ދޮގު މައުލޫމާތު ފަތުރާ ކަމަށްބުނެ ޠައްޔިބު އަނެއްކާވެސް ފުލުހަށް!
ހާޒިރުކުރަނީ ހޯމަ ދުވަހު މެންދުރު 13:00 އަށް
ސޯޝަލް މީޑިއާ އެކްޓިވިސްޓް ޠައްޔިބު ޝަހީމް
ދޮގު މަޢުލޫމާތު ފަތުރާ ކަމަށްބުނެ، ސޯޝަލް މީޑިއާ އެކްޓިވިސްޓް ޠައްޔިބު ޝަހީމް ފުލުހަށް ހާޒިރުވާން އަންގައިފިއެވެ.
ރާއްޖެއެމްވީއަށް އާއި ވާހަކަ ދައްކަމުން ޠައްޔިބު ބުނީ، އާދީއްތަ ދުވަހު ފުލުހުން އޭނާއަށް ފޯނުން ގުޅައި، ފުލުހުން ތަޙުޤީޤުކުރަމުންދާ މައްސަލައަކާއި ގުޅިގެން ހޯމަ ދުވަހު (12 ޖޫން 2017) ގެ މެންދުރު 13:00 އަށް ފުލުހަށް ހާޒިރުވާން އަންގާފައިވާ ކަމަށެވެ.
ޠައްޔިބު ބުނީ، ފުލުހުން ތަޙުޤީޤު ކުރަމުން ދަނީ އޭނާއާއި ގުޅޭ ކޮން ކަހަލަ މައްސަލައެއްތޯ ސުވާލުކުރުމުން، ފުލުހުން ބަލަމުންދަނީ ޠައްޔިބު ދޮގު މައުލޫމާތު ފަތުރާ ކަމަށް ތުހުމަތުކުރެވޭ މައްސަލައެއްކަމަށް ފުލުހުން ބުނެފައިވާ ކަމަށެވެ. ނަމަވެސް އެފަދަ މައުލޫމާތެއް ފަތުރަމުންދާ ކަމަށް ފުލުހުން ތުހުމަތުކުރަނީ ސޯޝަލް މީޑީއާ މެދުވެރިކޮށްތޯ ނުވަތަ އެހެން ގޮތަކަށްތޯ ފުލުހުން ސާފުކޮށްދީފައި ނުވާކަމަށް ޠައްޔިބު ބުންޏެވެ.
މި ތުހުމަތާއި ގުޅިގެން ޠައްޔިބު ބުނީ، އެއްވެސް ވަޞީލަތެއް މެދުވެރިކޮށް، އޭނާ ދޮގު މައުލޫމާތު ނުފަތުރާ ކަމަށާ، އޭނާ ހާމަކޮށްފައިވާ ކޮންމެ ވާހަކަ އަކީވެސް އޭގައި ތެދު އެކުލެވޭ ވާހަކަ ކަމަށެވެ.
ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ވާހަކަދައްކާކަމަށް ތުހުމަތުކޮށް މީގެ ކުރިންވެސް ފުލުހުން ވަނީ ޠައްޔިބު ހައްޔަރުކޮށްފައެވެ. އެގޮތުން މިއަހަރުގެ މާޗް 16 ވަނަ ދުވަހުގެރޭ އޭނާ ހައްޔަރުކޮށް، ފޯނު އަތުލައި، މަސްދުވަހު ހައްޔަރުގައި ބެހެއްޓުމަށްފަހު އޭނާ ދޫކޮށްލާފައިވަނީ އޭޕްރީލް 16 ވަނަ ދުވަހުއެވެ.
ސަރުކާރުން ހިންގާކަމަށް ތުހުމަތުކުރެވޭ ކޮރަޕްޝަނާއި، އުސޫލާއި ޚިލާފު އެފަދަ އެހެން ކަންކަން ހާމަކުރުމުގައި ސޯޝަލް މީޑިއާގައި ވަރަށް ހަރަކާތްތެރިކޮށް މަސައްކަތް ކުރަމުންދަނިކޮށް، ޠައްޔިބު ހައްޔަރުކުރުމާއި ގުޅިގެން އެމްނެސްޓީ އިންޓަރނޭޝަލްއިން ވަނީ ޠައްޔިބަށް ޟަމީރުގެ ޤައިދީގެ ލަޤަބު އަރުވާފައެވެ.
