ހޮންޑިއުރަސްގެ ރިޔާސީ އިންތިޚާބު: ކާމިޔާބުވެއްޖެ ކަމަށް ދެ ކެނޑިޑޭޓަކު އިއުލާނުކުރައްވައިފި

މެދުތެރޭ އެމެރިކާގެ ގައުމެއްކަމަށްވާ ހޮންޑިއުރަސްގެ ރިޔާސީ އިންތިޚާބުގެ ވޯޓުފޮށިތައް ބަންދުކުރިތާ ގަޑިއިރުތަކަކަށްފަހު ދެ ކެނޑިޑޭޓަކު އަމިއްލަފުޅަށް އިންތިޚާބު ކާމިޔާބު ކުރެއްވިއްޖެކަމަށް އިއުލާނުކުރައްވައިފިއެވެ.

ރަސްމީ ނަތީޖާ އިއުލާނުކުރުން މަޑުޖައްސާލާފައިވާއިރު ސުޕްރީމް އިލެކްޓޯރަލް ޓްރައިބިއުނަލުން ވަނީ ވޯޓް ފޮށިތައް ބަންދުކުރިތާ 10 ގަޑިއިރުފަހުން ވަގުތީ ނަތީޖާއެއް އިއުލާނުކޮށްފައެވެ.

ވަގުތީ ނަތީޖާ ދައްކާގޮތުން 45.17 އިންސައްތަ ވޯޓާއެކު ކުރީގައި އުޅުއްވަނީ އިދިކޮޅު އިއްތިހާދުގެ ކެނޑިޑޭޓް ސަލްވަޑޯ ނަސްރައްލާއެވެ. މިހާރުގެ ރައީސް ހުއާން އޮލާންދޯ ހަރނަންޑޭޒް ދެވަނައިގައި އުޅުއްވާއިރު އެމަނިކުފާނަށް ލިބިވަޑައިގެންފައިވަނީ 40.21 އިންސައްތަ ވޯޓެވެ. މިހާތަނަށް 57 އިންސައްތަ ވޯޓް ގުނާފައިވާއިރު ތިންވަނައިގައި އުޅުއްވަނީ ލިބަރަލް ޕާޓީގެ ކެނޑިޑޭޓް ލުއިސް ޒޭލަޔާއެވެ.

ޓްރައިބިއުނަލްގެ މެޖިސްޓްރޭޓް ރަމީރޯ ލޯބޯ ހޯމަ ދުވަހު ހެނދުނު މީޑިއާތަކަށް ވިދާޅުވީ ނަތީޖާ ހުރި ޓްރެންޑް ބަދަލު ނުވާނެ ކަމަށެވެ.

މީގެއިތުން އިންތިޚާބީ އިދާރާއިން ބުނެފައިވަނީ ރަސްމީ ނަތީޖާ އިއުލާނުކުރުން ބުރާސްފަތި ދުވަސް ނުވަތަ އެއަށްވުރެވެސް ފަސްވެދާނެ ކަމަށެވެ.

ރަސްމީ ނަތީޖާ ލިބިފައިނުވާއިރު އިދިކޮޅު ކެނޑިޑޭޓް ނަސްރައްލާ އާދީއްތަ ދުވަހުގެ ރޭ ވަނީ ކުރިޔަށް އޮތް ދައުރުގައި ރައީސަކަށް ވެވަޑައިގަންނަވާނީ އޭނާކަން އެނގިވަޑައިގަންނަވާކަމަށް އިއުލާނުކުރައްވާފައެވެ. އަނެއްކޮޅުން ވެރިކަންކުރާ ކޮންޒަރވޭޓިވް ނޭޝަނަލް ޕާޓީގެ ކެނޑިޑޭޓް ހާނަންޑޭޒް އޭގެ ކުރިންވަނީ އިންތިޚާބުގެ ކާމިޔާބީ އިއުލާނުކުރައްވާފައެވެ.

މި އިންތިޚާބުގައި 6.2 މިލިއަން މީހުންނަށް ވޯޓުލުމުގެ ހައްގު ލިބިފައިވެއެވެ.