އެއް ލޯ ފޮރުވުން، މިއީ ކޮންކަމެއް؟

އެއް ލޮލުގެ މަތީ އަތްއަޅައި ފޮރުވައިގެން ނަގާފައި ހުންނަ ފޮޓޯތަކެއް މި ހަފްތާގައި ސޯޝަލް މީޑިއާގައި ވަނީ ދައުރުވާން ފަށައިފައެވެ. މިއީ ބާއްވަން އުޅޭ ހަރަކާތެއް، ނޫނީ ކުރިއަށް ގެންދެވޭ ހަރަކާތަކާ ގުޅިފައިވާ ކަމެއް ނޫނެވެ.

ހަތް އަހަރުވީ ސީރިޔާގެ ދާޚިލީ ހަނގުރާމައިގައި އެ ގައުމުގެ ރައްޔިތުންނަށް ކޮންމެ ދުވަހަކީވެސް ނުރައްކަލާއި ބިރުވެރިކަމުގެ ދުވަހެކެވެ. މީހަކު ނޫނީ ކުއްޖަކު ޒަޚަމްނުވާ ދުވަހެއް ނުދާނެއޭ ވެސް ބުނެވިދާނެއެވެ. އެހެން ނަމަވެސް ދޭތެރެ ދޭތެރެއިން އިތުރު ހިތްދަތި ފޮޓޯތައް އާއްމުވެ ސޯޝަލް މީޑިއާގައި ހަމްދަރުދީ އޮހިގެންދެއެވެ. ސެޕްޓެމްބަރު 2، 2015 ގައި މެޑިޓެރޭނިއަން ކަނޑަށް ޣަރަގުވި ސީރިޔާގެ ރެފިއުޖީންގެ ބޯޓަކުން ތުރުކީގެ ގޮނޑުދޮށަށް ލައްގާފައި އޮތް ތުއްތު ތުއްތު ކުއްޖާ، އަލަން ކުރުދީ އާއި މިދިޔަ އަހަރުގެ އޯގަސްޓްގައި ހަލަބުގައި ދިން ހަމަލާތަކުގައި ވެއްޓިފައިވާ އިމާރާތްތަކުގެ ދަށުން ނެގުމަށްފަހު އެމްބިއުލާންސްގެ ތެރޭގައި ބަހެއްވެސް ނުބުނެވި އިން އުމުރުން 5 އަހަރުގެ އޮމްރާން ދަޤްނީޝްގެ ފޮޓޯ އަކީ އެތައް ބަޔަކު ރޮއްވާލި ފޮޓޯތަކެވެ.

މިހާރު ކުރިޔަށްގެންދެވޭ ،އެއްލޯ ފޮރުވުމުގެ ކެމްޕެއިން ގުޅިފައިވަނީ މިފަދަ ހިތްދަތި ފޮޓޯތަކަކާއެވެ. ދިމިޝްގުގެ ރަށްބޭރުން އޮންނަ ގޫތާއޭ ކިޔޭ ސިޓީގެ ބާޒާރަކަށް މިއަހަރުގެ އޮކްޓޯބަރު މަހުގެ 29 ވަނަ ދުވަހު ދިން ހަމަލާއެއްގައި އުމުރުން އެންމެ ދެމަހުގެ ކަރީމްގެ އެއް ލޮލުގެ ފެނުން ގެއްލި ބޮލަށްވަނީ ޒަޚަމްތަކެއް ލިބިފައެވެ. އެ ހަމަލާގައި އޭނާގެ މަންމަ ދުނިޔެ ދޫކުރިއެވެ. ސޯޝަލް މީޑިއާގައި އެއް ލޮލުގައި އަތްއަޅައިގެން ކުރިޔަށް ގެންދާ ކެމްޕެއިނަކީ ކަރީމްއާއެކުގައި ތިބިކަން ހާމަކުރުމަށް ގެންދެވޭ ކެމްޕެއިނެކެވެ. "ސޮލިޑަރިޓީ ވިތް ކަރީމް" ހޭޝްޓެގް ހޯމަ ދުވަހުން ފެށިގެން ބުރާސްފަތި ދުވަހުގެ ހެނދުނާ ހަމައަށް ސައްބީސް ހާހަށްްވުރެ ގިނަ މީހުންވަނީ ޝެއަރކޮށްފައެވެ.

ސީރިޔާގައި ސޯޝަލް މީޑިއާ ބޭނުންކުރާ އެތައް ބަޔަކުވެސްވަނީ ލޯ މަތީ އަތްއަޅައިގެން ތިބެ ފޮޓޯ ނެގުމަށްފަހު ޝެއަރކޮށްފައެވެ. މީގެ އިތުރުން ސީރިޔާގައި ހޮސްޕިޓަލްތައް ހިންގަމުންދާ، ތުރުކީގައި ގާއިމްވެފައިވާ ޖަމާއަތެއްކަމަށްވާ އިންޑިޕެންޑެންޓް ޑޮކްޓަރސް އެސޯސިއޭޝަނުގެ މެމްބަރުންވެސް އެއްލޮލުގައި އަތްއަޅައިގެން ތިބެ ފޮޓޯ ނެގުމަށްފަހު ޝެއަރކޮށްފައެވެ. މީގެ އިތުރުން ވައިޓްހެލްމެޓްގެ ގޮތުގައި މަޝްހޫރުވެފައިވާ ސީރިޔާގެ ސިވިލް ޑިފެންސް ގްރޫޕުންވެސް މިފަދައިން އަމަލުކޮށްފައިވެ އެވެ.

އިނިގރޭސިވިލާތުން އދ.އަށް ކަނޑައަޅުއްވާފައިވާ ދާއިމީ މަންދޫބު މެތިއު ރައިކްރޮފްޓްވެސް ވަނީ އދގެ މައި މަރުކަޒުގެ ތެރޭ އިންނަވައި އެއްލޮލުގެ މަތީ އަތްއަޅުއްވައިގެން އިންނެވި ފޮޓޯ ޓްވިޓަރގައި ޝެއަރކުރައްވާފައެވެ.

ގިނަބައެއްގެ މިފަދަ މަސައްކަތާއެކު ސީރިޔާގެ މަސްރަހުގެ ނާޒުކުކަން ސިޔާސީ ފަރާތްތަކާއި އެހެނިހެން ފަރާތްތަކުގެ ސަމާލުކަމަށް އަނެއްކާވެސް މިވަނީ އައިސްފައެވެ. ނަމަވެސް ގިނަ ބަޔަކު ދެކެނީ އަލަން ކުރުދީއާއި، އޮމްރާން ދަގްނީޝްގެ ފޮޓޯއަށް ވީފަދައިން ހަފްތާ ނުވަތަ ދެ ހަފްތާއަށްފަހު، ސީރިޔާގެ މަސްރަހަށް ހައްލެއް ގެނައުމަށް އެއްވެސް މަސައްކަތެއް ނުކޮށް މިފަހަރުވެސް ވާހަކަތައް އޮބިގެން ހިނގައިދާނެ ކަމަށެވެ.