ނިޕޯން ޕެއިންޓް ނެޝަނަލް ޓެނިސް ޗެމްޕިއަންޝިޕްގެ ޗެމްޕިއަންކަން ފާއިހް އަދި އިރުފާ ހޯދައިފި

ޓެނިސް އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ކުރިޔަށް ގެންދިޔަ 48 ވަނަ އެސްޓީއޯ ނިޕޯން ޕެއިންޓް ނެޝަނަލް ޓެނިސް ޗެމްޕިއަންޝިޕުގެ ފިރިހެން ސިންގަލްސް ޗެމްޕިއަންކަން އަބްދުﷲ ފާއިހް ފަޒީލް އަދި އަންހެން ޑިވިޝަންގެ ޗެމްޕިއަންކަން އައިމިނަތު އިރުފާ މާހިރު ހޯދައިފިއެވެ.

ހޮނިހިރު ދުވަހުގެ ހަވީރު ނެޝަނަލް ޓެނިސް ސެންޓަރުގެ ކޯޓުގައި ކުރިޔަށްދިޔަ ފިރިހެން ސިންގަލްސްގެ ޗެމްޕިއަންކަން ފާއިހް ހޯދީ، ފައިނަލްގައި ސީދާ ދެ ސެޓުން ސާއި ވަހީދު ބަލިކޮށްގެންނެވެ. މި މެޗުގެ ސެޓުތައް ފާއިހް ގެންދިޔައީ 7-5 އަދި 6-4 އިންނެވެ.

މި މުބާރާތުގެ އަންހެން ސިންގަލްސްގެ ޗެމްޕިއަންކަން އިރުފާ ހޯދީ ފައިނަލް މެޗުގައި ސީދާ ދެ ސެޓުން މަރިޔަމް ހަޝްމާ ހާނިމްގެ މައްޗަށް ކުރި ހޯދައިގެންނެވެ. މި މެޗުގެ ސެޓުތައް އިރުފާ ގެންދިޔައީ 6-2 އަދި 6-4 އިންނެވެ.

މި މުބާރާތުގެ އަށް އަހަރުން ދަށުގެ އަންހެން ސިންގަލްސް އިވެންޓުގެ ޗެމްޕިއަންކަން ނަބާ ނިޝާން ހޯދިއިރު އަށް އަހަރުން ދަށުގެ ފިރިހެން ސިންގަލްސްގެ ޗެމްޕިއަންކަން ހޯދީ މުހައްމަދު ނޫހް ނާޒިމްއެވެ. މި މުބާރާތުގެ 12 އަހަރުން ދަށުގެ ފިރިހެން ޑަބަލްސް އިވެންޓްގެ ޗެމްޕިއަންކަން ހޯދީ ނާމިގް ޝާހިދްއާއި ރައުދަކް މައުމޫންގެ ޕެއާއެވެ. ހަމައެހެންމެ 16 އަހަރުން ދަށުގެ އަންހެން ސިންގަލްސްގެ ޗެމްޕިއަންކަން މަރިޔަމް ހަޝްމާ ހާނިމް ހޯދިއިރު، ފިރިހެން ޑަބަލްސް އިވެންޓުގެ ޗެމްޕިއަންކަން ހޯދީ އަހުމަދު ސާއި ވަހީދުއާއި އަލީ ފާރިސް މުހައްމަދުގެ ޕެއާއެވެ.

މި މުބާރާތުގައި އެކި އުމުރުފުރާތަކުން 94 ކުޅުންތެރިން ބައިވެރިވިއިރު އޭގެތެރޭގައި ހިމެނެނީ 50 އަންހެން ކުޅުންތެރިންނާއި 44 ފިރިހެން ކުޅުންތެރިޔެކެވެ. މި މުބާރާތުގައި ތަފާތު އެކި ކެޓަގަރީތަކުގެ ކުޅުންތެރިން ފެނިގެން ގޮސްފައިވެއެވެ. އެގޮތުން ސިންގަލްސް އިވެންޓާއި ޑަބަލްސް އިވެންޓުގެ އިތުރުން މިކްސްޑް ޑަބަލްސް އިވެންޓުގެ ކުޅުން މި މުބާރާތުގައި ފެނިގެން ގޮސްފައިވެއެވެ.