ރީ ޓްވީޓުގެ މައްސަލައިގައި އިނގިރޭސި ބޮޑުވަޒީރަށް ރައީސް ޓްރަމްޕް ރައްދު ދެއްވައިފި

އެމެރިކާގެ ރައީސް ޑޮނަލްޑް ޓްރަމްޕް ކުރެއްވި ރީޓްވީޓަކާ ގުޅިގެން އިނގިރޭސި ބޮޑުވަޒީރު ފާޑު ވިދާޅުވުމުން، އިނގިރޭސި ވިލާތުގައި ހިނގާ "ޓެރެރިޒަމްގެ" އަމަލުތަކަށް ސަމާލުކަން ދެއްވުމަށް ގޮވާލައްވައި ބޮޑުވަޒީރު ތެރީސާ މޭއަށް ޓްރަމްޕް ރައްދު ދެއްވައިފިއެވެ.

"އަޅުގަނޑަށް ފޯކަސް ނުކުރައްވާ،ފޯކަސް ކުރައްވާ އިނގިރޭސިވިލާތުގައި ހިނގަމުންދާ ގެއްލުންދެނިވި ހައްދު ފަހަނައަޅާފައިވާ މުސްލިމް ޓެރެރިސްޓް ހަރަކާތްތަކަށް" ރައީސް ޓްރަމްޕް ޓްވީޓް ކުރައްވާފައިވެއެވެ.

މޭ އަށް ޓްރަމްޕް ފާޑުވިދާޅުވީ އިނގިރޭސި ވިލާތުގެ ކަނާތުފިޔައިގެ ގްރޫޕަކުން، ޓްވީޓްކުރި، ނަފްރަތު އުފެދޭ ފަދަ ވީޑިއޯ އެމެރިކާގެ ރައީސް ޑޮނަލްޑް ޓްރަމްޕް ރީ ޓްވީޓް ކުރެއްވުމަކީ އެމަނިކުފާނު ގޯހުން ކުރައްވާފައިވާ ކަމެއްކަމަށް އިނގިރޭސި ބޮޑުވަޒީރުގެ އޮފީހުން ބުނުމުންނެވެ.

ރައީސް ޓްރަމްޕް ކުރެއްވި ޕޯސްޓަށް އިޝާރާތް ކުރައްވައި އިނގިރޭސި ވިލާތުގެ ބޮޑުވަޒީރު ތެރީސާ މޭގެ ރަސްމީ ތަރުޖަމާނު ވިދާޅުވެފައިވަނީ "ރައީސަކު ކުރައްވަން އެއީ ގޯސް ކަމެއް" ކަމަށެވެ.

އިނގިރޭސިވިލާތުގެ ކަނާތުފިޔައިގެ ގްރޫޕެއްކަމަށްވާ ބްރިޓިޝް ފަސްޓްގެ ނައިބު ލީޑަރު ޖޭޑާ ފްރާންސެން ކުރެއްވި ޓްވީޓެއް ރައީސް ޓްރަމްޕްވަނީ ރީ ޓްވީޓް ކުރައްވާފައެވެ.

ޖޭޑާގެ ފުރަތަމަ ޓްވީޓްގައި، އަސާގަނޑު ހިފައިގެން ހުރި މީހަކަށް ހަމަލާދޭތަން ފެންނައިރު ޖޭޑާ ވިދާޅުވާ ގޮތުގައި އެހަމަލާ ދެނީ އިނގިރޭސިވިލާތަށް ހިޖުރަކޮށްގެން އުޅޭ މުސްލިމެކެވެ.

ބްރިޓަން ފަސްޓްއަކީ ކަނާތުފިޔައިގެ، ބްރިޓިޝް ނޭޝަނަލް ޕާޓީ(ބީއެންޕީގެ) ކުރީގެ މެމްބަރުން 2011 ވަނަ އަހަރު އުފައްދާފައިވާ ސިޔާސީ ޖަމާއަތެކެވެ.

މި ގްރޫޕުންވަނީ އިނގިރޭސިވިލާތުގައި އިސްލާމްދީން ފެތުރެމުންދާ ކަމަށް ބުނެ ސޯޝަލް މީޑިއާގައި ކުރަމުންދާ ޓްވީޓްތަކާއެކު ސަމާލުކަން ދަމައިގެންފައެވެ.

ޔޫރަޕަށް ރެފިއުޖީން އެތެރެވުމާ ދެކޮޅު އަދި އެބޯޝަން ހެއްދުމާ ދެކޮޅު ސިޔާސަތާއެކު އެ ޖަމާއަތުން ވަނީ ޔޫރަޕްގެ އިންތިޚާބުތަކުގައި އެ ޖަމާއަތުގެ މެމްބަރުން ވާދަކުރުވާފައެވެ. ނަމަވެސް މިހާތަނަށް އަދި ގޮނޑިއެއް ކާމިޔާބު ވެފައެއް ނުވެއެވެ.

އެންމެ ފަހުން އެ ޖަމާއަތުން ވާދަކޮށްފައިވާ އިންތިޚާބަކީ ލަންޑަންގެ މޭޔަރަކު ހޮވުމަށް ބޭއްވި އިންތިޚާބު ކަމަށްވާއިރު އެ އިންތިޚާބުގައި އެ ޖަމާއަތުގެ ކެނޑިޑޭޓަށް ލިބިފައިވަނީ 1.2 އިންސައްތަ ވޯޓެވެ.

މި އަހަރުގެ މެއިމަހު ބޭއްވި އިންތިޚާބު ކާމިޔާބު ކުރައްވާފައިވަނީ ލޭބަރ ޕާޓީގެ ކެނޑިޑޭޓް ސިއްދީޤް ޚާންއެވެ.

ލަންޑަންގެ މޭޔަރަކަށް މުސްލިމު ބޭފުޅެއް ވަޑައިގެންފައިވާއިރު އޭނާ މި އިންތިޚާބު ކާމިޔާބު ކުރައްވާފައިވަނީ 56.8 އިންސައްތަ ވޯޓް ހޯއްދަވައިގެންނެވެ.