މިޔަންމާ ސިފައިން އެއް މަސްދުވަހުގެ ތެރޭ 6،700 މީހުން މަރާފައިވޭ: އެމްއެސްއެފް
14 ޑިސެމްބަރު 2017 | ބުރާސްފަތި 15:40މިޔަންމާ ސިފައިން ހިންގާފައިވަނީ ޖަރީމާއެެއްކަމަށް އދންވެސް ވަނީ ބުނެފައި
ރޮހިންޖާ މުސްލިމުން ސަރަހައްދީ ރޮނގު ހުރަސްކޮށް ބަންގްލަދޭޝްއަށް ދަތުރުކުރަނީ
މިޔަންމާގެ ރަޚައިން ސްޓޭޓްގައި އެގައުމުގެ ސަރުކާރުން އޯގަސްޓްމަހުގެ ފަހުކޮޅުން ފެށިގެން ހިންގި އޮޕަރޭޝަނުގައި އެއް މަސްދުވަހުގެ ތެރޭގައި މަދުވެގެން 6،700 (ހަ ހާސް ހަތް ސަތޭކަ) މީހުން މަރާލާފައިވާކަމަށް ޑޮކްޓަރސް ވިތައުޓް ބޯޑަރސް (އެމްއެސްއެފް)އިން ބުނެފިއެވެ.
އެމްއެސްއެފްގެ ރިޕޯޓެއްގައި ބުރާސްފަތިދުވަހު ހާމަކޮށްފައިވާ އަދަދުތައް، ހަމަ އެ ދުވަސްވަރުގެ އަދަދުތައް ކަމަށްބުނެ މިޔަންމާގެ އަސްކަރިއްޔާއިން ހާމަކޮށްފައިވާ އަދަދުތަކާއި އަޅާ ކިޔާއިރު، އެމްއެފްއެސްގެ ރިޕޯޓްގައި ބުނާގޮތުން މަރާލެވުނު މީހުން ގިނައެވެ.
އެމްއެސްއެފްގެ މެޑިކަލް ޑިރެކްޓަރ ސިޑްނީ ވޮންގް ވިދާޅުވި ގޮތުގައި އެ ޖަމާއަތުން އަދަދުތައް ހޯދާފައިވަނީ ހަ ސަރވޭއެއްގައި، މިޔަންމާގެ ސިފައިންގެ އަތްދަށުން ސަލާމަތްވި 6 ލައްކައަށްވުރެ ގިނަ މީހުންނާއި ސުވާލުކޮށްގެން ކަމަށެވެ.
މީގެ ތެރެއިން ގިނަ ރެފިއުޖީން މިހާރު ދިރިއުޅެމުން ގެންދަނީ މިޔަންމާއާއި ބަންގްލަދޭޝް ގުޅޭ ސަރަހައްދީ ރޮނގުގައި ތޮއްޖެހި، ސާފުތާހިރުކަން ގެއްލިފައިވާ ކޭމްޕްތަކުގައެވެ.
ވޮންގް ވިދާޅުވީ މަރުވި މީހުންގެ ހަގީގީ އަދަދު އެނގުން ނާދިރުކަމަށެވެ. އޭގެ ސަބަބަކީ ބަންގްލަދޭޝްގައި ދިރިއުޅެން ފެށި ރޮހިންޖާ ރެފިއުޖީންވެސް ސަރވޭގައި ހިމަނާފައި ނުވުމެވެ.
އެ ރިޕޯޓްގައި ބުނެފައިވާގޮތުގައި އޯގަސްޓްމަހުގެ 25ން ސެޕްޓެމްބަރުމަހުގެ 24 އާ ދެމެދު ރަޚައިން ސްޓޭޓްގައި ރޮހިންޖާ ދަރިކޮޅުގެ 9،000 އެއްހާ މީހުން މަރާލެވިފައިވެއެވެ. އޭގެ ތެރެއިން 71.7 އިންސައްތައަކީ ސީދާ ހަމަނުޖެހުމުގެ ތެރޭގައި މަރުވި މީހުންނެވެ.
އދން ސިފަކުރާގޮތުން ނަސްލު ނައްތާލުމަށް ހިންގާފައި މި ހަމަނުޖެހުމާ ގުޅިގެން 620،000 (ހަ ލައްކަ ވިހި ހާސް) ރޮހިންޖާ މީހުންވަނީ ގައުމު ދޫކޮށް ގޮސްފައެވެ.
މިޔަންމާގެ އަސްކަރިއްޔާއިން ބުނާގޮތުގައި އެ ގައުމުން ހިންގާފައިވަނީ ހަނގުރާމަވެރިންނާ ދެކޮޅު އޮޕަރޭޝަނެކެވެ.
