526 ވަނަ ލަނޑާއެކު މެސީ ތާރީހުގެ ތެރެއަށް

ބާސެލޯނާއަށް ޖަހައިދިން 526 ވަނަ ލަނޑާއެކު އާޖެންޓީނާގެ ކެޕްޓަން ލިއޮނެލް މެސީ އަނެއްކާ ވެސް ތާރީހުން ޖާގަ ހޯދައިފިއެވެ.

ހޮނިހިރު ދުވަހު ސްޕެނިޝް ލަލީގާގައި ރެއާލް މެޑްރިޑާއި ދެކޮޅަށް ކުޅުނު މެޗުގައި ޖެހި ލަނޑާއެކު އޭނާ ވެގެން ގޮސްފައިވަނީ ޔޫރަޕުގެ ގަދަ ފަސް ލީގުގައި އެއް ޓީމަކަށް އެންމެ ގިނަ ލަނޑު ޖަހައިދިން ކުޅުންތެރިޔާއަށެވެ. މި މެޗުގައި މެސީ ލަނޑު ޖެހީ އެ ޓީމަށް ލިބުނު ޕެނަލްޓީއަކުންނެވެ.

މީގެކުރިން މި ރެކޯޑު އޮންނަނީ ޖަރުމަނުގެ ބަޔާން މިއުނިކްއަށް 1964 އިން ފެށިގެން 1979 އަކަށް ކުޅުނު އެ ގައުމުގެ ފޯވާޑު ގާޑް މުލާ އަތުގައެވެ. އޭނާ ވަނީ ބަޔާންއަށް ކުޅުނު 572 މެޗުގައި 525 ލަނޑު އެ ޓީމަށް ޖަހައިދީފައެވެ.

މުލާގެ ރެކޯޑު މެސީ މުގުރާލީ އޭނާ ބާސާއަށް ކުޅުނު 605 މެޗުގައި 526 ލަނޑު ޖަހައިދީގެންނެވެ. ރެއާލްއާ ދެކޮޅަށް ޖެހި ލަނޑާއެކު މިހިނގާ 2017 ވަނަ އަހަރު އޭނާ ވަނީ މިހާތަނަށް 50 ލަނޑު ބާސާއަށް ޖަހައިދީފައެވެ. މިއީ ޔޫރަޕުގެ ގަދަ ފަސް ލީގުގައި ކުޅެމުން އަންނަ އެހެން ހުރިހާ ފޯވާޑުންނަށްވުރެ އިތުރު އަދަދެކެވެ.

ގާޑް މުލާގެ ރެކޯޑު މެސީ މުގުރާލާފައިވާއިރު މުލާއަކީ އޭނާ ކުޅުނު ދުވަސްވަރު ދުނިޔޭގެ އެންމެ މޮޅު ކުޅުންތެރިޔާގެ ގޮތުގައި ގިނަ ބަޔަކު ދެކުނު ކުޅުންތެރިޔެކެވެ. ބަޔާން މިއުނިކްއާއެކު 13 ތަށި ކާމިޔާބުކުރި މުލާއަކީ 1974 ވަނަ އަހަރު ފީފާ ވޯލްޑް ކަޕް ޖަރުމަނުން ކާމިޔާބުކުރިއިރު އެ މުބާރާތުގެ އެންމެ މޮޅު ކުޅުންތެރިޔާ ވެސްމެއެވެ. ހަމައެހެންމެ ޖަރުމަނުން 1972 ވަނަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކުރިއިރު އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާއަށްދޭ ރަން ބޫޓު ވެސް ހޯދީ މުލާއެވެ. އަދި އޭނާއަކީ 1970 ވަނަ އަހަރު ފީފާއިން ހޮވި ދުނިޔޭގެ އެންމެ މޮޅު ކުޅުންތެރިޔާއެވެ.

މެސީ ވަނީ އޭނާގެ ކެރިއަރުގައި މި ރެކޯޑުގެ އިތުރުން ގިނަ އަދަދެއްގެ ރެކޯޑުތައް މުގުރާލާފައެވެ. އެގޮތުން އޭނާއަކީ ބާސާގެ ތާރީހުގައިވެސް އެ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ. ހަމައެހެންމެ 363 ލަނޑާއެކު ސްޕެނިޝް ލަލީގާގެ ތާރީހުގައިވެސް އެންމެ ގިނަ ލަނޑު ޖަހާފައިވާ ކުޅުންތެރިޔަކީ މެސީއެވެ.

ބާސެލޯނާއާއެކު 29 ތައްޓެއް ކާމިޔާބުކޮށްފައިވާ މެސީ ވަނީ ދުނިޔޭގެ އެންމެ މޮޅު ކުޅުންތެރިޔާގެ މަގާމު ފަސް ފަހަރެއްގެ މަތިން ހޯދާފައެވެ. ހަތަރު ފަހަރެއްގެ މަތިން ޔޫރަޕުގެ އެންމެ ގިނަ ލަނޑު ޖެހި ކުޅުންތެރިޔާއަށް ދޭ ރަން ބޫޓު ހޯދި މެސީއަކީ ދުނިޔެ ދުށް އެންމެ މޮޅު ކުޅުންތެރިޔާގެ ގޮތުގައި ގިނަ ބަޔަކު ދެކޭ ކުޅުންތެރިޔާކަން ފާހަގަކޮށްލެވެއެވެ.