ޤަވާއިދާއި ޚިލާފަށް ފައިސާ ދިނުމަށް ފިނޭންސް މިނިސްޓްރީއިން ހުއްދަ ދިންކަން ފަޅާ އަރައިފި

ދައުލަތުގެ މާލިއްޔަތު ޤަވާއިދާއި ޚިލާފަށް ބަޔަކަށް ފައިސާ ދިނުމުގެ ހުއްދަ ފިނޭންސް މިނިސްޓްރީން ދީފައިވާކަން ފަޅާއަރައިފިއެވެ.

މިކަން ފަޅާއަރާފައިވަނީ ހޯމް މިނިސްޓްރީގެ 2015 ވަނަ އަހަރުގެ މާލީ އޮޑިޓް ރިޕޯޓުގައި އޮޑިޓަރ ޖެނެރަލް ހަސަން ޒިޔާތު ހާމަކުރައްވާފައިވާ މައުލޫމާތު ތަކުންނެވެ.

އެ އޮޑިޓް ރިޕޯޓުގައި އޮޑިޓަރ ޖެނެރަލް ވިދާޅުވެފައިވަނީ ހޯމް މިނިސްޓްރީއިން ދައުލަތުގެ މާލިއްޔަތުގެ ގަވާއިދާ ޚިލާފަށް އެޑްވާންސް ފައިސާ ދީފައިވާކަން ފާހަގަ ކުރެވިފައިވާ ކަމަށެވެ.

އޮޑިޓަރ ޖެނެރަލް ވިދާޅުވެފައިވާ ގޮތުގައި ދައުލަތުގެ މާލިއްޔަތުގެ ގަވާއިދުގެ 8.23 ވަނަ މާއްދާގައި، މަސައްކަތުގެ އަގު ތަކެތީގެ އަގާއިއެކު 1،000،000 (އެއް މިލިއަން) ރުފިޔާއަށް ވުރެ ބޮޑުނަމަ، މަސައްކަތުގެ ޖުމްލަ އަގުގެ 15 ޕަސެންޓަށްވުރެ ބޮޑުނުވާ އަދަދަކަށް އެޑްވާންސް ފައިސާ ދެވިދާނެ ކަމަށް ބަޔާންކޮށްފައިވެއެވެ.

ނަމަވެސް މިނިވަން ފަންސާހުގެ ހަރަކާތްތަކާއި ގުޅޭ ކުއްލިއަކަށް ކުރަންޖެހޭ ބޮޑެތި ޚަރަދުތައް ކުރާއިރު، މަސައްކަތުގެ އަގުގެ 50 ޕަސެންޓް އެޑްވާންސް ފައިސާގެ ގޮތުގައި ދިނުމަށް 25 މާރޗް 2015 ގައި މިނިސްޓްރީ އޮފް ފިނޭންސް އެންޑް ޓްރެޜަރީން ހުއްދަ ދީފައިވާ ކަމަށެވެ. އަދި އެހުއްދަ އާއި ހަވާލާދީ 4227067 (ހަތަރު މިލިއަން ދުއިސައްތަ ހަތާވީސް ހާސް ފަސްދޮޅަސް ހަތެއް) ރުފިޔާ ޚަރަދު ކޮށްފައިވާކަންވެސް ފާހަގަ ކުރެވޭ ކަމަށެވެ.

މީގެ އިތުރުން ދައުލަތުގެ މާލިއްޔަތުގެ ގަވާއިދާއި، މިނިސްޓްރީ އޮފް ފިނޭންސް އެންޑް ޓްރެޜަރީގެ ޚާއްޞަ ހުއްދަ އާއި ޚިލާފަށް، މަސައްކަތުގެ އެޑްވާންސް ފައިސާގެ ގޮތުގައި 1201300 (އެއް މިލިއަން ދުއިސައްތަ އެއް ހާސް ތިން ސަތޭކަ) ރުފިޔާ ދީފައިވާކަން ފާހަގަ ކުރެވޭ ކަމަށް އޮޑިޓް ރިޕޯޓްގައިވެއެވެ. މިނިވަން 50 އާއި ގުޅިގެން ހޯދާ ތަކެއްޗާއި ޚިދުމަތައް އެޑްވާންސް ފައިސާ ދިނުމުގައި ދައުލަތުގެ މާލިއްޔަތު ޤަވާއިދުގެ 8.23 ވަނަ މާއްދާގައިވާ ގޮތުގެ މަތިން ޢަމަލު ކުރުމަށް 29 ޖޫން 2015 ގައި ފިނޭންސް މިނިސްޓްރީއިން އަންގާފައި ވީނަމަވެސް، އެތާރީޚުގެ ފަހުންވެސް އެޤަވާއިދާ ޚިލާފަށް މިނިވަން 50 ގެ ހަރަކާތްތައް ކުރިޔަށް ގެންދިއުމަށް، އެޑްވާންސް ފައިސާގެ ގޮތުގައި 26،708،253 (ސައްބީސް މިލިއަން ހަތް ސަތޭކަ އަށް ހާސް ދުއިސައްތަ ފަންސާސް ތިނެއް) ރުފިޔާ ޚަރަދުކޮށްފައިވާކަން ފާހަގަ ކުރާ ކަމަށް ޒިޔަތު ފާހަގަކުރައްވާފައިވެއެވެ.

މި އޮޑިޓް ރިޕޯޓުގައި މިނިވަން 50 އާއި ގުޅޭ ގޮތުން ހިންގާފައިވާ ގިނަ ކަންތައްތަކެއްގައި ކޮރަޕްޝަނަށް މަގުފަހިވާ ގޮތައް ކަންކަން ހިނގާފައި ހުރިކަން ހާމަކޮށްފައިވެއެވެ.