ޑޮނަލްޑް ޓްރަމްޕްގެ އޭޝިއާ ދަތުރުފުޅު ފައްޓަވައިފި

25 އަހަރުތެރޭ އެމެރިކާގެ ރައީސަކު އޭޝިއާއަށް ކުރައްވާ އެންމެ ދިގު ދަތުރުފުޅު އެމެރިކާގެ ރައީސް ޑޮނަލްޑް ޓްރަމްޕް ފައްޓަވައިފިއެވެ.

އުތުރު ކޮރެއާއާއި އެމެރިކާއާއި ދެމެދު އޮންނަ ގުޅުން އިންތިހާއަށް ގޯސްވެފައިވާ މިދަނޑިވަޅުގައި ޓްރަމްޕް ކުރައްވާ މިދަތުރުފުޅަކީ އެމެރިކާއާއި އޭޝިއާގެ ޤައުމުތަކުގެ ގުޅުންތަކަށް ވަރަށް މުހިއްމު ދަތުރުފުޅެކެވެ.

ވޮޝިންޓަނުން ޓްރަމްޕް އެންމެ ފުރަތަމަ ވަޑައިގެންފައިވަނީ ޕެސިފިކްގައި އޮންނަ އެމެރިކާގެ ޖަޒީރާ ސްޓޭޓް ހަވާއީއަށެވެ. އެތަނުގައި އެމެރިކާގެ ޕެސިފިކް ކޮމާންޑްގެ އިސްވެރިންނާއި ބައްދަލުކުރައްވައި، ޓްރަމްޕްވަނީ ޕެސިފިކް ކޮމާންޑްގެ އަސްކަރީ އޮޕަރޭޝަންތަކާއި އެސަރަހައްދުގެ ޙާލަތާއި ބެހޭ އެންމެ ފަހުގެ މައުލޫމާތު ހޯއްދަވާފައެވެ. ހަވާއީއިން ޓްރަމްޕް އަދި އަނބިކަނބަލުން މެލާނިއާ ޓްރަމްޕް ވަޑައިގަންނަވާނީ ޖަޕާނަށެވެ. އަދި އެއަށްފަހު ދެކުނު ކޮރެއާއަށެވެ. ޖަޕާނަށް ވަޑައިގެން އެޤައުމުގެ ބޮޑުވަޒީރު ޝިންޒޯ އަބޭއާއި އެކު ބާއްވަވާ ރަސްމީ ވާހަކަތަކުގެ އިތުރުން ދެބޭފުޅުން ގޮލްފް ކުޅުއްވުމަށް ހަމަޖެހިފައިވެއެވެ. އުތުރު ކޮރެއާއަށް ބަހުގެ ހަމަލާތައް ޓްރަމްޕް ފޮނުއްވަމުން ގެންދަވާއިރު، މިދަތުރުފުޅުގައި ދެކޮރެއާ ގުޅޭ ސަރަހައްދީ ރޮނގު، ޑީއެމްޒީ، އަށް ޓްރަމްޕް ޒިޔާރަތް ނުކުރައްވާނެއެވެ. ބަރުހަތިޔާރާއުއެކު ދެފަރާތުން ސަލާމަތީ ކަންކަން ބަލަހައްޓާ މި ސަރަހައްދީ އިމުގެ ދެކުނު ކޮރެއާ ފަޅީގައި އެޤައުމުގެ ސިފައިންނާއިއެކު އެމެރިކާ ސިފައިން ޤާއިމްވެ ތިބެއެވެ. ޑީއެމްޒީއަށް ޒިޔާރަތް ނުކުރެއްވި ނަމަވެސް ދެކުނު ކޮރެއާގެ ވެރިރަށް ސޯލްގެ ދެކުނުން އޮންނަ ކޭމްޕް ހަމްފްރީޒްއަށް ޓްރަމްޕް ޒިޔާރަތް ކުރައްވާނެއެވެ. މިއީ ދެކުނު ކޮރެއާގައި ޤާއިމްކޮށްފައިވާ އެމެރިކާގެ އަސްކަރީ މަރުކަޒަކެވެ.

ދެކުނު ކޮރެއާއަށް ފަހު ޓްރަމްޕް ދެން ވަޑައިގަންނަވާނީ އަސްކަރީ އަދި އިޤްތިޞާދީ ގޮތުން ވާދަވެރި ޗައިނާއަށެވެ. މި ޒިޔާރަތުގައި ޗައިނާގެ ރައީސް ޝީޖިންގްޕިންގް އާއި ޓްރަމްޕް ބައްދަލު ކުރައްވާނެއެވެ.

ޗައިނާއަށްފަހު ޓްރަމްޕް ވަޑައިގަންނަވާނީ ވިއެޓްނާމަށެވެ. މިޒިޔާރަތުގައި ވިއެޓްނާމްގެ ޑަނަންގްގައި ބާއްވާ އޭޝިއާ ޕެސިފިކް ސަރަހައްދުގެ އިޤްތިޞާދީ އެއްބާރުލުމާއި ބެހޭ ސަމިޓެއްގައި ބައިވެރިވެވަޑައިގަންނަވާނެއެވެ. އަދި އެއަށް ފަހު ހަނޯއީއަށް ރަސްމީ ޒިޔާރަތެއް ކުރައްވާނެއެވެ.

11 ދުވަހުގެ މިދަތުރުފުޅު ޓްރަމްޕް ނިންމަވާލައްވާނީ ފިލިޕީންސްއިންނެވެ. ފިލިޕީންސްގައި އެޤައުމުގެ ރައީސް ރޮޑްރިގޯ ޑުޓާޓޭއާއި ޓްރަމްޕް ބައްދަލު ކުރެއްވުމަށް ހަމަޖެހިފައިވާއިރު، ފިލިޕީންސްގެ ވެރިރަށް މެނީލާގައި ބާއްވާ އިރުމަތީ އޭޝިއާގެ ޤައުމުތަކުގެ ސަމިޓްގައި ޓްރަމްޕް ބައިވެރިވެވަޑައިގަންނަވާނެއެވެ.

އޭޝިއާގެ ޤައުމުތަކަށް މިފަދަ ދިގު ދަތުރުފުޅެއް އެންމެ ފަހުން ކުރެއްވި އެމެރިކާގެ ރައީސަކީ ކުރީގެ ރައީސް ޖޯޖް ބުޝްއެވެ. 1991ވަނަ އަހަރުގެ ފަހުކޮޅު ކުރެއްވި މިދަތުރުފުޅުގައި ޖަޕާނުގައި ބޮލަށް އެނބުރުން އަރާވަޑައިގެން ބުޝް ވެއްޓިވަޑައިގަތްއިރު، ރަސްމީ ޖާފަތެއްގައި ހޮޑުލެއްވިއެވެ.