ޓެރަރިޒަމް ވީޑިއޯގައި އިންތިފާޟާގެ މަންޒަރެއް ހިމެނި މައްސަލައިގައި އިސްލާމީ ދުނިޔޭގެ ފާޑުކިޔުން ސައުދީ އަރަބިއާއަށް

ސައުދީ އަރަބިއާއިން އިސްވެއޮވެ އުފައްދާފައިވާ ނިރުބަވެރިކަމާއި (ޓެރަރިޒަމާއި) ދެކޮޅަށް މަސައްކަތް ކުރާ އިއްތިހާދުގެ ފުރަތަމަ ޖަލްސާގައި ދެއްކި ވީޑިއޯއެއްގެ މައްސަލައިގައި އިސްލާމީ ދުނިޔޭގެ ފާޑުކިޔުން ސައުދީ އަރަބިއާއަށް އަމާޒުވެއްޖެއެވެ.

އިސްލާމިކް ކޯލިޝަން އަގެއިންސްޓް ޓެރަރިޒަމްގެ ފުރަތަމަ ބައްދަލުވުން ފެށުމުގެގޮތުން ހޯމަ ދުވަހު ބޭއްވި ރަސްމިއްޔާތު ފެށުމުގެ ގޮތުން "ނިރުބަވެރިން ދައްކައިދޭ" ވީޑިއޯއެއް ކަމަށް ބުނެ، ދެއްކި ވީޑިއޯއާއި ގުޅިގެން ސައުދީއަށް ފާޑުކިޔުން އަމާޒުވެފައިވަނީ އެ ވީޑިއޯގައި ދެވަނަ އިންތިފާޟާގެ މަންޒަރެއް ހިމެނޭތީއެވެ.

ސައުދީ ވަލީއަހުދު މުޙައްމަދު ބިން ސަލްމާން ޝަރަފްވެރި ކޮށްދެއްވި މި ރަސްމިއްޔާތުގައި 41 ޤައުމެއްގެ މަންދޫބުން ބައިވެރިވެފައިވާއިރު، ރަސްމިއްޔާތުގައި ދެއްކި ވީޑިއޯގައި އިންތިފާޟާގެ މަންޒަރެއް ހިމެނާފައިވަނީ އޮޅިގެން ކަމެއް ނުވަތަ ގަސްތުގައި ކަމެއް ސައުދީޏް ހާމަކޮށްފައެއް ނުވެއެވެ.

ސޯޝަލް މީޑީއާގައި ސައުދީއަށް ފާޑުކީ ފަރާތްތަކުން ބުނީ، މިއީ އިސްރާއީލު ރުއްސުމަށް ސައުދީން ގަސްތުގައި ކުރި ކަމެއް ކަމަށާ، ސައުދީ އާއި އެޤައުމުގެ އެހީގައި އުޅޭ ޤައުމުތަކުން ފަހަކަށް އައިސް އިސްރާއީލާއި ގުޅުން ބަދަހިކޮށް، އިސްރާއީލު ރުހޭގޮތަށް ކަންކަން ކުރަމުންދާ ކަމަށެވެ.

ސައުދީން ނިރުބަވެރިންގެ ވީޑިއޯގައި ހިމަނަފައިވާ ފޮޓޯއަކީ 2001 ވަނަ އަހަރު ދެވަނަ އިންތިފާޟާގެ ދުވަސްވަރު، ގުދުސްގެ ދެކުނު ހިސާބެއްގައި ފަލަސްޠީނުގެ ރައްޔިތަކު އިސްރާއީލުގެ ސިފައިންނާއި ހަނގުރާމަ ކުރަމުންދާ މަންޒަރު ފެންނަ ފޮޓޯއެކެވެ.

ސައުދީން މިފަދަ ވީޑިއޯއެއްގައި މި ފޮޓޯ ބޭނުންކުރުމާއި ގުޅިގެން ފަލަސްޠީނުގެ ރައްޔިތުންނާއި ބައެއް އެހެން ޤައުމުތަކުގެ އަރަބިން ވަނީ ސޯޝަލް މީޑިއާގައި ސައުދީއަށް ވަރަށް ބޮޑަށް ފާޑު ކިޔާފައެވެ.

ސައުދީއަށް ފާޑުކިޔަމުންދާ އެއްބަޔަކު ބުނަމުންދަނީ ފަލަސްޔީނުގެ ރައްޔިތުންނަކީ ނިރުބަވެރިން ނޫން ކަމަށާއި، އެއީ އަމިއްލަ ދިފާޢުގައި މަސައްކަތްކުރާ ބައެއް ކަމަށެވެ.

އަދި ސައުދީން ޔަމަނު ފަދަ ޤައުމުތަކުގައި ހިންގަމުންދާ ޖަރީމާތަކަކީ ހަޤީޤީ ނިރުބަވެރިކަން ކަމަށްވެސް ބައެއް ފަރާތްތަކުން ދަނީ ބުނަމުންނެވެ. މީގެ އިތުރުން ބައެއް އެހެން ފަރާތްތަކުން ބުނަމުންދަނީ ހަޤީޤީ ނިރުބަވެރިކަމަކީ އިސްރާއިލު ދިފާޢުކުރުން ކަމަށާއި، ފަލަސްތީނުގެ ރައްޔިތުންނަށް ލިބިފައިވާ މަތިވެރި ޤަދަރާއި ހަމައަށް ސައުދީ އަރަބިއާއަށް ފަހުންވެސް ނުދެވޭނެ ކަމަށެވެ.

މީގެ އިތުރުން މިއީ ސީދާ އިސްރާއީލު ރުއްސަން ކޮށްފައިވާ ކަމެއްކަމަށްވެސް އެފަރާތްތަކުން ވަނީ ބުނެފައެވެ.

މި މައްސަލައިގައި ސޯޝަލް މީޑިއާގައި ސައުދީއަށް ކުރިމަތިވަމުންދާ ފާޑުކިޔުމަށް އިތުރު ބާރެއް ލިބިގެން ދިޔައީ، އެ ވީޑިއޯ އަކީ ހަޤީޤަތް ފެންނަ، ވީޑިއޯއެއް ކަމަށާ، ސައުދީ އޮތީ އިސްރާއީލާއި އެކުގައި ކަމަށް އިސްރާއީލް ސިފައިންގެ ތަރުޖަމާނަކު ވިދާޅުވުމާއި ގުޅިގެންނެވެ.

އިންތިފާޟާގެ ފޮޓޯއެއްގެ މައްސަލައިގައި ސައުދީއަށް ފާޑުކިޔުން އަމާޒުވެފައި މިވަނީ ސައުދީ އާއި އިސްރާއީލާއި ދެމެދު ސިއްރު ގުޅުންތަކެއް އޮންނަ ކަމަށް އިސްރާއީލުގެ އޮފިޝަލުން ބުނެފައި ވަނިކޮށެވެ. އަދި ހަމަ މިއާއި އެކު ފަލަސްޠީނު ރައްޔިތުންގެ ދިފާއުގައި ހަނގުރާމަކުރަމުންދާ ހަމާސް ޖަމާޢަތަކީ ނިރުބަވެރި ޖަމާޢަތެއްކަމަށްވެސް ސައުދީން މީގެ ކުރިން ވަނީ ނިންމާފައެވެ.