ކާނަލް ނާޒިމްގެ ޝަރީޢަތާއިމެދު އެމެރިކާގެ ސަފީރު ސުވާލު އުފައްދަވައިފި
އިންސާފުވެރި ހެކިތަކަށް ބަލައިގެން ޝަރީޢަތް ހިންގާނީ ކޮންއިރަކުންތޯ ކޭޝަޕް ސުވާލު އުފެއްދެވި
އަތުލް ކޭޝަޕް: ނާޒިމްގެ މައްސަލައިގައި ކަންބޮޑުވުން ހާމަކުރެއްވި
ޖަލަށްލާފައިވާ ކުރީގެ ޑިފެންސް މިނިސްޓަރު ކާނަލް މުޙައްމަދު ނާޒިމަށް އިންސާފުވެރި ޝަރީޢަތެއް ލިބޭނީ ކޮން އިރަކުންތޯ އެމެރިކާއިން ރާއްޖެއަށާއި ސްރީލަންކާއަށް ކަނޑައަޅުއްވާފައި ހުންނަވާ ސަފީރު އަތުލް ކޭޝަޕް ސުވާލު ކުރައްވައިފިއެވެ. ކާނަލް ނާޒިމް ޖަލަށްލިތާ 1000 ދުވަސް ފާހަގަކޮށް ނާޒިމްގެ ޤާނޫނީ ވަކީލު ހުސްނުއްސުއޫދު ކުރައްވާފައިވާ ޓްވީޓެއް ރީޓްވީޓު ކުރައްވައި ކޭޝަޕް ކުރެއްވި ޓްވީޓެއްގައި އެމަނިކުފާނު ވަނީ ނާޒިމަށް އިންސާފުވެރި ހެކިތަކުގެ މައްޗަށް ބިނާކޮށް، ޤާނޫނުތައް ނަގަހައްޓައިގެން ހިންގޭ ޝަރީއަތެއް ލިބޭނީ ކޮން ދުވަހަކުންތޯ ސުވާލުކުރައްވާފައެވެ.
ކާނަލް ނާޒިމްގެ އެޕާޓްމަންޓުން ފެނުނު ފިސްތޯލައާއި ގުޅޭ އެއްވެސް ޙަޤީގަތެއް ނާޒިމަށް އެނގިނުލައްވާނެ ކަމަށާ، އެކަމުގެ މަޢުލޫމާތު ޝަރުޢީ ކޯޓެއްގައި ވިދާޅުވެދެއްވުމަށް ތައްޔާރަށް ހުންނެވި ކަމަށް ކުރީގެ ނައިބު ރައީސް އަޙުމަދު އަދީބު ވަނީ ވިދާޅުވެފައެވެ. ނާޒިމްގެ އެޕާޓުމެންޓުން ފިސްތޯލައެއް ފެނުނު މައްސަލައިގައި އެމަނިކުފާނުގެ މައްޗަށް ޓެރަރިޒަމްގެ ދަޢުވާކޮށް، އެ ދަޢުވާ ސާބިތުވުމާއި ގުޅިގެން އެމަނިކުފާނު ވަނީ 11 އަހަރަށް ޖަލަށް ލާފައެވެ. މި މައްސަލައާއި ގުޅިގެން ކާނަލް ނާޒިމް ހައްޔަރުކޮށްފައިވަނީ 2015 ވަނަ އަހަރުގެ ފެބްރުއަރީ މަހުގެ ތެރޭގައެވެ.
