ސައުދީ އެންޓި ކޮރަޕްޝަން ކޮމިޓީގެ އަމުރަށް ހައްޔަރު ކޮށްފައިވާ ބޭފުޅުންގެ ތެރޭގައި ސައުދީ މަހުޖަނު ޕްރިންސް އަލްވަލީދު ބިން ތަލާލް ހިމެނޭ ކަމަށް ސައުދީ އޮފިޝަލަކު ކަށަވަރުކޮށްދީފި އެވެ.

ނަން ހާމަކުރުމަށް އުޒުރުވެރިވާ ސައުދީގެ އިސް އޮފިޝަލަކާއި ހަވާލާދީ ރޮއިޓަރސް އިން ބުނީ، ސައުދީ ވަލީ އަޙުދު މުޙައްމަދު ބިން ސަލްމާންގެ ރިޔާސަތުގައި އިންނަވާ ސައުދީ އެންޓި ކޮރަޕްޝަން ކޮމިޓީގެ އަމުރަށް ހައްޔަރުކޮށްފައިވާ ބޭފުޅުންގެ ތެރޭގައި ސައުދީ އިންވެސްޓްމަންޓް ކުންފުނި، ކިންގްޑަމް ހޯލްޑިންގެ ވެރިޔާ އަދި ބިލިއަނަރ ޕްރިންސް އަލްވަލީދު ބިން ތަލާލްގެ އިތުރުން ކުރީގެ މާލީ ވަޒީރު އިބްރާހިމް އަލް-އައްސާފް ހިމެނިވަޑައިގަންނަވާ ކަމަށެވެ.

އަލްވަލީދުގެ ކިންގްޑަމް ހޯލްޑިންގް އަކީ އެމެރިކާގެ ބޭންކެއް ކަމަށްވާ ސިޓީގްރޫޕްގެ މައި ހިއްސާދާރެކެވެ. މީގެ އިތުރުން ކިންގްޑަމް ހޯލްޑިންސްގެ ޙިއްސާ ހިމެނޭ އެހެން ވިޔަފާރިތަކުގެ ތެރޭގައި ނިއުސް ކޯޕް، ޓްވިޓަރ، ފަދަ ކުންފުނިތައް ހިމެނެއެވެ.

ދުނިޔޭގެ އެންމެ މުއްސަނދި މަހުޖަނުންގެ ތެރޭގައި ހިމެނޭ ޕްރިންސް އަލްވަލީދު ބިން ތަލާލް އަކީ، ސައުދީ އަރަބިއްޔާގެ ފައުންޑަރ އަދި ފުރަތަމަ ރަސްގެފާނު އަބްދުލްއަޒީޒް އަލް ސައުދު (އިބްނި ސައުދު) ގެ 12 ވަނަ ދަރިކަލުން ތަލާލް ބިން އަބްދުލްއަޒީޒް އަލް ސައުދުގެ ބޭކަލެކެވެ. އަލްވަލީދު މަންމާފުޅަކީ ލުބުނާނުގެ ފުރަތަމަ ބޮޑުވަޒީރު ރިއާދް އަލް ޞާލިޙްގެ ދަރިކަނބަލުން މޮނާ އަލް ޞާލިޙެވެ.

ކޮރަޕްޝަންގެ ތުހުމަތުގައި ހައްޔަރު ކޮށްފައިވާ އެހެން ވިޔަފާރިވެރިންގެ ތެރޭގައި މިޑްލް އީސްޓް ބްރޯޑްކާސްޓިން ކޮމްޕެނީ (އެމްބީސީ) ގެ ޗެއަރމަން އަދި ސައުދީ ބިލިއަނަރު ވަލީދު ބިން އިބްރާހިމް އަލް އިބްރާހިމް އަދި، ދައްލާ އަލް ބަރަކާ ގްރޫޕްގެ ޗެއަރމަން ސާލިހް އަބްދުﷲ ކަމާލް ހިމެނެއެވެ.

ސައުދީ ރަސްގެފާނު ސަލްމާން ބިން އަބްދުލްއަޒީޒުގެ ޝާޙީ ޤަރާރަކުން ހޮނިހިރު ދުވަހު އެކުލަވާލި ސައުދީ އެންޓި ކޮރަޕްޝަން ކޮމިޓީގެ އަމުރަށް ސައުދީ ޝާހީ އާއިލާގެ 11 އަމީރަކާއި، 4 ވަޒީރެއްގެ އިތުރުން ކުރީގެ 10 ވަޒީރަކާއި ވިޔަފާރިވެރިންތަކެއް ހައްޔަރުކޮށްފައިވާ ކަމަށް ރިޕޯޓްތައް ބުނެއެވެ. އެހެން ނަމަވެސް މިބޭފުޅުން ހައްޔަރުކޮށްފައިވަނީ ކޮރަޕްޝަންގެ ކޮން މައްސަލައަކާއި ގުޅިގެން ކަމެއް، އަދި ހައްޔަރުކޮށްފައިވަނީ ކޮން ބޭފުޅުންނެއް ކަމެއް ސައުދީ އަރަބިއްޔާގެ ރަސްމީ ފަރާތްތަކުން ހާމަކޮށްފައެއްނުވެއެވެ.

ކޮރަޕްޝަންގެ މައްސަލަތަކާއި ގުޅިގެން ބޮޑެތި ބާރުތަކާއެކު އެކުލަވާލި މިކޮމިޓީގެ ޗެއަރމަނަކަށް އައްޔަން ކޮށްފައިވަނީ ވަލީއަޙުދު މުޙައްމަދު ބިން ސަލްމާން އެވެ. މިކޮމިޓީގައި ދެން ތިއްބަވަނީ ސައުދީ ނޭޝަނަލް އެންޓި ކޮރަޕްޝަން އޮތޯރިޓީގެ ޗެއަރމަން، ޖެނެރަލް އޯޑިޓް ބިއުރޯގެ ޗެއަމަންގެ އިތުރުން އެޓާނީ ޖެނެރަލް އަދި ދައުލަތުގެ ސަލާމަތާއިބެހޭ އިސްވެރިޔާ އެވެ.

މިކޮމިޓީ އަށް ދީފައިވާ ބާރުތަކުގެ ތެރޭގައި ތަހުގީގު ހިންގުމާއި، ހައްޔަރު ކުރުމާއި، ގައުމުން ބޭރަށް ފުރުން މަނާ ކުރުމާއި، އެކައުންޓްތައް ފްރީޒް ކުރުމާއި، މަގާމްތަކުން ސަސްޕެންޑް ކުރުން އަދި ފައިސާގެ މުއާމަލާތްތަކާއި، މުދާ ހޯދާފައިވާ ގޮތުގެ ތަފްސީލް ހޯދުން ހިމެނެއެވެ.

އަލަށް އެކުލަވާލި ސައުދީ އެންޓި ކޮރަޕްޝަން ކޮމިޝަނުން ތަހުގީގު ފަށާފައިވާ މައްސަލަތަކުގެ ތެރޭގައި ހިމެނެނީ 2009 ވަނަ އަހަރު ޖިއްދާގައި ފެންބޮޑުވުމުގެ މައްސަލައާއި، 2012 ވަނަ އަހަރު ސައުދީ އަރަބިއްޔާގައި މާރސް ވައިރަސް ފެތުރުމުގެ ހާދިސާ އާއި ގުޅުންހުރި މައްސަލަތަކެއް ކަމަށް އަލް އަރަބިއްޔާ އިން ރިޕޯޓް ކުރެއެވެ.