އައިޓީބީ ފެއާގައި އަތްތެރި މަސައްކަތްތެރިކަން ދައްކުވާދޭނެ ފަރާތެއް ހޯދަނީ
މިއަހަރުގެ ފެއާގައި 88 ކުންފުނިން ބައިވެރިވެފައިވޭ
އައިޓީބީ ފެއާ
އަންނަ އަހަރުގެ ޖަރުމަނުވިލާތުގެ ބަރލިންގައި ބާއްވާ އައޓީބީ ފެއާގައި ސަގާފީ އަތްތެރި މަސައްކަތް ދައްކުވާދޭނެ ފަރާތެއް ހޯދުމަށް އަނެއްކާވެސް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް (އެމްއެމްޕީއާރްސީ) އިން އިއުލާނުކޮށްފި އެވެ.
އެމްއެމްޕީއާރްސީ އިން އާންމުކޮށްފައިވާ އިއުލާނުގައި ބުނެފައިވަނީ އަންނަ މާޗް މަހުގެ 7 އިން 11 ގެ ނިޔަލަށް ބަރލިންގައި ބާއްވާ އައިޓީބީ ފެއާގައި ސަގާފީ އަތްތެރި މަސައްކަތުގެ ހުނަރު ދައްކުވައިދޭނެ ފަރާތެއް ބޭނުންވެގެން ކުރެވުނު އިއުލާނަށް އެކަށީގެންވާ ތަރުހީބެއް ލިބިފައި ނުވާތީ އެ އިއުލާން ބާތިލްކޮށް އަލުން ފުރުސަތު ހުޅުވާލާ ކަމަށެވެ.
މި މަސައްކަތް ކޮށްދިނުމަށް ޝައުގުވެރިވާ ފަރާތްތަކުން މިމަހުގެ 17 ވަނަ ދުވަހުގެ ހެނދުނު 10:00 އަށް އެ ކޯޕަރޭޝަނަށް ވަޑައިގެން މައުލޫމާތު ސާފުކުރަންޖެހެ އެވެ. އަދި ޕްރޮޕޯސަލް ހުށަހެޅުމުގެ އެންމެ ފަހު ތާރީހަކީ މިމަހުގެ 21 ވަނަ ދުވަހެވެ.
މިއަހަރުގެ އައިޓީބީ ފެއާ ކުރިއަށް ގެންގޮސްފައިވަނީ މާޗު މަހުގެ 8 ން 12 އަށެވެ. އެ ފެއާގައި 88 ކުންފުނިން 260 ބައިވެރިން ބައިވެރިވެފައިވެ އެވެ. އައިޓީބީ ފެޔަރގައި ފަތުރުވެރިކަމުގެ ދާއިރާ ޕްރޮމޯޓްކުރުމަށް ގިނަ ގައުމުތަކަކުން ކޮންމެ އަހަރަކުވެސް ބައިވެރިވެ އެވެ.
