ސަންޖޭގެ ފިލްމުގެ ޝޫޓިން އަލުން ރަންބީރު ޝޫޓް ކުރަނީ
މި ފިލްމު ސިނަމާތަކަށް އަންނާނީ އަންނަ އަހަރުގެ މާޗްގައި
ރަންބީރު ކަޕޫރު
ބޮލީވުޑްގެ ތަރި ސަންޖޭ ކަޕޫރުގެ ހަޔާތުގެ މައްޗަށް ކުޅޭ ފިލްމުގެ ޝޫޓިން އަލުން ނެގުމަށް ރަންބީރު ކަޕޫރު ބޭނުންވެއްޖެއެވެ.
އިންޑިއާގެ ނޫސްތަކުގައި ބުނެފައިވަނީ ރަންބީރު ބޭނުންވަނީ އެ ފިލްމުގައި ވީހާވެސް ފުރިހަމައަށް އެކްޓް ކުރުމަށް ކަމަށެވެ.
ރަންބީރު އަލުން ޝޫޓް ކުރާނީ ކުރިން ޝޫޓްކޮށްފައިވާ ބައެއް މަންޒަރުތަކެވެ. މިހުށައެޅުން ފިލްމުގެ ޑައިރެކްޓަރަށް ރަންބީރު ހުށަހެޅުމުން އެކަން ގަބޫލުކޮށް އެއްބަސްވެފައިވާ ކަމަށް އިންޑިއާގެ ނޫސްތަކުގައި ވަނީ ބުނެފައެވެ.
ރަންބީރުގެ ގާތް ފަރާތްތަކުން ބުނެފައިވަނީ ފިލްމުގެ ބައެއް މަންޒަރުތައް އަލުން ނަގަން ރަންބީރު ބޭނުންވަނީ ކުރިން ނަގާފައިހުރި މަންޒަރުތަކަށް ވުރެ މޮޅަށް އޭނާއަށް އެކްޓްކުރެވިދާނެ ކަމަށް ގަބޫލުކުރެވޭތީ ކަމަށެވެ. މިފިލްމުގެ ޝޫޓިން ނިމުމަކާއި ހަމައަށް މިހާރު އައިސްފައިވީ ނަމަވެސް ރަންބީރު ބޭނުންވާ މަންޒަރުތައް އަލުން ނަގާނެއެވެ.
ސަންޖޭގެ ހަޔާތުގެ މައްޗަށް ކުޅޭ މިފިލްމުގެ ނަމަކީ "ސަންޖޫ"އެވެ. މި ފިލްމުގައި ފެނިގެން ދާނީ ސަންޖޭ ފިލްމީހަޔާތަށް ގުޅުނުގޮތާއި އޭނާ މަސްތުވާތަކެތީގެ ވަބާގައި ޖެހި ދިރިއުޅުން ހަލާކުވެގެންދިޔަ ގޮތެވެ. މީގެ އިތުރުން އޭނާ ޖަލަށް ދާން ޖެހުނުގޮތާއި އޭނާ މިހާތަނަށް ކުރި ތިން ކައިވެނީގެ ވާހަކަ އާއި ފިލްމީދާއިރާގައި އޭނާ ލޯބީގެ ގޮތުން ގުޅިގެން އުޅުނުގޮތެވެ. މި ފިލްމުގައި ސަންޖޭ ލޯބީގެ ގޮތުން ގުޅުނު މީހުންގެ ރޯލުން ފެނިގެންދާނީ އަނުޝްކާ ޝަރުމާއާއި ސޯނަމް ކަޕޫރެވެ.
އަދި އޭނާގެ އަންހެނުންގެ ރޯލުން ފެނިގެންދާނީ ދިއާ މިރްޒާއެވެ. މީގެ އިތުރުން މަންމައާއި ބައްޕަގެ ރޯލުން ފެނިގެންދާނީ މަނީޝާ ކޮއިރަލާ އާއި ޕަރޭޝް ރާވަލްއެވެ.
މި ފިލްމު ސިނަމާތަކަށް އަންނާނީ އަންނަ އަހަރުގެ މާޗްމަހުގެ 30 ވަނަ ދުވަހުގައެވެ.
