އަނެއްކާވެސް ސައުދީ ޕްރިންސަކު އަވަހާރަވެއްޖެ ކަމުގެ ޚަބަރުތައް ފެތުރެން ފަށައިފި

ހެލިކޮޕްޓަރ އެކްސިޑެންޓެއްގައި ސައުދީ ޕްރިންސް މަންސޫރު ބިން މުގްރިން އަވަހާރަވިތާ 24 ގަޑިއިރު ނުވަނީސް، ސައުދީ ޝާހީ އާއިލާގެ އިތުރު ޕްރިންސަކު އަވަހާރަވިކަމުގެ ޚަބަރެއް ފެތުރެން ފަށައިފި އެވެ.

ސައުދީ ރޯޔަލް ކޯޓާ ހަވާލާދީ މި ޚަބަރު އެންމެ ފުރަތަމަ ފަތުރާފައިވަނީ އިނގިރޭސި ބަހުން ނެރޭ ނޫހެއް ކަމަށްވާ ޒީރޯ ހެޖް އިންނެވެ. މީގެ އިތުރުން، އެމެރިކާގެ ތަހުގީގީ އިދާރާ ފެޑެރަލް ބިއުރޯ އޮފް އިންވެސްޓިގޭޝަންސް (އެފްބީއައި) އާ ހަވާލާދީ ދުރާން ނޫހުންވެސް މިޚަބަރު ފަތުރާފައިވެއެވެ.

ޒީރޯ ހެޖް އިން ރިޕޯޓް ކޮށްފައިވާ ގޮތުގައި ޕްރިންސް އަބްދުލް އަޒީޒް ބިން ފަހުދު އަވަހާރަވެފައިވަނީ، ސައުދީގެ ސަލާމަތީ ބާރުތަކުން އޭނާ ހައްޔަރު ކުރުމަށް ކުރި މަސައްކަތުގައި އޭނާގެ ސެކިއުރިޓީ އޮފިޝަލުންނާއި ސައުދީ ފުލުހުންނާ ދެމެދު ހިނގި ކުރިމަތިލުންތަކެއްގަ އެވެ.

ކޮރަޕްޝަންގެ މައްސަލަތައް ތަހުގީގު ކުރުމަށް ސައުދީ ރަސްގެފާނުގެ ޝާހީ ގަރާރަކުން އުފައްދަވާފައިވާ ސައުދީ އެންޓި ކޮރަޕްޝަން ކޮމިޝަންގެ އަމުރަށް، ސައުދީ ޝާޙީ އާއިލާގެ 11 އަމީރަކާއި، 4 ވަޒީރެއްގެ އިތުރުން ސައުދީ ސަރުކާރުގެ ކުރީގެ އިސް އޮފިޝަލުންތަކަކާއި ވިޔަފާރިވެރިންތަކެއް މިދިޔަ ހޮނިހިރު ދުވަހު ހައްޔަރުކުރި އެވެ.

ޕްރިންސް އަބްދުލް އަޒީޒް ބިން ފަހުދަކީ އަވަހާރަވެފައިވާ ސައުދީ ރަސްގެފާނު ފަހުދް ބިން ބިން އަބްދުލްއަޒީޒް އަލް ސައުދުގެ އެންމެ ހަގު ދަރިކަލުންނެވެ. އުމުރުފުޅުން 44 އަހަރުގެ ޕްރިންސް އަބްދުލްއަޒީޒަކީ، މިހަފްތާގައި އިސްތިއުފާ ދެއްވި ލުބުނާނުގެ ބޮޑުވަޒީރު ސާދް ހަރީރީގެ ވިޔަފާރީގެ ބައިވެރިއެއް ކަމަށް ރިޕޯޓްތައް ބުނެއެވެ.

ހިންގުން ހުއްޓާލާފައިވާ ސައުދީ އޮގަރ ލިމިޓެޑްގެ ވިޔަފާރީގައި ޕްރިންސް އަބްދުލްއަޒީޒްގެ ބައިވެރިވުމެއް އޮންނަ ކަމަށް ޚަބަރުތައް ބުނެއެވެ. ސައުދީ އޮގަރ ލިމިޓެޑަކީ ލުބުނާނުގެ ކުރީގެ ބޮޑުވަޒީރު ހަރީރީގެ އާއިލީ ވިޔަފާރިއެކެވެ. ހޫނު މޫސުމުގައި ވިޔަފާރި ހުއްޓާލުމާ ހަމަޔަށް ވިޔަފާރި ބެލެހެއްޓެވުމުގައި ލުބުނާނުގެ ކުރީގެ ބޮޑުވަޒީރު ސާދް ހަރީރީ އިސް ދައުރެއް އަދާކުރެއްވި ކަމަށް ރިޕޯޓްތައް ބުނެ އެވެ.

ޕްރިންސް އަބްދުލްއަޒީޒް އަލް ފަހުދު އަވަހާރަވިކަމުގެ ރިޕޯޓްތަކެއް ފެތުރުނު ނަމަވެސް، ސައުދީ ރަސްމީ ފަރާތަކުން މިޚަބަރު ކަށަވަރުކޮށްދީފައެއްނުވެއެވެ. ސައުދީގެ ރަސްމީ ނޫސްތަކާއި ބައިނަލްއަޤްވާމީ ބޮޑެތި މީޑިއާތަކުން މިޚަބަރު ރިޕޯޓްކޮށްފައެއްނުވެއެވެ.

ޕްރިންސް އަބްދުލްއަޒީޒް އަލް ފަހުދު އަވަހާރަވިކަން ކަށަވަރުވެއްޖެނަމަ، އޭނާ ވެގެންދާނީ ފާއިތުވި 24 ގަޑިއިރުގެ ތެރޭގައި ދުނިޔެ ދޫކުރެއްވި ސައުދީ ޝާޙީ އާއިލާގެ ދެވަނަ އަމީރަށެވެ. މިދިޔަ އާދީއްތަ ދުވަހުގެ ރޭ ހިނގި ހެލިކޮޕްޓަރ އެކްސިޑެންޓެއްގައި ސައުދީ ޕްރިންސް މަންސޫރު ބިން މުގްރިން އަލް ސައުދު ވަނީ އަވަހާރަވެފައެވެ. އެހެންނަމަވެސް، ޕްރިންސް މަންސޫރު ދަތުރު ކުރެއްވި ހެލިކޮޕްޓަރ އެކްސިޑެންޓްވާން މެދުވެރިވި ސަބަބު އަދި ހާމައެއް ނުކުރެ އެވެ.