ރިޝްމީއަށް ރައީސް މައުމޫނު މަރުހަބާ ވިދާޅުވެއްޖެ

ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން(ސާކް) ގެ އެންމެ މޮޅު ބަތަލާއަކަށް ފިލްމީ ތަރި އައިޝަތު ރިޝްމީ ހޮވުމުން އޭނާއަށް ރައީސް މައުމޫނު އަބްދުލްގައްޔޫމް މަރުހަބާ ވިދާޅުވެއްޖެއެވެ.

ރައީސް މައުމޫނު ކުރެއްވި ޓްވީޓެއްގައި ވިދާޅުވީ ރިޝްމީއަށް މަރުހަބާ ކިޔުއްވާކަމަށާއި ރާއްޖެ އޭނާއަށް ފަޚުރުވެރިވާ ކަމަށެވެ.

ރިޝްމީއަށް ލިބުނު ކާމިޔާބީއަށް އެކި ފަރާތްތަކުން ދަނީ މަރުހަބާ ކިޔަމުންނެވެ. އެގޮތުން ފިލްމީ ދާއިރާގައި މަސައްކަތް ކުރާ އެކި ފަރާތްތައް ހިމެނެއެވެ.

ސާކް ގައުމުތަކުގެ އެންމެ މޮޅު ބަތަލާގެ އެވޯޑް ލިބުނީ އޭނާ ޕްރޮޑިއުސްކޮށް އަދި އެކްޓް ކޮށްފައިވާ ފިލްމު "ވިޝްކާ" އިންނެވެ. "ވިޝްކާ" އަކީ ރާއްޖެއިން މި ފަހަރުގެ ސާކް ފެސްޓިވަލްގައި ބައިވެރިކުރިވި ހަމަ އެކަނި ފިލްމު ވެސް މެއެވެ.

ރިޝްމީ އެނބުރި މާލެ އަންނާނީ މިއަދު މެންދުރު 14:00 ގައެވެ. އޭނާއަށް މަރުހަބާ ކިޔުމަށް މާލޭ އިންޓަނޭޝަނަލް އެއާޕޯޓަށް ދިއުމަށް ފިލްމީ ދާއިރާގައި މަސައްކަތް ކުރާ ފަރާތްތަކުން ދަނީ ތައްޔާރުވަމުންނެވެ.

ސާކް ފިލްމު ފެސްޓިވަލްގައި މިދިޔަ އަހަރުގައި ވެސް ރިޝްމީ ކުޅުނު "މިކޮއެ ބައްޕަ ބައޭ ބައޭ" ވަނީ ވާދަކޮށްފައެވެ. އެހެން ނަމަވެސް އެ ފިލްމަށް އެވޯޑެއް ލިބިފައެއް ނުވެއެވެ. އެހެން ނަމަވެސް 2015 ވަނަ އަހަރު ނިކުތް "އިންސާނާ" އަށް ވަނީ ސާކް ފިލްމު ފެސްޓިވަލްގައި ވާދަކޮށް ބްރޯންޒް މެޑެލް ލިބިފައެވެ.