ހަމަނުޖެހުމަށް މަގުފަހިވާ ވާހަކަތައް ރިޔާޒް ރަޝީދު ދައްކަވާ: ލަންކާގެ ނޫސްތައް
ވެރިކަންކުރާ ޕާޓީއިން ލަންކާއަށް ފާޑުކިޔާއިރު، ލަންކާއާއި ރާއްޖޭގެ ގުޅުން ވަނީ ގޯސްވެފައި
ވިލުފުށީ ދާއިރާގެ މެމްބަރު ރިޔާޒް ރަޝީދު: ލަންކާއިން ރާއްޖޭގެ ހަމަޖެހުން ނަގާލަން މަސައްކަތްކުރާކަމަށް ތުހުމަތު ކުރައްވާ
ވިލުފުށީ ދާއިރާގެ މެމްބަރު ރިޔާޒް ރަޝީދަކީ ހަމަނުޖެހުމަށް މަގުފަހިވާފަދަ އަދި ދެބަސްވުން އުފެދޭ ޒާތުގެ ވާހަކަ ދައްކަވާ ބޭފުޅެއް ކަމަށް ލަންކާގެ ޑެއިލީ މިރަރ ނޫހުން ސިފަކޮށްފިއެވެ.
ރާއްޖޭގެ ވެރިކަން ވައްޓާލުމަށް ލަންކާއިން އެހީވާ ކަމަށް ރިޔާޒް ރަޝީދު ނޫސްވެރިންގެ ބައްދަލުވުމެއްގައި ވިދާޅުވި ވާހަކަ ލަންކާގެ ނޫސްވެރިންގެ ސަމާލު ކަމަށް އައި އިރު، މިކަމާއި ގުޅިގެން ޑެއިލީ މިރަރ ނޫހުގައި ލިޔެފައިވާ ޚަބަރުގައި ރިޔާޒް ރަޝީދު މީގެ ކުރިން ދައްކަވާފައިވާ މިފަދަ އެހެން ބައެއް ވާހަކަތައް ފާހަގަކޮށްފައިވެއެވެ. އެގޮތުން އިދިކޮޅު ފަރާތްތަކަށް އިޝާރާތްކުރައްވައި ބަޣާވާތެއް ރާވަމުންދާ ބަޔަކަށް ސްރީލަންކާއިން ހިމާޔަތްދޭ ކަމަށް ބުނެ ދައްކަވާފައިވާ ވާހަކަ ވެސް ފާހަގަ ކޮށްފައިވެއެވެ. ލަންކާ ކެބިނެޓްގެ ތަރުޖަމާނު ރަޖިތަ ސެނަރަތުނަ ވިދާޅުވީ ކުރީގެ ރައީސް މުހައްމަދު ނަޝީދު ލަންކާއަށް ވަޑައިގެން ކުރައްވަނީ ޑިމޮކްރަސީގެ މަސައްކަތްތަކެއް ކަމަށާއި، އެއީ ބަޣާވާތެއް ނޫންކަމަށެވެ.
ސްރީލަންކާއިން މަސައްކަތް ކުރަނީ ރާއްޖޭގައި ދާޚިލީ ހަމަނުޖެހުމެއް ފެށުމަށް ކަމަށް ރިޔާޒް ކުރެއްވި ސީރިއަސް ތުހުމަތަށް ލަންކާގެ ސަރުކާރުން އަދި މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ. އަދި ލަންކާގެ ނޫސްތަކުގައި މިކަމާއި ގުޅޭގޮތުން ޝާޢިއުކުރި ޚަބަރުތަކުގައި ވެސް ލަންކާ ސަރުކާރުގެ ބަހެއް ހިމަނާފައެއް ނުވެއެވެ.
ރައީސް ޔާމިން އަވަހާރަ ކޮށްލަން އުޅުނު ސްނައިޕަރެއް ކަމަށް ބުނާ ލަންކާގެ ރައްޔިތަކު 2015ވަނަ އަހަރު ހައްޔަރު ކުރުމާއި ގުޅިގެން ލަންކާއާއި ރާއްޖޭގެ ގުޅުން ގޯސްވެފައިވާކަން ޑެއިލީ މިރަރއިން ވަނީ ފާހަގަ ކޮށްފައެވެ.
ރާއްޖޭގެ ޚާރިޖީ ސިޔާސަތު ކައިރި މާޒީއެއްގައިވެސް ބޮއްސުން ނުލާ މިންވަރަށް މިހާރު ބޮއްސުންލާފައިވާ ކަމަށް ޚާރިޖީ ދާއިރާގެ ބޭފުޅުން ފާހަގަކުރައްވައެވެ. އެގޮތުން ރިޔާޒް ރަޝީދުމެން ފަދަ ބޭފުޅުން ސަރުކާރު ހިންގާ މައި ޕާޓީގެ އިސް މަޤާމުތަކުގައި ތިއްބަވައިގެން، ޕާޓީގެ ރަސްމީ ނޫސްކޮންފަރެންސްތަކުގައި ރަހުމަތްތެރި ޤައުމުތަކާއި ގުޅޭ ގޮތުން ދައްކާ ވާހަކަތަކަކީ ސަރުކާރުގެ މަދަދާއިއެކު ދައްކާ ވާހަކަތަކެއް ކަމަށް އެބޭފުޅުން ސިފަކުރައްވައެވެ. އަދި މިއީ ޚާރިޖީ ސިޔާސަތުގެ ދޯހަޅިކަން ދައްކުވައިދޭކަމެއް ކަމަށް ވެސް ތަޖުރިބާކާރުން ވިދާޅުވެއެވެ.
