ތިން ދާއިރާއަކުން ރާއްޖެއާ ގުޅުން ބަދަހި ކުރައްވާނެ ކަމަށް ވަނީ ވިދާޅުވެފައި
މެލޭޝިޔާގެ ބޮޑުވަޒީރު ނަޖީބު ރައްޒާގާއި އެމަނިކުފާންގެ އަނބިކަބަލުން ރާއްޖެ ވަޑައިގަންނަވަނީ
ޓުއަރިޒަމްގެ ދާއިރާއިން ރާއްޖެއާ ގުޅުން ބަދަހިކުރާނެ ކަމަށް މެލޭޝިޔާގެ ބޮޑުވަޒީރު ނަޖީބު ރައްޒާގު ވިދާޅުވެއްޖެއެވެ.
ދެ ދުވަހުގެ ރަސްމީ ދަތުރުފުޅަކަށް މެލޭޝިޔާގެ ބޮޑުވަޒީރު ނަޖީބުގެ ދެކަނބަލުން އަންގާރަ ދުވަހުގެ ހަވީރު ރާއްޖެ ވަޑައިގެންނެވީ، ރައީސް އަބްދުﷲ ޔާމީނާއި އެމަނިކުފާންގެ އަނބިކަބަލުން ފާތިމަތު އިބްރާހިމްގެ ދައުވަތަކަށެވެ.
ރާއްޖެ ވަޑައިގަތުމަށް ފަހު ނަޖީބު ރައްޒާގު މެލޭޝިޔާ ބަހުން ކުރެއްވި ޓްވީޓެއްގައި ވިދާޅުވެފައި ވަނީ މަތީ ތައުލީމާއި ސިއްހީ ދާއިރާ އަދި ޓުއަރިޒަމްގެ ދާއިރާއިން މެލޭޝިޔާ އިން ރާއްޖެއާ ގުޅުން ބަދަހި ކުރާނެ ކަމަށެވެ. އަދި އެނޫން ދާއިރާތަކުން ވެސް ގުޅުން ބަދަހިކުރާނެކަން ވަނީ ފާހަގަކުރައްވާފައެވެ.
މި ދަތުރުފުޅުގައި ދެ ގައުމުގެ ދެމެދު ރަސްމީ ވާހަކަތައް އޮންނާނީ ބުދަ ދުވަހެވެ.
މައުލޫމާތު ލިބިފައިވާ ގޮތުގައި މި ދަތުރުފުގައި ދެ ގައުމުގެ ދެމެދުގެ ގުޅުން އިތުރަށް ބަދަހި ކުރުމަށް ކުރެވެން ހުރި ކަންކަމާ ގުޅޭ ގޮތުން މަޝްވަރާކުރުމާއި ބައެއް އެމްއޯޔޫތަކުގައި ސޮއި ކުރުމަށް ވަނީ ހަމަޖެހިފައެވެ.
ނަޖީބު ރައްޒާގު ރާއްޖެ ވަޑައިގެންނެވި އިރު، މެލޭޝިޔާގެ ބޮޑުވަޒީރަކު ރާއްޖެ ވަޑައިނުގަންނަވާތާ 33 އަހަރުވެއްޖެ އެވެ. އެންމެ ފަހުން މެލޭޝިޔާގެ ބޮޑުވަޒީރަކު ރާއްޖެ ވަޑައިގެންނެވީ ރައީސް މައުމޫން އަބްދުލްގައްޔޫމުގެ ވެރިކަމުގައި 1984 ވަނަ އަހަރުއެވެ. އެއިރު އެގައުމުގެ ބޮޑުވަޒީރުގެ ހައިސިއްޔަތުން ރާއްޖެ ވަޑައިގެންނެވީ މަހާތީރު މުހައްމަދެވެ.
