ދިވެހި ޤައުމަށް ޚިޔާނާތްތެރިވެފައިވާ ބަޔަކު މިއަދުވެސް އަޅުގަނޑުމެންގެ މިނިވަން ޖައްވަށް ނޭވާލަމުންދާކަމަށް ދިފާޢީ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ނަސްރުގެ ދުވަހުގެ މުނާސަބަތުގައި ހުކުރު ދުވަހުރޭ ސިފައިން ބޭއްވި ރަސްމީ ޖަލްސާގައި ވާހަކަ ދައްކަވަމުން މިނިސްޓަރ އާދަމް ޝަރީފް ވިދާޅުވީ އަޅުގަނޑުމެން މިނިވަންކަމުގެ ފަޚުރު ލިބިގަންނަމުންދާއިރު، ޤައުމުގެ މިނިވަންކަމާއި އިސްތިޤްލާލު ނަގާލުމަށް އަދި ޤާނޫނީ ގޮތުން އުފެދިފައިވާ ސަރުކާރު ވައްޓާލުމަށް މަސައްކަތް ކުރަމުންދާ ބަޔަކު ތިބިކަން ހަނދާންކުރަން ޖެހޭކަމަށެވެ. އަދި އެފަދަ ކޮންމެ  ފަހަރަކު ވެސް އޭރަކު ވެރިކަމުގައި ހުންނަވާ ބޭފުޅަކު އެކަމަކާއި ކުރިމަތިލައްވާ ކާމިޔާބު ކުރައްވާ ކަމަށް މިނިސްޓަރ ވިދާޅުވިއެވެ.

ތާރީޚުގައި ހިނގާފައިވާ ބައެއް ކަންކަމަށް އިޝާރާތް ކުރައްވަމުން މިނިސްޓަރ އާދަމް ޝަރީފް ވިދާޅުވީ ދިވެހިރާއްޖޭގެ މިނިވަން ކަމަށް ކުރިމަތިވެދާނެ އެއް ނުރައްކަލަކީ ލާދީނި ފިކުރާއި ހައްދުފަހަނައަޅައި ދިޔުމުގެ ފިކުރު ފެތުރިގެން ދިޔުމެވެ. އެހެންކަމުން ދިވެހިންނަކީ އިސްލާމްދީނުގެ ތަރަހައިގެ ތެރޭގައި ތިބި ބަޔަކަށްވުމަށް ގަދައަޅާ މަސައްކަތްކުރަން ޖެހޭކަމަށް މިނިސްޓަރ ވިދާޅުވިއެވެ. އަދި އިސްލާމްދީން ނޫން ދީންތައް ފެތުރުމަށް ކުރެވޭ މަސައްކަތްތަކާއި ހައްދުފަހަނައަޅައި ދިޔުމުގެ ފިކުރު އަށަގެންނެވުމަށް ކުރެވޭ މަސައްކަތްތަކަށް ކަމާއި ބެހޭ މުއައްސަސާތަކުން ހުށިޔާރުވާން ޖެހޭ ކަމަށް ވިދާޅުވިއެވެ.

1988ވަނަ އަހަރުގެ ނޮވެމްބަރު މަހުގެ 3ވަނަ ދުވަހުގެ ރާއްޖެއަށް ދިން އުދުވާނީ ހަމަލާގައި ދިވެހިން ހޯދި ނަސްރު ފާހަގަ ކުރުމަށް ބޭއްވި  މިހަފްލާގައި ވާހަކަ ދައްކަވަމުން ނޭޝަނަލް ކައުންޓަރ ޓެރަރިޒަމް ސެންޓަރުގެ ޑިރެކްޓަރ ޖެނެރަލް ބްރިގޭޑިއަރ ޖެނެރަލް ޒަކަރިއްޔާ މަންސޫރު ވިދާޅުވީ ދިވެހިންނަށް، ޤައުމެއް އެއްބައިކުރުވާނެ ހުރިހާ ރުކުންތަކެއް ﷲ ސުބްޙާނަހޫ ވަތަޢާލާ ރަހުމަތެއްގެ ގޮތުގައި ތަނަވަސްކޮށްދެއްވާފައިވާ ކަމަށެވެ. އަދި ބައިބައިކުރުވާނެ ހުރިހާ ކަމެއް ދުރުކުރައްވާފައިވާ ކަމަށެވެ. އެހެންކަމުން ޝުކުރުވެރިކަމާއިއެކު އެކަން ބަލައިގަންނަން ޖެހޭކަމަށް ޖެނެރަލް ޒަކަރިއްޔާ މަންސޫރު ވިދާޅުވިއެވެ. ރީތި ގޮނޑޮދޮށްތަކަކާއި ޤުދުރަތީ ރީތިކަން ލިބިފައިވި ނަމަވެސް ބައިބައިވުން އުފެދުމުން ޤައުމަކަށް ދިމާވާނެ މައްސަލަތަކުގެ މިސާލަކަށް އޭނާ ނެންގެވީ  އަވަށްޓެރި ސްރީލަންކާއެވެ. ޖެނެރަލް ޒަކަރިއްޔާ މަންސޫރު ވިދާޅުވީ ބައިބައިކުރުމުގެ  އަސަރުތައް ރާއްޖެއިން ފެންނަން ފަށައިފިކަމަށާއި، އަސްކަރިއްޔާގައި އެވާހަކަ ދެކެވެން ޖެހޭކަމަށެވެ. އަދި އެމައްސަލަތަކަށް ހައްލު ނުހޯދިއްޖެނަމަ އެކަންކަމާއި ދޭތެރޭ އެހެން ގޮތަކަށް އަމަލު ކުރަން ޖެހިދާނެ ކަމަށް އޭނާ ވިދާޅުވިއެވެ.

ނަސްރުގެ ދުވަހުގެ ޖަލްސާގައި ވާހަކަ ދައްކަވަން  ޖެނެރަލް ޒަކަރިއްޔާ މަންސޫރު ކޮމްބެންޓް ޔުނިފޯމް ތުރުކުރައްވައިގެން ހުންނެވއިރު، އެމަނިކުފާނުގެ ކަނާތުގެ ކޮނޑުގައި ހަރުކޮށްފައިވާ ދިވެހި ދިދަ އެކޮޅުކޮޅުން ހަރުކޮށްފައި ވާތީ ބައެއް ފަރާތްތަކުގެ ފާޑުކިޔުންތައް އަމާޒުވިއެވެ.