ނިމިދިޔަ ހަފްތާގައި ލޯކަލް ގަވަރމެންޓް އޮތޯރިޓީއިން ސަސްޕެންޑްކޮށްފައިވާ ޅ. އަތޮޅު ކައުންސިލްގެ ރައީސް މުހައްމަދު ހުސެން، ކައުންސިލުން ސަސްޕެންޑްކޮށްފައި ވަނީ ކައުންސިލްގެ ތެރެއިން ހިނގަމުންދާ ގާނޫނާ ހިލާފް ކަންތައްތަކެއް ހުއްޓުވަން އުޅުމުން ކަމަށް އޭނާ ވިދާޅުވެއްޖެއެވެ.
މުހައްމަދު ހުސެން ވިދާޅުވީ އޭނާ ސަސްޕެންޑްކުރީ ކައުންސިލްގެ ތެރޭގައި ގާނޫނާއި ހިލާފަށް، ކޮރަޕްޝަނަށް މަގުފަހިވާ ގޮތަށް ހިނގާ ކަންކަން ހުއްޓުވަން އުޅުމުން، ބައެއް ކައުންސިލަރުންނާއި މުވައްޒަފުން ސާބިތު ނުހިފޭ ދޮގު އިލްޒާމްތަކެއް އޭނަގެ ބޮލުގައި އަޅުވައި، އެލްޖީއޭއަށް މައްސަލައެއް ހުށަހަޅައިގެން ކަމަށެވެ. މުހައްމަދު ހުސެން ވިދާޅުވީ އޭނައާ ދެކޮޅަށް ދެއްކި ވާހަކަތަކަކީ ހަގީގަތެއް ނެތް ވާހަކަތަކެއް ކަމަށާއި، އެވާހަކަތަކުގެ ހަގީގަތް ވަރަށް އަވަހަށް ރައްޔިތުންނަށް ހާމަވާނެ ކަމަށެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި އަތޮޅު ކައުންސިލް އިދާރާގެ ޒިންމާދާރު ވެރިޔާގެ މައްޗަށް އެތަނުގެ މުވައްޒަފަކު ހުށަހަޅާފައިވާ ޖިންސީ ފުރައްސާރައިގެ މައްސަލައަކާއި، ކައުންސިލް އިދާރާގައި މަސައްކަތްކުރާ ޕީޕީއެމްގެ އިސް ފަރާތެއްގެ ކޮރަޕްޝަނަށް މަގުފަހިވާފަދަ އަމަލުތަކެއްގެ މައްސަލަ ކައުންސިލްގެ ތެރޭގައި ދަނީ މިހާރު ވެސް ބަލަމުންނެވެ. އަދި ޖިންސީ ފުރައްސާރައިގެ މައްސަލަ ބެލުން ލަސްވުމުގެ ސަބަބުން އެމުވައްޒަފު ސިވިލް ސަރވިސް ކޮމިޝަނަށް ވެސް އެމައްސަލަ ހުށަހެޅިއެވެ.
މިމައްސަލާގައި ސިވިލް ސަރވިސްއިން މިއަހަރުގެ ކުރީކޮޅު މައުލޫމާތު ސާފުކުރުމަށް ޅ. އަތޮޅު ކައުންސިލް އިދާރާއަށް ފޮނުވި ސިޓީގެ ޖަވާބުގައި ކައުންސިލުން އޭރު ބުނީ ތަފާތު ސަބަބުތަކާ ހެދި މައްސަލަ ބެލުން ލަސްވީ ކަމަށާއި، މައްސަލަ އަދިވެސް ދަނީ ބަލަމުން ކަމަށެވެ. އެހެން ނަމަވެސް އަދި މިހާތަނަށް އެމައްސަލަ ނިންމާފައިނުވާ ކަމަށް އެނގިފައި ވެއެވެ.
މީގެ އިތުރުން ކައުންސިލްގެ ރައީސްއާ ދެކޮޅަށް ބައެއް ފަރާތްތަކުން މައްސަލަ ހުށަހަޅާފައި ވަނީ ކައުންސިލް އިދާރާގައި މަސައްކަތްކުރާ ޕީޕީއެމްގެ އިސް ފަރާތެއް، އޮފީހުގައި ހޭދަކުރާ ވަގުތު މަދުވުމުގެ ސަބަބުންނާއި ގަވާޢިދާ ހިލާފަށް ކުރަމުންދާ ބައެއް ކަންތައްތަކުގެ ސަބަބުން ފިޔަވަޅު އެޅި ފަހުން ކަމަށް އެނގިފައި ވެއެވެ.
