ފަރަންސޭސީވިލާތުގެ ވެރިރަށް ޕެރިހާއި މާލެއާ ދެމެދު ޑައިރެކްޓް ފްލައިޓްތައް ފަށާފައިވާއިރު، އެޤައުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވެއްޖެއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިއަހަރުގެ ނޮވެމްބަރު މަހު ފަރަންސޭސީވިލާތުން ރާއްޖެއަށް އައި ފަތުރުވެރިންގެ އަދަދު މިދިޔަ އަހަރުގެ ނޮވެމްބަރު މަހާއި އަޅާބަލާއިރު ވަނީ 25 ޕަސެންޓް އިތުރުވެފައެވެ. އެއަރ ފްރާންސުން ޕެރިހުގެ ޗާލްސް ޑި ގޯލް އެއަރޕޯޓާއި މާލެއާ ދެމެދު ސީދާ ދަތުރުތައް ފަށާފައިވަނީ ނޮވެމްބަރު 1 ގައެވެ.

ބުކިންގ ޓްރެންޑްތަކަށް ބަލާއިރު، މިއަހަރުގެ ފިނި މޫސުން ނިމޭއިރު ފަރަންސޭސިވިލާތުން ރާއްޖެއަށް އައި ފަތުރުވެރިންގެ އަދަދު ރަނގަޅު މިންވަރަކަށް އިތުރުވެގެންދާނެއެވެ.

މިއަހަރުގެ ޖެނުއަރީ މަހުން ފެށިގެން ނޮވެމްބަރުގެ ނިޔަލަށް ފަރަންސޭސިވިލާތުން ރާއްޖެއަށް ޒިޔާރަތްކޮށްފައި ވަނީ 36،900 ފަތުރުވެރިންނެވެ. މިއީ 3 އިންސައްތައިގެ ކުރިއެރުމެކެވެ. އަދި މިއީ 2011ވަނަ އަހަރަށްފަހު ފަރަންސޭސިވިލާތުން އަންނަ ފަތުރުވެރިންގެ އަދަދު ދަށްވުމަށްފަހު، އަނެއްކާވެސް މައްޗަށް ޖެހިލާ ފުރަތަމަ އަހަރެވެ.

ޑައިރެކްޓް ފްލައިޓްތަކާއެކު ފަރަންސޭސީވިލާތުގެ ޓްރެވެލް އެޖެންސީތަކުން ގެންދަނީ ރާއްޖޭގެ ގިނަ ރިޒޯޓްތަކަކާއެކު އެއްބަސްވުންތައް ހަދަމުންނެވެ.

ޕެރިހުން މާލެއަށް ހަފްތާއަކު 2 ފްލައިޓް ބާއްވައެވެ. މިއީ ގާތްގަނޑަކަށް 10 ގަޑިއިރުގެ ފްލައިޓެކެވެ. އަދި ރާއްޖެއަށް ބާއްވާ ޑައިރެކްޓް ފްލައިޓްތަކަށް ބޭނުންކުރަނީ ބޮއިން 777 މަރުކާގެ މަތިންދާ ބޯޓެވެ.