ދެ ސްޓޭޓެއްގެ އިންތިޚާބު ކާމިޔާބުކޮށް، އިންޑިއާގެ ބީޖޭޕީ ބާރު ދަމަހައްޓައިފި

އިންޑިއާގެ ދެ ސްޓޭޓެއް ކަމަށްވާ ހިމާޗަލް ޕްރަދޭޝް އާއި ގުޖުރާތުގައި ހޯމަ ދުވަހު ބޭއްވި ސްޓޭޓް އިންތިޚާބުތައް ކާމިޔާބުކޮށް، ވެރިކަންކުރާ ބާރަތިޔާ ޖަނަތަ ޕާޓީ (ބީޖޭޕީ) ބާރު ދަމަހައްޓައިފިއެވެ.

ބޮޑުވަޒީރު ނަރެންދްރަ މޯދީ އެސްޓޭޓަކަށް ނިސްބަތްވެވަޑައިގަންނަވާ ގުޖުރާތުގެ ސަރަހައްދީ ޤާނޫނު ހަދާ މަޖިލީހުގެ 182 ގޮނޑީގެ ތެރެއިން 100 އަށްވުރެ ގިނަ ގޮނޑި ކާމިޔާބުކުރީ ބީޖޭޕީ އިންނެވެ. މެޖޯރިޓީ ނެގުމަށް ބޭނުން ވަނީ 92 ގޮނޑިއެވެ. ހިމާޗަލް ޕްރަދޭޝްގެ ސަރަހައްދީ ޤާނޫނު ހަދާ މަޖިލީހުގެ ވެސް މެޖޯރިޓީ ގޮނޑިތައް ބީޖޭޕީ އިން ވަނީ ކާމިޔާބުކޮށްފައެވެ.

މި ކާމިޔާބީއާ ގުޅިގެން މޯދީ ވަނީ އެ ދެ ސްޓޭޓްގެ ރައްޔިތުންނަށް ޝުކުރު އަދާކުރައްވާފައެވެ. އަދި ރައްޔިތުން ޚިޔާރުކުރީ ތަރައްޤީގެ މަގު ކަމަށް މޯދީ ސިފަކުރެއްވިއެވެ. ވެރިރަށް ދިއްލީގައި ހުންނަ ބީޖޭޕީގެ މައި އޮފީހުގައި ޕާޓީގެ މެމްބަރުންނާ މުޚާޠަބުކުރައްވައި މޯދީ ވިދާޅުވީ އިންތިޚާބުގެ ނަތީޖާއިން ދައްކައިދެނީ ރައްޔިތުން ތިބީ ބަދަލަކަށް ބޭނުންވެފައި ކަމަށެވެ. އަދި 1989 ވަނަ އަހަރުން ފެށިގެން ކޮންމެ އިންތިޚާބެއްގައި ވެސް ގުޖުރާތުގައި ބީޖޭޕީ އިން ހޯދަމުންދާ ކާމިޔާބީ މޯދީ ފާހަގަކުރެއްވިއެވެ.

މި އިންތިޚާބުން އިދިކޮޅު ކޮންގްރެސް ޕާޓީ ބަލިވި ނަމަވެސް، މިއީ ދާދި ފަހުން އެޕާޓީގެ ރިޔާސަތާ ހަވާލުވި ރާހުލް ގާންދީއަށް ކުރިމަތިވި ނާކާމިޔާބީއެއް ނޫން ކަމަށް ބައެއް ފަރާތްތަކުން ބުނެއެވެ. އެގޮތުން ބޮޑުވަޒީރު މޯދީގެ އުފަން ސްޓޭޓް އަދި ބީޖޭޕީގެ ބާރު ގަދަ ގުޖުރާތުގެ ޤާނޫނު ހަދާ މަޖިލީހުގެ 70 އަށް ވުރެ ގިނަ ގޮނޑި ކޮންގްރެސް އިން މިފަހަރު ކާމިޔާބުކުރިއިރު، މިއަދަދަށް އެސްޓޭޓުން އެޕާޓީއަށް މީގެ ކުރިން މިހާވަރަށް ގޮނޑި ކާމިޔާބުވެފައެއް ނުވެއެވެ.

އިންޑިއާގެ ޢާއްމު އިންތިޚާބު 2019 ވަނަ އަހަރު އޮންނަ އިރު، އަންނަ އަހަރު އިތުރު ދެ ސްޓޭޓެއްގެ އިންތިޚާބު އޮންނާނެއެވެ. ކޮންގްރެސްގެ އަމާޒަކަށްވެފައި ވަނީ އާއްމު އިންތިޚާބުގެ ކުރިން ސްޓޭޓް އިންތިޚާބުތަކުގައި ބީޖޭޕީ ބަލިކޮށް، އެޕާޓީގެ ބާރު ކަނޑުވާލުމަށެވެ. އެހެން ނަމަވެސް މިފަހަރުގެ އިންތީޚާބުން ބަލިވުމުން އެޕާޓީއަށް އިތުރު ޕްރެޝަރުތަކެއް ކުރިމަތިވާނެއެވެ.

ދާދި ފަހުން އިންޑިއާގެ ޓެކްސްގެ ނިޒާމަށް ގެނައި ބަދަލާ ގުޅިގެން ސަރުކާރަށް ފާޑުކިޔުންތައް އަމާޒުވިއިރު، މި ބަދަލުތަކުގެ ސަބަބުން އެންމެ ބޮޑު އަސަރެއް ކުރަނީ ކުދި ވިޔަފާރިވެރިންނަށެވެ. ކުދި ވިޔަފާރިވެރިންގެ އާބާދީއަކީ ބޮޑުވަޒީރު މޯދީއަށް މުހިއްމު ބައެކެވެ.

ކޮންގްރެސްގެ ރިޔާސަތާ ރާހުލް ގާންދީ ހަވާލުވެ، މަޤާމުގެ މަސްއޫލިއްޔަތުތަކާ ރަނގަޅަށް ހަވާލުވެވަޑައިނުގެންނެވި އުޅުއްވަނިކޮށް އިންތިޚާބުން ކޮންގްރެސް ޕާޓީ ބަލިވި ނަމަވެސް، ކުރިއަށް މިއޮތް ދުވަސްތަކުގައި ބަދަލު ފެންނާނެ ކަމަށް އެޕާޓީގެ އާއްމު މެމްބަރުން ޤަބޫލުކުރެއެވެ.