ކ. މާލެ
|
23 ޑިސެންބަރ 2017 | ހޮނިހިރު 07:48
ރޮނާލްޑޯ އަދި ބޭލް، ރެއާލްގެ ފަރިތަކުރުންތަކުގައި
ރޮނާލްޑޯ އަދި ބޭލް، ރެއާލްގެ ފަރިތަކުރުންތަކުގައި
އޭއެފްޕީ
ސްޕެނިޝް ލަލީގާ
ބާސާ އާދެކޮޅަށް ކުޅޭ މެޗަށް ރޮނާލްޑޯ އަދި ބޭލް ތައްޔާރު: ޒިދާން
 
މިމެޗަށް ނުކުންނައިރު ދެ ޓީމުގެ ދެމެދުގައި 11 ޕޮއިންޓުގެ ފަރަގެއް އެބައޮތް
 
ރޮނާލްޑޯ އަދި ބޭލް ވެސް ވަނީ އަނިޔާ އަށް ފަހު ތަމްރީންތަކުގައި ބައިވެރިވާން ފަށާފައި

ސްޕެނިޝް ލީގުގައި ބާސެލޯނާއާ ދެކޮޅަށް ކުޅޭ މެޗަށް ރެއާލް މެޑްރިޑްގެ ފޯވާޑް ކްރިސްޓިއާނޯ ރޮނާލްޑޯ އާއި ގެރެތު ބޭލް، ސައްތައިން ސައްތަ ތައްޔާރު ވެފައިވާ ކަމަށް ރެއާލްގެ ކޯޗު ޒައިނުއްދީން ޒިދާން ބުނެފި އެވެ.

އެލް ކްލެސިކޯގެ ނަމުން މަޝްހޫރުވެފައިވާ ބާސެލޯނާ އަދި ރެއާލްގެ ކުރިމަތިލުމަށް، ރޮނާލްޑޯ އަދި ބޭލް ތައްޔާރުވެފައިވާ ކަމަށް ޒިދާން ބުނެފައިވާއިރު، މި ދެ ކުޅުންތެރިން ވެސް މިދިޔަ ހަފްތާ ހޭދަކުރީ އަނިޔާގައެވެ.

އަނިޔާގެ ސަބަބުން މިހަފްތާގެ ކުރީކޮޅު ބޭއްވި ފަރިތަކުރުންތަކުގައި ރޮނާލްޑޯ ބައިވެރިނުވެ ޓީމާ ވަކިން ތަމްރީންތައް ހެދި ނަމަވެސް، ހުކުރު ދުވަހު ބޭއްވި ފަރިތަކުރުންތަކުގައި ރޮނާލްޑޯ ބައިވެރިވިއެވެ. މީގެ އިތުރުން ބޭލް އަށް ލިބިފައިވާ އަނިޔާ އިން ސަލާމަތްވެފައިވާ ކަމަށް ރިޕޯޓްތައް ބުނެއެވެ.

މެޗުގެ ކުރިން ރޮނާލްޑޯއާ ގުޅޭ ގޮތުން ކުރި ސުވާލަކަށް ޖަވާބުދެމުން ރެއާލްގެ ކޯޗު ޒިދާން ބުނީ، އޭނާ ސަތޭކަ އިންސައްތަ ތައްޔާރުވެފައިވާ ކަމަށާއި ހުކުރު ދުވަހުގެ ތަމްރީންތަކުގައި ބައިވެރިވެފައިވާ ކަމަށެވެ.

ރޮނާލްޑޯއާ ޚިލާފަށް ފައިގެ ކުޑަކަޅުވާ އަށް ލިބުނު އަނިޔާއާ ގުޅިގެން މިދިޔަ ސެޕްޓެމްބަރު މަހުގެ ފަހުން ބޭލް ސްޕެނިޝް ލީގުގެ މެޗެއް ކުޅެފައެއްނުވެއެވެ. އަނިޔާ އިން ސަލާމަތްވެ، ރެއާލް މެޑްރިޑް އެންމެ ފަހުން ކުޅުނު ފީފާ ކްލަބް ވޯލްޑް ކަޕްގެ ދެ މެޗުގައި ވެސް އޭނާ އިނނީ ބެންޗުގައެވެ.

ބާސެލޯނާއާ ދެކޮޅަށް ހޮނިހިރު ދުވަހު ކުޅޭ މެޗާ ގުޅޭ ގޮތުން ޒިދާން ބުނީ، އެ ދެ ކުޅުންތެރިން ވެސް ކުޅެން ނިކުތުމަށް ސަތޭކަ އިންސައްތަ ތައްޔާރުވެފައިވާ ކަމަށާއި، އެހެންނަމަވެސް މިމެޗުގައި ރޮނާލްޑޯ އަދި ބޭލް ކުޅޭނެކަން ނިންމާނީ ހޮނިހިރު ދުވަހު ކަމަށެވެ.

ހޮނިހިރު ދުވަހު ހަވީރު ކުޅޭ މިމެޗަށް ދެ ޓީމް ނުކުންނައިރު، ސްޕެނިޝް ލީގުގައި މި ސީޒަނުގައި މިހާތަނަށް ކުޅުނު އެއްވެސް މެޗަކުން ބަލިނުވެ، 42 ޕޮއިންޓާ އެކު ބާސެލޯނާ އޮތީ ތާވަލްގެ އެއްވަނާގައެވެ. ބާސެލޯނާ އަށް ވުރެ އެއް މެޗު މަދުން ކުޅެގެން 31 ޕޮއިންޓާ އެކު ރެއާލް އޮތީ ތާވަލްގެ ހަތަރުވަނައިގައެވެ.

ބާސެލޯނާގެ ކޯޗު އާނެސްޓޯ ވަލްވާޑޭގެ އިރުޝާދުގެ ދަށުން މިސީޒަނުގައި ކުޅުނު އެއްވެސް މެޗަކުން ބާސެލޯނާ ބަލިވެފައެއް ނުވެއެވެ.

މެޗާ ގުޅޭ ގޮތުން ވަލްވާޑޭ ބުނީ، މެޗުގެ ފޭވަރިޓުންނަކީ ބާސެލޯނާ ކަމަށް ނުދެކޭ ކަމަށާއި، ލީގު ތާވަލުގެ ނުފޫޒު މިފަދަ ވާދަވެރި މެޗުތަކުގައި ނޯންނާނެ ކަމަށެވެ.

ހޮނިހިރު ދުވަހު ހަވީރު، ރާއްޖެ ގަޑިން 5:00 ގައި ފަށާ މިމެޗު ކުޅޭނީ ރެއާލްގެ ދަނޑުގައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އަލީ ޔޫސުފް
0%
0%
0%
0%
0%
0%
ކޮމެންޓް