ކުރީގެ ޑިފެންސް މިނިސްޓަރު މުހައްމަދު ނާޒިމް ހުކުމް ތަންފީޒުކުރައްވަމުން ގެންދަވާ ޖަލުގޮޅި މަރާމާތު ކުރުމަށް ގެއަށް ބަދަލުކޮށްފި އެވެ.

ނާޒިމް ގެއަށް ބަދަލުކޮށްފައި ވަނީ ބުރާސްފަތި ދުވަހުގެ ހަވީރު 4:15 ހާއިރު އެވެ.

މޯލްޑިވްސް ކަރެކްޝަނަލް ސަރވިސް އިން މައުލޫމާތު ދޭ ގޮތުގައި، ނާޒިމް ގޭބަންދަށް ބަދަލުކުރީ މާފުށީ ޖަލުގައި ނާޒިމް ހުކުމް ތަންފީޒުކުރައްވަމުން ގެންދަވާ ޖަލުގޮޅި މަރާމާތު ކުރުމަށެވެ.

ނާޒިމް ބުރާސްފަތި ދުވަހު ގޭބަންދަށް ބަދަލުކޮށްފައި މިވަނީ، ނާޒިމާ މެދު ސަރުކާރުން އަމަލުކުރަމުންދާ ގޮތުގެ މައުލޫމާތު އދ. ގެ އިންސާނީ ހައްގުތަކާ ބެހޭ ކޮމިޝަނަރު ޒައިދު ރާދުއަލް ހުސައިން އަށް ބުދަ ދުވަހު އަރުވާފައިވަނިކޮށެވެ. އދ. ގެ އިންސާނީ ހައްގުތަކާ ބެހޭ ކޮމިޝަނަރާ އެ މައުލޫމާތު ހިއްސާކުރެއްވީ ނާޒިމްގެ ކޮއްކޮ އާދަމް އާޒިމެވެ.

އދ. ގެ ވޯކިންގ ގްރޫޕް އޮން އާބިޓްރަރީ ޑިޓެންޝަނުން ވަނީ ނާޒިމްގެ މައްޗަށް ހިންގި ޝަރީއަތުގައި އިޖުރާއަތްތައް ފުރިހަމަކޮށްފައި ނުވާ ކަމާއި، ސިޔާސީ އަދި މަދަނީ ހައްގުތަކާ ބެހޭ ބައިނަލްއަގުވާމީ މުއާހަދާ އާއި އިންސާނީ ހައްގުތަކާ ބެހޭ ބައިނަލްއަގުވާމީ މުއާހަދާއާ ޚިލާފަށް ޝަރީއަތުގައި ގިނަ ކަންތައްތަކެއް ކޮށްފައިވާކަން ފާހަގަކޮށް ނާޒިމް ވަގުތުން މިނިވަން ކުރުމަށް ދިވެހި ސަރުކާރަށް ގޮވާލާފަ އެވެ. 

ނާޒިމް މިނިވަންކުރުމުގެ އިތުރުން، ނުހައްގުން ޖަލުގައި ބަންދުކުރުމުގެ ސަބަބުން ލިބުނު ގެއްލުމުގެ ބަދަލު ނަގައިދިނުމަށް ވެސް އދ. ގެ ވޯކިންގ ގްރޫޕުން ސަރުކާރަށް ގޮވާލާފައިވެއެވެ.

ނާޒިމް 11 އަހަރަށް ޖަލަށްލާފައި ވަނީ، އޭނާ ދިރިއުޅުއްވި އެޕާޓްމެންޓުން ހަތިޔާރު ފެނުނު ކަމަށް ބުނާ މައްސަލައިގައި 2015 ވަނަ އަހަރުގެ މާޗް 27 ގައެވެ. އެހެންނަމަވެސް، ޝަރީއަތުގެ ފުރަތަމަ ދުވަހުން ފެށިގެން ނާޒިމްގެ ފަރާތުން ބުނަމުން ދިޔައީ އެ ހަތިޔާރާ އެއްވެސް ގުޅުމެއް ނެތް ކަމަށާއި އެއީ ފްރޭމްކޮށް ލަނޑެއް ދިނުމުގެ ބޭނުމުގައި ބަޔަކު މީހުން ވެއްދި އެއްޗެއް ކަމަށެވެ.

ނާޒިމްގެ އެޕާޓްމެންޓުން ފެނުނު ހަތިޔާރުން އޭނާ އާއި އާއިލާގެ އެއްވެސް ބޭފުޅެއްގެ ޑީއެންއޭ ފެނިފައެއް ނުވެއެވެ. އެހެންނަމަވެސް، ކުރީގެ ނާއިބު ރައީސް އަހުމަދު އަދީބުގެ ޑީއެންއޭ،  ހަތިޔާރުން ފެނިފައިވާ ކަމަށް ފުލުހުން އިއުތިރާފުވެފައިވެއެވެ. 

މިހާރު 33 އަހަރުގެ ޖަލު ހުކުމްތަކެއް ތަންފީޒުކުރައްވަމުން ގެންދަވާ އަދީބު ވެސް ވަނީ އެ ހަތިޔާރާއި ނާޒިމާ އެއްވެސް ގުޅުމެއް ނެތް ކަމަށް ވިދާޅުވެފައެވެ. މިއަހަރުގެ ޖޫން މަހު ސުޕްރީމް ކޯޓަށް އަދީބު ފޮނުއްވި ސިޓީއެއްގައި ވިދާޅުވީ ނާޒިމް އުޅުއްވި އެޕާޓްމެންޓުން ފިސްތޯލައަކާއި ތިން ވަޒަން ފެނުނު މައްސަލައިގެ ހަގީގަތާއި އެކަން ހިނގައިދިޔަ ގޮތް ނުހަނު ރަނގަޅަށް އެނގޭ ކަމަށާއި ނާޒިމްގެ ކޮޓަރިން ފެނުނު އެ ތަކެއްޗަކީ ނާޒިމްގެ އެއްޗެހި ނޫން ކަމަށެވެ.

މިހާދިސާ ހިނގަން މެދުވެރިވި ސަބަބާއި އެ ރޭވުން ފެށިގެން އައި ގޮތާއި އެކަމުގައި ބައިވެރިވި މީހުންނާއި އެކަން ނިމިގެންދިޔަ ގޮތް ވަރަށް ރަނގަޅަށް އެނގިވަޑައިގަންނަވާ ކަމަށް ވެސް އަދީބު ވިދާޅުވެފައިވެއެވެ.

ރާއްޖޭގެ ޝަރުއީ ކޯޓެއްގައި ނާޒިމްގެ މައްސަލައިގެ ހަގީގަތް ހާމަކުރުމުގެ ފުރުސަތު ލިބިއްޖެ ނަމަ ނާޒިމްގެ މައްޗަށް ރޭވިގެން އޭނާ ފްރޭމް ކުރެވުނު ކަންތައްތަކުގެ ތަފްސީލު ހިއްސާކުރާނެ ކަމަށް އަދީބުގެ ސިޓީގައި ހާމަކުރެ އެވެ. އަދި ޝަރުއީ ހަމަތަކުގެ މަތިން އެކަން ހާމަކުރުމަށް ތައްޔާރަށް ހުރި ކަމަށް ވެސް ބަޔާންކޮށްފައި ވެއެވެ.