މަލައިކާ ރާއްޖެ އައުމުން އަރުޖުންއަށް ކެތް ނުކުރެވިގެން ރާއްޖެ އަތުވެއްޖެ

ބޮލީވުޑްގެ އެކްޓަރ، މޮޑެލް އަދި ރިއަލިޓީ ޓީވީ ޖަޖް މަލައިކާ އަރޯރާ ރާއްޖޭގައި ޗުއްޓީ ހޭދަކޮށްފައިވަނިކޮށް އޭނާގެ ލޯބިވެރިޔާ އަރުޖުން ކަޕޫރުވެސް ރާއްޖެ އަތުވެއްޖެ އެވެ.

މަލައިކާ އޭނާގެ ރައްޓެހިންނާއި އެކު ރާއްޖެ އައިސްފައި މިވަނީ މިހަފްތާގެ ކުރީކޮޅެވެ.

މަލައިކާ ޗުއްޓީ ހޭދަކޮށްފައިވަނީ ނިޔާމަ ޕްރައިވެޓް އައިލެންޑްގައެވެ.

މިދިޔަ އަންގާރަ ދުވަހު އަރުޖުން ރާއްޖެ އައިސް ޕެރަޑައިސް އައިލެންޑް ރިސޯޓްގައި ނަގާފައިވާ ފޮޓޯ އޭނާވަނީ އިންސްޓަގްރާމްގައި ހިއްސާ ކޮށްފައެވެ. މި ފޮޓޯގެ ކެޕްޝަންގައި އަރުޖުން ލިޔެފައިވަނީ "ހިއަރސް ޓު ޔޫ މޯލްޑިވްސް.. ޓު މެނީ މޯ ސަންސެޓް އެންޑް ސްލްފީސް" އެވެ.

މަލައިކާ ވަނީ ނިޔާމަ ޕްރައިވެޓް އައިލެންޑްގައި ބީޗްގައި އޭނާ އެކަނި ނަގާފައިވާ ފޮޓޯއެއް އިންސްޓަގްރާމްގައި ހިއްސާކޮށްފައެވެ. މި ފޮޓޯގެ ކެޕްޝަންގައި "ވެން ޓައިމް ސްޓޭންޑް ސްޓިލް" ލިޔެފައި ވެއެވެ. މި ފޮޓޯއަށް މަލައިކާގެ ގިނަ ފެނުން ކޮމެންޓް ކޮށްފައިވާއިރު އެންމެ ލޮލުގައި އަޅައިގަތީ އަރުޖުން ކަޕޫރު ކޮށްފައިވާ ކޮމެންޓެވެ. އަރުޖުންގެ ކޮމެންޓް ގައި ވަނީ "ހޫމް" އެވެ.

މީގެ އިތުރުންވެސް ރިސޯޓްގެ ހިތްގައިމު މަންޒަރު ދައްކުވައިދޭ ފޮޓޯތައް ވަނީ އޭނާގެ އިންސްޓަގްރމް ސްޓޯރީއަށް ލާފައެވެ.

ރިޕޯޓްތައް ބުނާގޮތުން އަންނަ އެޕްރީލް މަހު މަލައިކާ އާއި އަރުޖުން ކައިވެނި ކުރުމަށް ވަނީ ހަމަޖެހިފައެވެ. ނަމަވެސް އެކަން އަރުޖުންގެ ބައްޕަ ބޮނީ ކަޕޫރު ވަނީ ދޮގުކޮށްފައެވެ.މަލައިކާ މީގެ ކުރިން ވަނީ ސަލްމާން ޚާންގެ ކޮއްކޮ އަރްބާޒް ޚާން އާއި ކައިވެނި ކޮށްފައެވެ. 18 އަހަރުވީ މި ކައިވެނި ރޫޅިފައިވަނީ 2016 ވަނަ އަހަރުއެވެ. މި ކައިވެންޏަށް މިދެތަރިންނަށް ވަނީ ފިރިހެން ކުއްޖަކު ލިބިފައެވެ.