މެލޭޝިއާގެ ބޮޑުވަޒީރު ނަޖީބު ރައްޒާގު ރާއްޖެއަށް ކުރައްވަމުންގެންދަވާ ދަތުރުފުޅުގައި، ބުދަ ދުވަހު ރައީސް އޮފީހުގައި ދެއްވި ގުޅިފައިވާ ބަޔާނުގައި ރައީސް ޔާމީން ވިދާޅުވީ ދުނިޔެއަށް ކުރިމަތިވެފައިވާ ޓެރަރިޒަމުގެ ނުރައްކާ, މެލޭޝިއާއާއި ރާއްޖެއަށް ކުރިމަތިވެފައިވާ މިންވަރާ ގުޅޭ ގޮތުން މަޝްވަރާ ކުރައްވާފައިވާނެ ކަމަށެވެ.
ރައީސް ޔާމީން ވިދާޅުވީ ހައްދުފަހަނައަޅައި ދިއުމާއި ޓެރަރިޒަމާ ދެކޮޅަށް ދެގައުމުން ކުރާ މަސައްކަތް އިތުރަށް ވަރުގަދަ ކުރަންޖެހޭ ކަމަށް މެލޭޝިއާގެ ބޮޑުވަޒީރާއެކު އެއްބަސްވެވަޑައިގެންނެވުނު ކަމަށެވެ.
މެލޭޝިއާގެ ބޮޑުވަޒީރު ނަޖީބު ރައްޒާގުގެ ވާހަކަފުޅުގައިވެސް ވަނީ ޓެރަރިޒަމުގެ ނުރައްކާ ކުރިމަތިވެފައިވާ މިންވަރު ފާހަގަކުރައްވާފަ އެވެ. ނަޖީބު ވިދާޅުވީ މެލޭޝިއާއަކީ އިސްލާމިކް ސްޓޭޓް(އައިއެސް) ނުރައްކާތެރިކަން އެންމެ ބޮޑަށް ކުރިމަތިވެފައިވާ އެއް ގައުމު ކަމަށެވެ. ހަނގުރާމަވެރި ޖަމާއަތްތަކުގެ ހަމަލާތަކުން ދުރާލައި ރައްކާތެރިވުމަށް މެލޭޝިއާއިން އަޅާފައިވާ ފިޔަވަޅުތަކާ ގުޅޭގޮތުން ރައީސް ޔާމީނާއެކު މަޝްވަރާކުރެއްވި ކަމަށް ނަޖީބު ވިދާޅުވި އެވެ.
ނަޖީބު ވިދާޅުވި ގޮތުގައި ހައްދުފަހަނައެޅުމާއި ޓެރަރިޒަމާ ދެކޮޅަށް ދުނިޔޭގެ ފެންވަރުގައި އަދި ސަރަަހައްދީ ފެންވަރުގައި މަސައްކަތްކުރާނަމަ އެކަންތައްތަކާ އެންމެ ފުރިހަމައަށް ކުރިމަތިލެވޭނެކަން ޔަގީނެވެ.
ރާއްޖެއާއި މެލޭޝިއާއަށްވެސް ވަނީ ޓެރަރިޒަމުގެ ނުރައްކާ ކުރިމަތިވެފަ އެވެ. އެގޮތުން، އިސްލާމިކް ސްޓޭޓާއި ޖަބްހަތުލް ނުސްރާ ފަދަ ޖަމާއަތްތަކާއެކު ދެގައުމުގެ ގިނަ އަދަދެއްގެ ރައްޔިތުންތަކެއް ދަނީ ހަނގުރާމަކުރަމުންނެވެ. މީގެ އިތުރުން، ޓެރަރިސްޓް ހަމަލާ ދިނުމަށް ރޭވުމުގެ ތުހުމަތުގައި ދެގައުމުންވެސް ބަޔަކު ހައްޔަރުކޮށްފައިވެއެވެ.
