ވީޑިއޯގައި އަޖޭ ބުނެފައި ވަނީ އޭނާގެ ފިލްމީ ހަޔާތުގައި ވީ 25 އަހަރުގައި އޭނާ އެތަކެއް އާ ފިލްމުތަކެއް ހަދާފައިވާ ކަމަށެވެ. އޭނާ އާއި އޯޑިއެންސްއާ އެކު އޮތް ގުޅުން ހީނަރުވެފައި ނުވާ ކަމަށާއި އޭނާއަށް އޯޑިއެންސްގެ ލޯބި ލިބިފައިވާ ކަމަށެވެ. އޭނާ މަރާތީ ފިލްމެއް ހެދުމަށް އަބަދު ވެސް ޝައުގުވެރިވާ ކަމަށާއި ކުޑައިރުއްސުރެ މަރާތީ ބަހަކީ ވަރަށް ކަމުދާ ބަހެއް ކަމަށް އަޖޭ ބުންޏެވެ. އަދި ކާޖޮލްއާ ކައިވެނި ކުރުމުން މަރާތީ ބަހަށާއި ސަގާފަތަށް އޮތް ލޯބި އިތުރުވެގެން ދިޔަ ކަމަށް އަޖޭ ބުންޏެވެ. އަޖޭ ބުނީ މިއީ ވަރަށް ގިނަ ދުވަހު އޭނާ އިންތިޒާރުކުރަމުން އައި ފިލްމެއް ކަމަށެވެ. މި ފިލްމުގެ ލީޑު ރޯލުން ފެނިގެންދާނީ ނާނާ ޕަޓެކަރް، ސުމީރު ރަގާވަން، އިރަވަތީ ހާޝީ އެވެ.
އާޕްލާ މާނަސްގެ ޝޫޓިން މިހާރު ވަނީ ފަށާފައެވެ.
Happy to announce my 1st ever Marathi film venture - Aapla Manus, releasing on 9th Feb.@nanagpatekar @sache09 @sumrag @irawatiharshe @aplamanusfilm pic.twitter.com/jBLU0gBisw
— Ajay Devgn (@ajaydevgn) December 24, 2017
އަޖޭގެ އެންމެ ފަހު ޕްރޮޑަކްޝަނަކީ ހިންދީ ފިލްމު "ޝިވާއީ" އެވެ. އަޖޭ ވެސް ލީޑު ރޯލުން ފެނިގެންދާ މި ފިލްމު ނިކުމެފައި ވަނީ 2016 ވަނަ އަހަރުގައެވެ. އެ ފިލްމަށް ވަނީ ނެޝަނަލް ފިލްމު އެވޯޑް ފޯ ބެސްޓް ސްޕެޝަލް އެފެކްޓްސްގެ އެވޯޑް ލިބިފައެވެ.
