ބޯ ވިއްސާރަ ވިލާތައް ރާއްޖެ މަތީ ފަތުރާލައިފި
18 މެއި 2017 | ބުރާސްފަތި 13:44ވިއްސާރައިގެ އަސަރު ލަންކާ އިންޑިއާގެ ސަރަހައްދުތަކަށް ވެސް ދަނީ ކުރަމުން
ސެޓެލައިޓް އިމޭޖް - 18 މެއި 2017
ރާއްޖޭގެ މޫސުމާ ބެހޭ އިދާރާއިން ބުރާސްފަތި ދުވަހު ހެނދުނު ހާމަކުރި ގޮތުގައި ރާއްޖޭގެ ބޮޑު ބަޔަކަށް ދަނީ ވިއްސާރަ ކުރަމުންނެވެ. އުތުރާ މެދުރާއްޖެތެރެ އަދި ދެކުނަށްވެސް ގަދަ ވަޔާއެކު ވިއްސާރައިގެ އަސަރު ދަނީ ކުރަމުންނެވެ.
ފަހުގެ ސެޓެލައިޓް ފޮޓޯއަށް ބަލާއިރު ހުޅަނގު މޫސުމުގެ އަސަރު ރާއްޖޭގެ ސަރަހައްދަށް ވަރަށް ބޮޑަށް ފެތުރިފައިވާ ކަން ފާހަގަ ކުރެވެއެވެ.
އޭގެ އިތުރުން އަރަބިއަން ކަނޑާއި އިންޑިއާ ކަނޑުގެ ސަރަހައްދުގެ މައްޗަށް ބޯ ވިލާތައް ޖަމާވެފައިވާކަން ސެޓެލައިޓް ފޮޓޯއިން ހާމަވެއެވެ.
ހުޅަނގު މޫސުމުގެ އަސަރު ރާއްޖޭގެ އިތުރުން އިންޑިއާގެ ސަރަހައްދުތަކަށާއި، ޝްރީލަންކާގެ ސަރަހައްދުތަކަށް ދަނީ ކުރަމުންނެވެ.
ސްރީލަންކާގެ މޫސުމާ ބެހޭ އިދާރާއިން އެ ގައުމުގެ ބައެއް ސަރަހައްދު ތަކަށް ވައިގަދަވާނެ ކަމުގެ އިންޒާރު ވަނީ ނެރެފައެވެ. މި ގޮތުން ގަޑިއަކު 50 ކިލޯމީޓަރުގެ ބާރު މިނުގައި ހުޅަނގުގެ ސަރަހައްދުތަކަށް ވައި ގަދަވާނެ ކަމަށާއި، އަދި އުތުރާއި ދެކުނުގެ ހިސާބުތަކަށް ގަޑިއަކު 70 ކިލޯ މީޓަރަށް ވައިގަދަވާނެ ކަމަށްވެސް ލަފާކޮށްފައިވެއެވެ.
އިންޑިއާ އަށް ބަލާއިރު، އަންދްރަ ޕްރްދޭޝްގެ އައްސޭރީގެ ބޭރުން ބޭ އޮފް ބެންގޯލްގެ މެދުތެރޭ އަދި ހުޅަނގުގެ ސަރަހައްދުގައި ބޯ ވިއްސާރަ ވިލާތައް ވަނީ އުފެދިފައެވެ.
އިންޑިއާގެ މޫސުމާ ބެހޭ އިދާރާއިން ބުނެފައިވަނީ، އަންޑަމަން ރައްތަކަށް ހުޅަނގު މޫސުމުގެ އަސަރު ކުރަންފެށީ މެއި މަހުގެ 14 ގައި ކަމަށެވެ. އަދި މޫސުމުގެ އަސަރު ހުކުރު ދުވަހާ ހަމައަށް ބޮޑުވެގެން ދާނެ ކަމަށް ވެސް އެ އިދާރާއިން ލަފާ ކުރެއެވެ.
އިންޑިއާގެ ހުޅަނގު އުތުރު ސަރަހައްދުތަކަށާއި، އިރު އުތުރުގެ ސަރަހައްދު ތަކަށް ވަރަށް ބޮޑަށް ވިއްސާރައިގެ އަސަރު ދަނީ ކުރަމުންނެވެ.
ޔޫއެސް ސެންޓަރ ފޯ އެންވަޔަރަންމަންޓަލް ޕްރޮޓެކްޝަން އިން ބުނެފައިވަނީ އިންޑިއާގެ ކެރަލާ ސަރަހައްދަށް ވިއްސާރައިގެ އަސަރު އެންމެ ބޮޑުވާނެ ކަމަށް ލާފާކުރެވެނީ މެއި މަހުގެ 25 ގެ ފަހުން ކަމަށެވެ.
ޔޫރަޕިއަން ސެންޓަރ ފޯ މީޑިއަމް ރޭންޖް ވެދަރ ފޯކާސްޓްސް އިން ބުނާ ގޮތުގައި އެރޭބިއަން ކަނޑުގެ ސަރަހައްދުގެ އުފެދިފައިވާ މޫސުމުގެ އަސަރުތައް އެފްރިކާގެ އައްސޭރި ފަށާ ހަމައަށް މެއި 22 ގެ ފަހުން ފޯރާނެ ކަމަށް ބެލެވެއެވެ.
ވައި ގަދަވުމާއި ވިއްސާރައިގެ އަސަރުން ސަރައްހައްދަށް ކުރަމުންދަނީ އެރެބިއަން ކަނޑުގައި އުފެދުނު ހައި ޕްރެޝަރ ސިސްޓަމެއްގެ ސަބަބުން ކަމަށް މޫސުމާ ބެހޭ ތަޖްރިބާކާރުން ވަނީ ހާމަކޮށްފައެވެ.
