އައިޓީބީ ފެއަރގައި ރާއްޖޭގެ 105 ކުންފުންޏަކުން ބައިވެރިވާ ކަމަށް މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ބުނެފިއެވެ.
މި ފެއަރ ކުރިއަށްދާނީ މާރޗް 6 ވަނަ ދުވަހުން 10 ވަނަ ދުވަހަށް ޖަރުމަންވިލާތުގެ ބާލިންގައެވެ.
ރާއްޖެއެމްވީއަށް މައުލޫމާތު ދެއްވަމުން އެ ކުންފުނީގެ އެސިސްޓަންޓް ޑިރެކްޓަރު ރީނާ އަބްދުލް ވާހިދު ވިދާޅުވީ ފެއަރގައި 260 ރެޕްރެޒެންޓޭޓިވުން ބައިވެރިވާ ކަމަށާއި ފެއަރ ފެށޭ ފުރަތަމަ ދުވަހު ހުރިހާ މީޑިއާތަކަށް ނޫސްވެރިންގެ ބައްދަލުވުމެއް ބާއްވާނެ ކަމަށެވެ.
ރާއްޖޭގެ ސަޤާފަތް ދައްކުވައިދޭ ގިނަ ކަންތައްތައް ރާއްޖޭގެ ސްޓޭންޑުން ފެންނަ ހުންނާނެކަން ފާހަގަކުރައްވާ ރީނާ ވިދާޅުވީ ބޮޑުމަހުގެ ކުޅިވަރުތަކާއި ދިވެހި ކެއުންތަކުގެ ރަހަތައް ތަޖުރިބާ ކުރުމުގެ އިތުރުން ދިވެހި ކެއްކުންތައް ވަގުތުން ތައްޔާރުކުރުމުގެ ހަރަކާތްތަކެއް ކުރިއަށްދާނެ ކަމަށެވެ. އަދި ލިޔެލާ ޖެހުމާއި ކަސަބު ވިޔުމުގެ އިތުރުން ރޯނު ވެށުން ވެސް ރާއްޖޭގެ ސްޓޭންޑުން ފެނިގެންދާނެ ކަމަށް އޭނާ ވިދާޅުވިއެވެ.
މީގެ އިތުރުން ފެއަރގެ ފަހު ދެ ދުވަސް ވިޒިޓަރުންނަށް ހާއްސަކުރެވިފައި ވާނީ ރާއްޖެއާ ބެހޭ ގިނަ ގުނަ މައުލޫމާތު ފޯރުކޮށްދެވިގެންދާނެ ކަމަށް އެމްއެމްޕީއާރްސީން ބުންޏެވެ.
މިފަހަރުގެ ފެއާގައި ރާއްޖޭގެ ކޮންޓިންޖެންޓުގައި އިސްކޮށް ހުންނަވާނީ ނާއިބު ރައީސް ފައިސަލް ނަސީމެވެ. މީގެ އިތުރުން ޓޫރިޒަމް މިނިސްޓަރު އަލީ ވަހީދާއި އެމްއެމްޕީއާރުސީގެ އެމްޑީ ތޮއްޔިބު މުހައްމަދު އަދި ރާއްޖެއިން ޖަރުމަނަށް ކަނޑައަޅާފައި ހުންނަވާ ސަފީރު އަހުމަދު ލަތީފް ބައިވެރިވެވަޑައިގަންނަވާނެއެވެ.
