ނިއު ޔޯކްގެ ލޯވާ މެންހަޓަންގެ ބައިސިކަލް ދުއްވަން ހާއްސަ ސަރަހައްދެއްގައި ޓްރަކެއް ބޭނުންކޮށްގެން ދިން ހަމަލާގައި ތުހުމަތު ކުރެވޭ މީހާ އަށް މަރުގެ އަދަބު ދިނުމަށް ރައީސް ޑޮނަލްޑް ޓްރަމްޕް ގޮވާލެއްވުމަކީ، އޭނާ އަށް އިންސާފުވެރި ޝަރީއަތެއް ލިބުމަށް އެޅޭ ހުރަހެއް ކަމަށް ގާނޫނީ މާހިރުން ވިދާޅުވެއްޖެއެވެ.

ރައީސް ޓްރަމްޕް ކުރެއްވި ޓްވީޓެއްގައި ވިދާޅުވީ "ނިއު ޔޯކް ގެ ޓެރަރިސްޓު ބާއްވާފައި އޮތް އޭނާގެ ހޮސްޕިޓަލުގައި އައިސިސްގެ ދިދަ ބަހައްޓަން އޭނާ އުފަލުން ބުނެފައިވެއެވެ. އޭނާ ވަނީ އަށް މީހުން މަރާލާ 12 މީހަކު ޒަޚަމްކޮށްފައެވެ. އޭނާ އަށް މަރުގެ އަދަބު ދޭން ޖެހެއެވެ."

އެމެރިކާގެ "ނިއު ޔޯކް ލޯ ސްކޫލް" ގެ ލޯ ޕްރޮފިސަރެއް ކަމަށްވާ އަނާ ކޮމިންސްކީ ވިދާޅުވީ ޓްރަކް ހަަމަލާދިން ކަމަށް ތުހުމަތު ކުރެވޭ މީހާއާ މެދު، ޝަރީއަތް ފެށުމުގެ ކުރިން އޭނާގެ މައްޗަށް މަރުގެ އަދަބު ދޭން ޖެހޭނެ ކަމަށް އެމެރިކާގައި ހުރި އެންމެ ބާރުގަދަ ފަރާތުން ވިދާޅުވުމަކީ ފަނޑިޔާރުންނަށް ޔަގީނުންވެސް ނުފޫޒު ފޯރާނެ ކަމެއް ކަމަށެވެ. 

ފްލޮރިޑާގެ ލޯ ފާމެއް ކަމަށްވާ "ބޮޑިފޯޑް ލޯ" ގެ ގާނޫނީ ވަކީލެއް ކަމަށްވާ ގެނޮޮން ކޮއެންސް ވިދާޅުވީ  ޓްރަމްޕް ވިދާޅުވި ބަސްފުޅުގެ ސަބަބުން އޭނާ ތުހުމަތު ކުރާ މީހާ ދިފާއުކޮށްދޭން ޖެހުނުނަމަ އެކަން ކޮށްދިނުމަށް ޝައުގުވެރިކަމެއް ނުހުންނާނެ ކަމަށާއި ވަރަށް ބޮޑަށް، މަސައްކަތް އުނދަގޫވެގެން ދާނެ ކަމަށެވެ. އަދި ރައީސް ޓްރަމްޕަކީ ހަމަނުޖެހުން އުފައްދާ ފަރާތެއް ކަމަށެވެ. 

ހަމަލާ ދިން ކަމަށް ތުހުމަތު ކުރެވޭ ސައިފުﷲ ސައިޕޯވް އަށް ވަނީ އަށް މީހުން މަރުވި ހާދިސާ ގައި ދައުވާ އުފުލާފައެވެ. އަދި އޭނާގެ މައްޗަށް އިތުރު ދައުވާއެއް ވެސް ކުރެވެއެވެ. އެއީ ހަނގުރާމަވެރި ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) އަށް  ތަކެއްޗާއި ވަސީލަތްތައް ފޯރުކޮށްދޭ ކަމުގެ ތުހުމަތު ގައި ކުރެވޭ ދައުވާއެވެ. 

ނިއު ޔޯކްގެ ގަވަނާ އެންޑްރޫ ކޯމޯ ބުދަ ދުވަހު ވިދާޅުވީ ހަަމަލާ ދިން ކަމަށް ތުހުމަތު ކުރެވޭ ސައިފުﷲ ސައިޕޯވް އަކީ އުޒްބަކިސްތާނަށް ނިސްބަތްވާ ޓްރަކް ޑްރައިވަރެއް ކަމަށާ އޭނާ ހައްދުފަހަނައަޅައި ދިޔައީ އިންޓަނެޓުގައި ހުރި އައިސިސްގެ ޕްރޮޕަގަންޑާގެ ސަބަބުން ކަމަށާ، ޓްރެއިނިން ކޭމްޕަކަށް ދިޔުމުގެ ސަބަބުން ނޫން ކަމަށެވެ. 

ސައިފުﷲ ސައިޕޯވް ނަމަކަށް ކިޔާ އެ މީހާ އަކީ 2010 ވަނަ އަހަރު އެމެރިކާއަށް ހިޖުރަކޮށްފައިވާ މީހެެއް ކަމަށް ރިޕޯޓުތައް ބުނެއެވެ. ގާނޫނު ތަންފީޒު ކުރާ އިދާރާތަކުން ބުނެފައިވާ ގޮތުގައި ހަމަލާދޭން ބޭނުން ކުރި ޕިކަޕުގެ ތެރެއިން އައިއެސް ޖަމާއަތުގެ ނޯޓެއް ފެނިފައިވެއެވެ.