ނަރުހުން ނުލިބިގެން އަނެއްކާވެސް އިއުލާންކޮށްފި
12 ޑިސެމްބަރު 2017 | އަންގާރަ 03:52ކުރިންވެސް 631 ނަރުހުން ހޯދަން އިއުލާންކުރި
އިންދިރާ ގާންދީ މެމޯރިއަލް ހޮސްޕިޓަލް
ރާއްޖޭގެ ހުރިހާ ސަރަހައްދެއްގެ ހޮސްޕިޓަލްތަކަށް 631 ރަޖިސްޓަރޑް ނަރުހުން ހޯދަން ހެލްތު މިނިސްޓްރީއިން އިއުލާންކުރިތާ މަހެއްހާ ދުވަސްވީތަނާ، އަނެއްކާވެސް 600އަށްވުރެ ގިނަ ނަރުހުން ހޯދަން އިއުލާންކޮށްފިއެވެ.
ހެލްތު މިނިސްޓްރީއިން ހޯމަ ދުވަހު އިއުލާނުކޮށްފައިވަނީ 609 ރަޖިސްޓަރޑް ނަރުހުން ހޯދުމަށެވެ. ކުރީ ފަހަރު 631 ނަރުހުން ހޯދަން އިއުލާންކޮށްފައިވަނީ ނޮވެމްބަރު 4 ވަނަ ދުވަހުއެވެ. އެފަހަރު ވަޒީފާއަށް އެދުމަށް ކަނޑައަޅާފައިވާ ސުންގަޑިއަކީ ހުސްވި ނޮވެމްބަރު މަހުގެ 15ވަނަ ދުވަހެވެ. މިފަހަރުވެސް އަތޮޅު ހޮސްޕިޓަލްތަކާއި ރީޖަނަލް ހޮސްޕިޓަލްތަކަށް ގިނަ އަދަދެއްގެ ނަރުހުން ހޯދާއިރު، ރަށްރަށުގެ ހޮސްޕިޓަލްތަކާއި ސިއްހީ މަރުކަޒުތަކަށް ނަރުހުން ހޯދަން އިއުލާންކޮށްފައިވެއެވެ. އެންމެ ގިނަ ނަރުހުން ހޯދަން އިއުލާންކޮށްފައިވަނީ އުނގޫފާރު ރީޖަނަލް ހޮސްޕިޓަލަށެވެ. އެހޮސްޕިޓަލަށް 42 ނަރުހުން ހޯދަން އިއުލާންކޮށްފައިވެއެވެ. ނޮވެމްބަރު މަހުގެ ކުރީކޮޅު އިއުލާންކުރިއިރުވެސް ހަމަ އެއަދަދަށް ނަރުހުން ހޯދަން އިއުލާންކުރިއެވެ.
މީގެ ކުރިން ނަރުހުން ތަމްރީންކުރަމުން ދިޔައީ ހަމައެކަނި ޤައުމީ ޔުނިވަރސިޓީގެ ފެކަލްޓީ އޮފް ހެލްތު ސައިންސަސްއިން ކަމުގައި ވިޔަސް، މިހާރު ސަރުކާރުން ހިންގާ ޓިވެޓް އޮތޯރިޓީއިންނާއި ޏ. ފުވައްމުލަކުގައި ހިންގާ އަމިއްލަ ކޮލެޖެއްކަމަށްވާ ޒިކުރާ ކޮލެޖުންވެސް ނަރުހުން ތަމްރީންކުރެއެވެ. ނަރުހުންގެ އަދަދު އިތުރުކުރުމަށް ސަރުކާރުން މަސައްކަތްކުރިނަމަވެސް، ދިވެހި ނަރުހުން އެއަދަށް ތަމްރީން ވެފައި ނެތުމާއި، ސަރުކާރުގެ ސިއްހީ ސިޔާސަތުގެ ދޯހަޅިކަމަށް ބުނެ ފާޑުކިޔުންތައް ސަރުކާރަށް ވަނީ އަމާޒުވެފައެވެ.
ޖުމުލް 609 ރަޖިސްޓަރޑް ނަރުހުން ހޯދަން ހެލްތު މިނިސްޓްރީއިން އިއުލާންކޮށްފައިވާއިރު، މި ވަޒީފާތަކަށް ކުރިމަތިލުމުގެ ސުންގަޑިއަކީ މި ޑިސެމްބަރު މަހުގެ 21 ވަނަ ދުވަހުގެ މެންދުރު 1:30އެވެ. ރަޖިސްޓަރޑް ނަރުހުންގެ ވަޒީފާއަށް ކުރިމަތިލާ ނަރުހުންގެ އަތުގައި ދަށްވެގެން ޑިޕްލޮމާ ފެންވަރުގެ ނަރސިން ސެޓްފިކެޓް އޮންނަން ޖެހެއެވެ. މިވަޒީފާތަކަށް ކުރިމަތިލާ ނަރުހުން ވަޒީފާއަށް އެދި ސިޓީ ފޮނުވަން ޖެހޭނީ އެ ވަޒީފާއެއް އޮތް ހޮސްޕިޓަލަކަށް ނުވަތަ ސިއްހީ މަރުކަޒަކަށެވެ. ވަޒީފާތައް އޮތް ރަށްތަކާއި ތަންތަނުގެ ތަފްޞީލީ ލިސްޓެއް ދިވެހި ސަރުކާރުގެ ގެޒެޓްގައި ހެލްތު މިނިސްޓްރީއިން ކޮށްފައިވާ އިއުލާނުގައި އެޓޭޗްކޮށްފައިވެއެވެ.
