ހާމިދު އިސްމާއިލަށް ދީފައި އޮތް ފަޅެއް ޓޫރިޒަމް މިނިސްޓްރީން ބިޑަށް ލައިފި!
ހާމިދުގެ ކުންފުނިން އެފަޅުގެ ބައެއް ހިއްކައި، ތަރައްޤީކުރަން ވަނީ ފަށާފައި
ދިއްފުށިފަޅު. ހިއްކާފައި އޮތް ސަރަހައްދު (ކ) އަދި ކައިރިން ކ. ތުލުސްދީ (ވ)
އެމްއެމްޕީއާރްސީގެ ޚިޔާނާތުގެ މައްސަލައިގައި ޝާމިލްވާކަމަށް ސާބިތުވެ ޖަލު ހުކުމެއް ތަންފީޒްކުރަމުންދާ މ. ޝުރާމަންޒިލް ހާމިދު އިސްމާއިލްއަށް ކުއްޔަށް ދޫކޮށްފައިވާ މާލެ އަތޮޅު ދިއްފުށިފަޅު ހިއްކުމުގެ މަސައްކަތް ކުރިއަށްދަނިކޮށް ޓޫރިޒަމް މިނިސްޓްރީއިން އެފަޅު ކުއްޔަށް ދިނުމަށް ބިޑަށް ލައިފިއެވެ.
ހާމިދު އިސްމާއިލްގެ އާއިލާއިން ބުނީ ދިށްފުށިފަޅު އަލުން ބޮޑަށް ލުމަކީ ބަލައިގަނެވޭނެ ކަމެއް ނޫންކަމަށެވެ. މާލެ އަތޮޅު ދިއްފުށި ފަޅަކީ 50 އަހަރުގެ މުއްދަތަކަށް ހާމިދަށް ކުއްޔަށް ދޫކޮށްފައިވާ ފަޅެކެވެ. އަދި އެފަޅު ހިއްކުމުގެ މަސައްކަތް މިހާރުވެސް ކުރަމުންދާކަމަށް އާއިލާގެ ފަރާތުން ބުނެއެވެ.
ހާމިދުގެ އާއިލާއިން ބުނީ އެތަނަށް ދައްކަން ޖެހޭ ހުރިހާ ފައިސާއެއް ދައްކައި، ހުރިހާ މުއާމަލާތެއްވަނީ ކޮށް ނިމިފައިކަމަށެވެ. އަދި ދިއްފުށިފަޅުގެ ބޮޑު ބައެއް ހިއްކާފައިވާއިރު، ހިއްކި ބިން ތަރައްޤީކުރުމަށްވެސް މިހާރުވެސް ބޮޑެތި ހޭދަތަކެއް ކޮށްފައިވާކަމަށް އާއިލާއިން ބުނެއެވެ.
ޓޫރިޒަމް މިނިސްޓްރީއިން މި ފަޅު ކުއްޔަށް ދިނުމަށް ބައިނަލްއަޤްވާމީ ބިޑަށް ހުޅުވާލާފައިވަނީ ނޮވެމްބަރު 2ވަނަ ދުވަހުއެވެ. އަދި ބިޑް ޑޮކޮއުމަންޓްތައް ހުށަހެޅުމަށް ހަމަޖައްސާފައިވާ ތާރީޚަކީ ނޮވެމްބަރު 16ވަނަ ދުވަހެވެ. މިފަޅުގެ ބާކީ އޮތްބައި ހިއްކައި، ތަރައްޤީކޮށް 50 އަހަރަށް ރިޒޯޓެއް ހިންގުމަށް ކުއްޔަށް ދޫކުރުމަށް ހުށަހަޅަން ޖެހޭ އެންމެ ދަށް އަގަކީ 5 މިލިއަން އެމެރިކާ ޑޮލަރެވެ.
ހާމިދުގެ އާއިލާއިން ބުނީ ހާމިދު އިސްމާއީލް ނުވަތަ އޭނާ ހިއްސާވާ ކުންފުނިތަކާއި ދިވެހި ސަރުކާރާއެކު ވެފައިވާ އެއްބަސްވުންތަކުގެ ދަށުން ދޫކޮށްފައިވާ ގިނަ ތަންތަން އެއްބަސްވުމާއި ޚިލާފަށް ނަގަމުންދާކަމަށެވެ. އަދި އެކަމުގެ ސަބަބުން ފޫނުބެއްދޭވަރުގެ ބޮޑެތި ގެއްލުންތަކެއް ލިބެމުން އަންނަކަމަށް އާއިލާއިން ބުނެއެވެ. އަދި ހާމިދު އެންމެހާ ވިޔަފާރިތަކަކީ ގިނަ އަހަރުތަކެއްގެ ތެރޭގައި ހާމިދުގެ ބުރަ މަސައްކަތުން ހޯދި ހަލާލު ފައިސާއިން ހިންގާ ވިޔަފާރިތަކެއްކަމަށްވެސް އާއިލާއިން ބުނެއެވެ.
