ހުރިހާ މަޝްރޫޢުތައް އަންނަ އަހަރަށް ނިމޭނެ، 2019ގައި އައު މަޝްރޫޢުތައް އަންނާނެ: ރައީސް ޔާމީން
މަޝްރޫޢުތަކުގެ ބޮޑު ބައި ވަނީ ނިމިފައި
ރައީސް ޔާމީން ހޮޅުދޫއަށް ވަޑައިގެން އެރަށު ކުޑަކުއްޖަކާއި ސަލާމް ކުރައްވަނީ
ޕީޕިއެމްގެ ސަރުކާރުން ފެށި ތަރައްޤީގެ ހުރިހާ މަޝްރޫޢަކާއި، ކުރީގެ ސަރުކާރުތަކުން ފަށައި، ނުނިމި ހުއްޓާ މިސަރުކާރަށް ވާރުތަވި މަސައްކަތްތައް އަންނަ އަހަރުގެ ނިޔަލަށް ނިންމާލެވޭނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.
ނ. ހޮޅުދޫ ބަނދަރު ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ޔާމީން ވިދާޅުވީ ބަނދަރު ހެދުމާއި، ފެނާއި ނަރުދަމާ އަދި މަގު ހެދުމުގެ ގިނަ މަޝްރޫޢުތަކެއް ފެށިކަމާއި، އެމަޝްރޫޢުތައް އަންނަ އަހަރުގެ ނިޔަލަށް ނިންމާލެވޭނެ ކަމަށެވެ. އަދި އެއަށް ފަހު 2019 ވަނަ އަހަރުގެ ބަޖެޓްގައި މުޅިން އައު މަޝްރޫޢުތަކަށް ޖާގަ ލިބިގެންދާނެ ކަމަށް އެމަނިކުފާނު ވިދާޅުވިއެވެ. މިޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ 2013ވަނަ އަހަރު ވެރިކަމާއި ޙަވާލުވިއިރު ވެވަޑައިގެންނެވި ވަޢުދުތަކުގެ ބޮޑު ބައި މިހާރު ފުއްދާދެވިފައިވާ ކަމަށެވެ.
މިޖަލްސާގައި ވެސް އިދިކޮޅު ފަރާތްތަކުން ދައްކާ ވާހަކަތަކަށް ރައީސް ޔާމީން ރައްދު ދެއްވިއެވެ. އެގޮތުން މިދުވަސްވަރަކީ ސިޔާސީ ބޭފުޅުން ވަރަށް ގިނަ ވާހަކަތަކެއް ދައްކަވާ ދުވަސްކޮޅެއް ކަމަށާއި، އެބޭފުޅުން ދައްކަވާ ވާހަކަތަކަށް ސަމާލުވާން ޖެހޭނެ ކަމަށް ރައީސް ޔާމީން ވިދާޅުވިއެވެ.
މީގެ އިތުރުން 60 މިލިއަނަށް ވުރެ ގިނަ ރުފިޔާ ޚަރަދު ކޮށްގެން ހޮޅުދޫގެ ބަނދަރު ހެދިއިރު، އެމަޝްރޫޢުގެ މަސައްކަތް އެއަށް ވުރެ އަގު ހެޔޮކޮށް ކުރެވިދާނެކަމަށް އިދިކޮޅު ފަރާތްތަކުން ބުނާނެ ކަމަށް ރައީސް ޔާމީން ވިދާޅުވިއެވެ. އެހެން ނަމަވެސް އެއަގަށް ބަނދަރު ހެދުމާއި، ދެތިން ބިލިއަން ރުފިޔާއަށް އައިޖީއެމްއެޗްގެ އައު އިމާރާތް އެޅުމަކީ ސިކުނޑިތަކަށް ޤަބޫލުކުރަން އުނދަގޫ ވާހަކައެއް ނޫން ކަމަށް ރައީސް ޔާމީން ވިދާޅުވިއެވެ.
ބައިނަލްއަޤްވާމީ ފަރާތްތަކުން ރާއްޖެއާއިމެދު ދައްކާ ވާހަކަތަކާއި މެދު ވާހަކަ ދައްކަވަމުން ރައީސް ޔާމީން ވިދާޅުވީ ދެޤައުމެއްގެ ޑިމޮކްރަސީ އެއްގޮތް ނުވާނެ ކަމަށެވެ. އަދި ހުޅަނގުގެ ޤައުމުތަކުން ޤަބޫލުކުރާ ލިބަރަލް ޑިމޮކްރަސީ ރާއްޖެއަށް ކަމުނުދާނެ ކަމަށް ވެސް ރައީސް ޔާމީން ވިދާޅުވިއެވެ.
