އައު ވޭރިއަންޓާ ގުޅިގެން އައިޓީބީ 2022ށް ބަދަލުތަކެއް
ފެއަރގެ އެންމެ ބޮޑު އިވެންޓް ކެންސަލް ކުރިނަމަވެސް އޮންލައިންކޮށް ހަރަކާތްތައް ކުރިއަށްދާނެ
އައިޓީބީ ފެއަރއެއްގެ ތެރެއިން
ކޮވިޑްގެ އައު ވޭރިއަންޓާއެކު ބާލިންގައި ބާއްވާ ފަތުރުވެރިކަމުގެ އެންމެ ބޮޑު ފެއަރ، އައިޓީބީ ފެއަރ 2022 އޮންލައިންކޮށް ބާއްވަން ނިންމައިފިއެވެ.
މިއީ އައިޓީބީ ފެއަރއަށް އެގްޒިބިޓަރުން ހާޒިރުވެގެން ފެއަރ ބޭއްވުން ކެންސަލް ކުރި ދެވަނަ ފަހަރެވެ. 2020 ވަނަ އަހަރުގައި ވެސް ފެއަރ ފެށުމަށް ހަފްތާއަކަށް ވެފައި ވަނިކޮށް ކެންސަލް ކުރީ ކޮވިޑްގެ ހާލަތު ގޯސްވެ ގައުމުތައް ބަންދުކުރަން ޖެހުނު ހިސާބުންނެވެ.
އައިޓީބީ އިންތިޒާމްކުރާ ފަރާތުން ބުނެފައިވަނީ 2022 ވަނަ އަހަރު ބާއްވާ އައިޓީބީ ބަރލިން 2022 ބާއްވަން ކުރިން އިންތިޒާމް ކުރި ގޮތަށް ނުބާއްވާނެ ކަމަށެވެ. އަދި އިން-ޕާރސަން ނުވަތަ އެގްޒިބިޓަރުން ފެއަރއަށް އައިސްގެ ބޭއްވުމަށް ހަމަޖެހިފައިވާ ބައި ކެންސަލް ކުރަން ޖެހިފައިވާ ކަމަށާއި، އެކަމާ ގުޅިގެން އެގްޒިބިޓަރުންނަށް އަންގަންޖެހޭ ކަންކަން އަންގަމުންދާނެ ކަމަށެވެ. ނަމަވެސް ކުރީ އަހަރެކޭ އެއްގޮތަށް އޮންލައިންކޮށް ފެއަރގެ ކަންކަން ކުރިއަށްގެންދާނެ ކަމަށެވެ.
އިންތިޒާމް ކުރާ ފަރާތުން ބުނެފައިވަނީ ފެއަރގެ އެންމެ މުހިންމު ބައި ކެންސަލް ކުރަން ޖެހުނީ ކޮވިޑްގެ ބަލިމަޑުކަމާ ގުޅިގެންނާއި، އެއްގައުމުން އަނެއް ގައުމަށް ދަތުރުކުރުމުގައި އަޅާފައިވާ ހަރުކަށި ފިޔަވަޅުތަކާއި، ފެއަރގައި ބައިވެރިވޭވެނެ މީހުންގެ އަދަދާ ގުޅިގެން ކަމަށެވެ. ނަމަވެސް މި ހާލަތުގައި ވެސް ފެއަރގެ ކަންކަން ކުރިއަށްގެންދެވޭނެ ހާލަތެއް މެދުވެރިވޭތޯ ގިނަ މަސައްކަތްތަކެއް ކުރެވުނު ކަމަށެވެ. މި ވަގުތު އިންޑަސްޓްރީއަށް ބޭނުންވަނީ މަޝްވަރާ ކުރުން ކަމަށާއި، ކޮންވެންޝަން ލައިވް ސްޓްރީމް ކުރެވޭނެ ކަމަށާއި، ޑިޖިޓަލް ބިޒްނަސް ޑޭ އަދި ރީޖަލް ޓްރެވެލް ވެސް ލައިވް ކުރެވޭނެ ކަމަށެވެ.
މީގެ އިތުރުން އަހަރުގެ ތެރޭގައި އިންޑަސްޓްރީއަށް މުހިންމު އަދި ބޭނުންތެރި ބައިތައް ހިމެނޭނެ ކަމަށާއި، ވިޔަފާރިއާ ގުޅުންހުރި ފުރުސަތުތައް ވެސް އަހަރުގެ ތެރޭގައި ކުރިއަށްދާނެ ކަމަށެވެ.
ފެއަރ އިންތިޒާމް ކުރާ ފަރާތުން ބުނީ ސްޓޭންޑްތަކުގެ ބުކިންތައް ކެންސަލް ކުރެވިގެންދާނެ ކަމަށާއި، އަދި ފައިސާ އެފަރާތްތަކަށް އަނބުރާ ދެމުންދާނެ ކަމަށެވެ.
މި ފެއަރއަކީ ރާއްޖެއިން ބޭރުގައި ބާއްވާ ފަތުރުވެރިކަމުގެ ފެއަރތަކުގެ ތެރެއިން ރާއްޖެއިން ބައިވެރިވަމުން އަންނަ އެންމެ ބޮޑު އެއް ފެއަރއެވެ.
