ޗައިނާއިން އަންނަ ފަތުރުވެރިންގެ އަދަދު އަދިވެސް ދަށަށް ދަނީ!
ޗައިނާއިން އަންނަ ފަތުރުވެރިންގެ އަދަދު މަދުވިނަމަވެސް، ޖުމްލަކޮށް އައި ފަތުރުވެރިންގެ އަދަދު ވަނީ 6 އިންސައްތަ އިތުރުވެފައި
ރާއްޖޭގެ ރިޒޯޓެއް
ރާއްޖެއަށް އެންމެ ގިނައިން ފަތުރުވެރިން އަންނަ ޤައުމަކީ މިހާރު ޗައިނާއެވެ. މިއަހަރުގެ މިހާތަނަށް ރާއްޖެއަށް އައި މިލިއަނަކަށް ވުރެ ގިނަ ފަތުރުވެރިންގެ ތެރެއިން %23 އަކީ ޗައިނާގެ ފަތުރުވެރިންނެވެ. އެއީ ގާތްގަނޑަކަށް ރާއްޖެއަށް އައި ފަތުރުވެރިންގެ ހަތަރު ބައިކުޅަ އެއް ބައެވެ. ޗައިނާއިން އޮކްޓޯބަރުގެ ނިޔަލަށް ދެލައްކަ ފަސްދޮޅަސް ފަސް ހާސް ހަތަރު ސަތޭކަ ސަތާރަ ފަތުރުވެރިން ރާއްޖެއަށް މިއަހަރު އައިސްފައިވެއެވެ.
އެހެން ނަމަވެސް ރާއްޖެއަށް ޗައިނާއިން އަންނަ ފަތުރުވެރިންގެ އަދަދު މިއަހަރު ފެށުނީއްސުރެ ދަނީ ދަށަށެވެ. އޮކްޓޯބަރުގެ ނިޔަލަށް 265 ހާސް ފަތުރުވެރިން ޗައިނާއިން އައި ނަމަވެސް، މިއީ މިދިޔަ އަހަރުގެ އޮކްޓޯބަރުގެ ނިޔަލަށް ޗައިނާއިން އައި ފަތުރުވެރިންނަށް ވުރެ %8.2 މަދު އަދަދެކެވެ. މިދިޔަ އަހަރު އެމުއްދަތުގައި 289 ހާސް ފަތުރުވެރިން ޗައިނާއިން އައެވެ.
މިއަހަރުގެ ޖެނުއަރީ މަހަށް ބަލާއިރު 2016ވަނަ އަހަރުގެ ޖެނުއަރީ މަހު ޗައިނާއިން އައި ފަތުރުވެރިންނަށް ވުރެ ގިނަ ފަތުރުވެރިން ރާއްޖެއަށް އައެވެ. 2016 ވަނަ އަހަރުގެ ޖެނުއަރީ މަހު ތޭވީސް ހާސް ދުއިސައްތަ ސާޅީސް އެއް ފަތުރުވެރިން ޗައިނާއިން އައިއިރު، މިއަހަރު ޖެނުއަރީ މަހު އައީ ތިރީސް ހާސް ހަސަތޭކަ ފަސްދޮޅަސް ނުވަ ފަތުރުވެރިންނެވެ. މިއީ %32 ގެ ކުރިއެރުމެކެވެ. އެހެން ނަމަވެސް އޭގެ ފަހުން ކޮންމެ މަހަކުވެސް މިދިޔަ އަހަރާއި އަޅާބަލާއިރު ޗައިނާ ފަތުރުވެރިން އަންނަ އަދަދު ދިޔައީ މަދުވަމުންނެވެ.
ޖެނުއަރީ މަހު %32 ގެ ކުރިއެރުމެއް ލިބުނު ނަމަވެސް ޖެހިގެން އައި ފެބްރުއަރީ މަހު %29.3 ގެ ވެއްޓުމެއް އައެވެ. މިއަހަރުގެ ފެބްރުއަރީ މަހު ޗައިނާއިން އައި ފަތުރުވެރިންގެ އަދަދަކީ 24،263އެވެ. އެހެން ނަމަވެސް މިދިޔަ އަހަރުގެ ފެބްރުއަރީ މަހު 34،330 ފަތުރުވެރިން އައެވެ.
މާޗް މަހުވެސް %16 ދަށްވި އިރު، އެޕްރީލް މަހު %15 ދަށްވިއެވެ. މެއި މަހު %7، ޖޫން މަހު %15.7، ޖުލައި މަހު %6، އޮގަސްޓް މަހު %6.8، އަދި ސެޕްޓެމްބަރު މަހު %6.9 ވަނީ ދަށްވެފައެވެ.
އޮކްޓޯބަރު މަހު އަށާވީސް ހާސް ހަސަތޭކަ އަށްޑިހަ ނުވަ ފަތުރުވެރިން ޗައިނާއިން އައިކަމަށް ތަފާސް ހިސާބުތައް ދައްކާއިރު، މިއީ މިދިޔަ އަހަރުގެ އޮކްޓޯބަރު މަހާއި އަޅާ ބަލާއިރު 2.6 އިންސައްތައިގެ ވެއްޓުމެކެވެ. މިދިޔަ އަހަރު އޮކްޓޯބަރު މަހު ނަވާވީސް ހާސް ހަތަރު ސަތޭކަ ސާޅީސް ހަތަރު ފަތުރުވެރިން ޗައިނާއިން އައެވެ.
އެހެންކަމުން ޖުމްލަކޮށް ބޮޑުތަނުން މިއަހަރު ޗައިނާއިން އައި ފަތުރުވެރިންގެ ނިސްބަތް މިވަނީ ދަށްވެފައެވެ. އެހެން ނަމަވެސް ޖުމްލަކޮށް ރާއްޖެއަށް އަންނަ ފަތުރުވެރިންގެ އަދަދު މިދިޔަ އަހަރަށް ވުރެ ވަނީ ރަނގަޅުވެފައެވެ. އެގޮތުން މިދިޔަ އަހަރާއި އަޅާބަލާއިރު މިއަހަރު ފަތުުރުވެރިން އައި މިންވަރު ޖުމްލަކޮށް 6 އިންސައްތައަށް ވަނީ އިތުރުވެފައެވެ.
