އެވަޓަންގެ ކޯޗަކަށް އެލަޑައިސް ގެންނަނީ

ހުސްވެފައިވާ އެވަޓަންގެ ކޯޗުގެ މަގާމަށް ކްރިސްޓަލް ޕެލަސްގެ ކުރީގެ ކޯޗު ސޭމް އެލަޑައިސް ގެންނަން ނިންމާފައިވާ ކަމަށް ބީބީސީއިން ރިޕޯޓު ކޮށްފިއެވެ.

އެވަޓަންއަށް ކޯޗެއް ގެނައުމުގެ މަސައްކަތް އެ ކްލަބުން އަވަސް ކުރަން ނިންމާފައިވަނީ އާދިއްތަ ދުވަހު އިނގިރޭސި ޕްރިމިއާ ލީގުގައި 4-1 ގެ ނަތީޖާއަކުން ސައުތްހެމްޕްޓަން އަތުން އެ ޓީމު ބަލިވުމާއި ވިދިގެންނެވެ.

އެވަޓަންގެ ކޯޗުކަމުގެ މަގާމުގައި ހުރި ރޮނާލްޑް ކޯމަން އެ މަގާމުން ވަކިކުރުމާއި ވިދިގެން އެލަޑައިސް އެ މަގާމަށް އައްޔަނުކުރަން އުޅޭ ކަމުގެ އަޑުތައް ފެތުރުނެވެ. އެހެނަސް އެވަޓަންއިން އޭނާއަށް އެ މަގާމު ހުށަނޭޅުމާއި ވިދިގެން އެލަޑައިސް މީގެކުރިން އެވަޓަންއާއި ހަވާލުވުމަށް ދެކޮޅު ހެދިއެވެ.

އެލަޑައިސްގެ ބަދަލުގައި އެވަޓަންއިން ކޯޗެއްގެ ގޮތުގައި ގެންނަން މަސައްކަތް ކޮށްފައިވަނީ ވޮޓްފޯޑުގެ ކޯޗު މާކޯ ސިލްވާއެވެ. އެހެނަސް ސިލްވާ ހޯދުމަށް އެވަޓަންއިން ކުރި މަސައްކަތްތައް ވަނީ ނާކާމިޔާބުވެފައެވެ.

އެވަޓަންގެ ކޯޗުގެ މަގާމާއި ވަގުތީ ގޮތުން ހަވާލުވެގެން ހުރި އެ ޓީމުގެ 23 އަހަރުން ދަށުގެ ކޯޗު ޑޭވިޑް އަންސްވޯތުގެ އިރުޝާދުގެ ދަށުން އެ ޓީމު ކުޅުނު ހަތް މެޗުގެ ތެރެއިން ފަސް މެޗުން ވަނީ ބަލިވެފައެވެ.

ހަމައެހެންމެ އެވަޓަންއިން ބާންލީގެ ކޯޗުކަމުގެ މަގާމުގައި މިވަގުތު ހުރި ޝޯން ޑައިޗް ހޯދުމަށް ވެސް މަސައްކަތް ކުރަމުން އަންނަ ކަމަށް އަޑުތައް ފެތުރިފައިވެއެވެ. އެހެނަސް ކޯޗުގެ މަގާމަށް އެވަޓަންގެ ބޯޑުން ހުށަހެޅި ކެނޑިޑޭޓުންގެ ލިސްޓުގެ އެންމެ ކުރި މިހާރު ލިބެނީ އެލަޑައިސްއަށް ކަމަށް ބީބީސީއިން ރިޕޯޓު ކޮށްފައިވެއެވެ.

މިދިޔަ ހޫނު މޫސުމުގެ ޓްރާންސްފާ މާކެޓުގައި އެވަޓަންއިން 140 މިލިއަން ޕައުންޑަށް ވުރެ އިތުރަށް ހަރަދު ކޮށްފައިވާއިރު އެ ޓީމަށް މާ އެދެވޭ ނަތީޖާތަކެއް ހޯދިފައެއް ނުވެއެވެ. އެގޮތުން އެ ޓީމު މިވަގުތު އޮތީ އިނގިރޭސި ޕްރިމިއާ ލީގުގެ ރެލިގޭޝަން ޒޯނަށް ވުރެ ދެ ޕޮއިންޓް މަތީގައެވެ. ހަމައެހެންމެ ޔުއެފާ ޔުރޮޕާ ލީގުގައި އަމިއްލަ ދަނޑުގައި 5-1 ގެ ނަތީޖާއަކުން އެޓަލާންޓާ އަތުން ބަލިވެ އެވަޓަން އޮތީ ގްރޫޕުގެ ފުލުގައެވެ.

އެވަޓަންގެ ކޯޗު ކަމުގެ މަގާމު ހުސްވެފައިވަނީ އޮކްޓޯބަރު މަހުގެ 22 ވަނަ ދުވަހު އިނގިރޭސި ޕްރިމިއާ ލީގުގައި އަމިއްލަ ދަނޑުގައި އާސެނަލް އަތުން 5-2 ގެ ނަތީޖާއަކުން އެ ޓީމު ބަލިވި މެޗަށް ފަހު އެ ޓީމުގެ ކޯޗުކަމުގެ މަގާމުގައި އޭރު ހުރި ނެދަލޭންޑްސްގެ ރޮނާލްޑް ކޯމަން އެ މަގާމުން ވަކިކުރުމާއި ވިދިގެންނެވެ. ކޯމަންގެ އިރުޝާދުގެ ދަށުން އެވަޓަން ކުޅުނު 13 މެޗުގެ ތެރެއިން މޮޅުވީ އެންމެ ދެ މެޗުންނެވެ.

އެވަޓަންގެ ކޯޗުގެ މަގާމަށް އެލަޑައިސް ގެންނަން މަސައްކަތް ކުރަމުންދާއިރު އޭނާ އެންމެ ފަހުން ފުރާފައި ވަނީ ކްރިސްޓަލް ޕެލަސްގެ ކޯޗުގެ މަގާމެވެ. އެގޮތުން އޭނާ ވަނީ މިދިޔަ ސީޒަނުގައި ކްރިސްޓަލް ޕެލަސް ރެލިގޭޝަނުން ސަލާމަތް ކޮށްދީފައެވެ. ކްރިސްޓަލް ޕެލަސްއާއި ހަވާލުވުމުގެ ކުރިން އެލަޑައިސް ވަނީ އިނގިރޭސި ގައުމީ ޓީމުގެ ކޯޗުގެ މަގާމު ވެސް އަދާކޮށްފައެވެ. އިނގިރޭސި ގައުމީ ޓީމުގެ ކޯޗުކަމުން އެލަޑައިސް އިސްތިއުފާ ދީފައިވަނީ މިދިޔަ އަހަރުގެ ސެޕްޓެމްބަރު މަހުއެވެ.