ހިންނަވަރުގެ ފެނުގެ ޚިދުމަތް ރަސްމީކޮށް ފައްޓަވައި ދެއްވައިފި
25 ޑިސެމްބަރު 2017 | ހޯމަ 10:45ޔޫއެސްއެއިޑްއިން ހިންނަވަރުގައި ހިންގި މަޝްރޫއެއް
ރައީސް ޔާމީން ރަށަކަށް ކުރެއްވި ދަތުރުފުޅެއްގެ ތެރެއިން
ޅ. ހިންނަވަރުގައި ގާއިމްކޮށްފައިވާ ރައްކާތެރި ބޯފެނުގެ ނިޒާމުގެ ޚިދުމަތް ރައީސް އަބްދުﷲ ޔާމީން ރަސްމީކޮށް ފައްޓަވައި ދެއްވައިިފި އެވެ.
ހިންނަވަރުގެ ފެނުގެ ނިޒާމު ފައްޓަވައި ދެއްވީ، ބައެއް ރަށްރަށަށް ރައީސް ޔާމީން ކުރައްވަމުން ގެންދަވާ ދަތުރުފުޅުގައި ހޯމަ ދުވަހުގެ ހެނދުނު ހިންނަވަރަށް ވަޑައިގެން އެރަށުގައި ބޭއްވި ހަފްލާއެއްގައެވެ.
ހިންނަވަރުގެ ފެނުގެ ޚިދުމަތަކީ ޔުނައިޓެޑް ސްޓޭޓްސް އެޖެންސީ ފޯ އިންޓަނޭޝަނަލް ޑެވެލޮޕްމަންޓް (ޔޫއެސްއެއިޑް)ގެ ދަށުން، އެމެރިކާ ސަރުކާރުގެ ހިލޭ އެހީގައި ހިންގި މަޝްރޫއެކެވެ.
މިއީ 3.8 މިލިއަން ޑޮލަރު(ގާތްގަނޑަކަށް 58.6 މިލިއަން ރުފިޔާ) ގެ މަޝްރޫއެކެވެ. މި މަޝްރޫއުގެ އަމަލީ މަސައްކަތް ފެށީ 2015 ވަނަ އަހަރުގެ ޑިސެމްބަރުގަ އެވެ. އަދި މަސައްކަތް ނިންމާލާފައިވަނީ މިއަހަރުގެ މެއި މަހުގެ ތެރޭގައެވެ. ނަމަވެސް މި މަޝްރޫއުގެ އެހީ ހޯދައި، މަޝްރޫއު އިއުލާންކޮށްފައި ވަނީ ރައީސް މުހައްމަދު ނަޝީދުގެ ވެރިކަމުގައި 2010 ވަނަ އަހަރު އެވެ.
މި ނިޒާމުގެ ދަށުން ބަހައްޓާފައިވާ ޑީސެލިނޭޝަން ޕްލާންޓް މެދުވެރިކޮށް ދުވާލަކު 80 ކޮޑި މީޓަރުގެ ފެން އުފައްދައެވެ. މި ނިޒާމުގެ ދަށުން ވާރޭ ފެން ރައްކާކުރުމަށްފަހު، އެފެނާ މީރުކޮށްފައިވާ ލޮނު ފެން އެއްކޮށްގެން، ފެނުގެ ނެޓްވޯކެއްގެ ތެރެއިން 700 ގޭބީސީއަށް ފެން ފޯރުކޮށްދޭނެ އެވެ.
އެ ނިޒާމުގައި ދުވާލަކު 80 ކިއުބިކް މީޓަރުގެ ފެން އުފެއްދޭ "ރިވާސް އޮސްމޯސިސް ޔުނިޓެއް" ހިމެނެ އެވެ. މި ޔުނިޓް ބެހެއްޓިފައިވާ އިމާރާތުގެ ހަކަތައިގެ ކަންކަމުގެ އެއްބައި ހަމަޖައްސަނީ އިރުގެ ހަކަތަ ބޭނުން ކޮށްގެންނެވެ. މީގެ އިތުރުން، ގްރައުންޑްވޯޓާ އިންފިލްޓްރޭޝަން ނިޒާމެއްގެ އެހީގައި ރައްކާނުކުރެވޭ ވާރޭ ފެން ރަށުގެ ފެން ފަށަލައަށް ފޮނުވާލެވި، މިކަމުގެ ސަބަބުން ފެން ފަށަލަ އިޔާދަވެ އެވެ.
މިފެސިލިޓީގައި ގާއިމް ކުރެވިފައިވާ ފެނުގެ ކޮލިޓީ ބަލާ ލެބޯޓަރީގެ އެހީގައި ހިންނަވަރުގެ އިތުރުން އެ ސަރަހައްދުގެ އެހެން ރަށްރަށަށް ބޭނުންވާ ފެނުގެ ކޮލިޓީ ދެނެގަތުމުގެ މަސައްކަތް ކުރެވޭނެ އެވެ. ޔޫއެސްއެއިޑުން ވަނީ މި ނިޒާމް ބެލެހެއްޓުމަށްޓަކައި، އެ މަސައްކަތުގައި އުޅޭ ފެނަކަ ކޯޕަރޭޝަން ލިމިޓެޑްގެ މުއައްޒަފުން ތަމްރީން ކުރުމަށްޓަކައި ފަންނީ އެހީތެރިކަންވެސް ފޯރުކޮށްދީފަ އެވެ.
އާދިއްތަ ދުވަހު ހެނދުނު ބައެއް ރަށްރަށަށް ރައީސް ޔާމީން ފެއްޓެވި ތިން ދުވަހުގެ މިދަތުރުފުޅުގައި އާދިއްތަ ދުވަހު ވަނީ ނ. އަތޮޅު މާޅެންދޫއަށާއި، ހެނބަދޫއަށާއި، ހޮޅުދޫ އަދި ވެލިދޫއަށް ޒިޔާރާތް ކުރައްވާފައެވެ. މާޅެންދޫއަށް ވަޑައިގެން އެރަށު ބަނދަރާއި އެރަށު މިސްކިތް ހުޅުއްވައިދެއްވައި ހެނބަދޫގެ ނަރުދަމާ ނިޒާމުގެ ޢަމަލީ މަސައްކަތް ފަށްޓަވައިދެއްވައި، ހޮޅުދޫ އަދި ވެލިދޫގެ ބަނދަރު ވެސް ވަނީ ހުޅުއްވައިދެއްވާފައެވެ.
ރައީސް ޔާމީނުގެ މި ދަތުރުފުޅުގައި، ހޯމަ ދުވަހާއި އަންގާރަ ދުވަހު ވަޑައިގަތުމަށް ހަމަޖެހިފައިވާ ރަށްތަކުގައި ވެސް ސަރުކާރުން ކުރިއަށް ގެންދަވާ ބައެއް މަޝްރޫޢުތައް ފައްޓަވައި ދެއްވުމާއެކު، ބައެއް މަޝްރޫޢުތަކުގެ ނިންމުން ފާހަގަ ކުރުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ވަނީ ހަމަޖެހިފައެވެ.
