ރާއްޖެއިން އުމުރާއަށް މީހުން ގެންގޮސްދޭން ބޭނުންވާ ގުރޫޕްތަކުން އަހަރަކު ސަރުކާރަށް 24,000ރ. ދައްކަން ޖެހޭ ގޮތަށް ކަނޑައަޅައި ދިވެހިރާއްޖެއިން އުމުރާއށް މީހުން ގެންދިއުމާ ބެހޭ އުސޫލު ގެޒެޓްގައި ޝާއިއު ކޮށްފިއެވެ.

އެ އުސޫލުގައި ބުނެފައިވާ ގޮތުގައި އުމުރާއަށް މީހުން ގެއްދިއުމުގެ ހުއްދަ ދޫކުރެވޭނީ އެކަމަށް ފުރުސަތު ހުޅުވާލުމުން ހުއްދައަށް އެދި ހުށަހަޅާ ކުންފުނިތަކުގެ ތެރެއިން ޝަރުތު ފުރިހަމަވާ ކުންފުނިތަކަށް ކަމަށެވެ. އެގޮތުން ކަނޑައަޅާފައިވާ ޝަރުތުތަކުގެ ތެރޭގައި ރާއްޖެއިން އުމްރާއަށް މީހުން ގެންދިއުމުގެ ހުއްދަ ދޫކުރެވޭނީ ރަޖިސްޓްރީ ފީއެއްގެ ގޮތުގައި ކޮންމެ މަސްދުވަހަކަށް 2,000ރ.ގެ ރޭޓުން އަހަރަކަށް 24,000 ރުފިޔާ ދައްކާފައިވާ ކުންފުނިތަކަށް ކަމަށެވެ. އަދި ހުއްދަ ދޫކުރެވޭނީ ވެސް އެއް އަހަރު ދުވަހަށެވެ.

އިތުރު ޝަރުތުތަކުގެ ތެރޭގައި 100 ޕަސެންޓް ދިވިހިންގެ ހިއްސާ އޮންނަ ކުންފުންޏަކަށް ވުމާއި އުމުރާއަށް މީހުން ގެންދިއުމަށާއި ހައްޖަށް މީހުން ގެންދިއުމަށް މީހުން އަތުން އުސޫލާ ޚިލާފަށް ފައިސާ ނަގާފައިވާ ފަރާތްތަކާއި އުމުރާ އާއި ހައްޖު ފައިސާއަށް ޚިޔާނާތްތެރިވެފައިވާކަން ސާބިތުވެފައިވާ ފަރާތެއް ކުންފުނީގެ ޑިރެކްޓަރުންގެ ބޯޑުގައި ހިމެނިފައި ނުވުމާއި އެފަދަ މައަސަލައެއްގެ ޝަރުއީ ކޯޓެއްގައި ހިނގަމުންދާ ފަރާތެއް ވެސް ކުންފުނީގެ ބޯޑުގައި ހިމެނިފައި ނުވުން ހިމެނެއެވެ.

މީގެ އިތުރުން ހުއްދައަށް އެދޭ ކުންފުނީގެ ޑައިރެކްޓަރުންނަކީ ހުއްދައަށް އެދި ހުށަހަޅާ ދުވަހާ ހަމައަށް ޖިނާއީ ކުށެއްގެ ހުކުމެއް ތަންފީޒް ކުރަމުންދާ ނުވަތަ ކޮށްފައިވާ މީހެއް ކަމުގައި ނުވުމާއި ޖިނާއީ ކުށްތަކުގެ ތެރެއިން ފައިސާގެ ޚިޔާނާތާބެހޭ އެއްވެސް މައްސަލައެއްގެ ތުހުމަތު ކުރެވިފައިވާ ފަރާތެއް ކަމުގައި ނުވުން ވެސް ޝަރުތުތަކުގެ ތެރޭގައި ހިމެނެއެވެ.

މި ޝަރުތު ތަކާ އެކު ކުންފުނިތަކުން ހުށަހަޅާ ޕްރޮޕޯސަލްތައް އިވެލުއޭޓް ކުރުމަށް ހަމަޖެހިފައި ވަނީ އިސްލާމިކް މިނިސްޓްރީން ކަނޑައަޅާ ތިން މެންބަރުންގެ ކޮމެޓީއަކުންނެވެ.

މިހާރު މިއުސޫލަށް ޢަމަލް ކުރަން ފަށާފައިވާއިރު މީގެ ކުރިން ހުއްދަ ދޫކޮށްފައިވާ ކުންފުނިތަކުގެ ހުއްދަ ތިން މަސް ދުވަސް ފަހުން ބާތިލް ވާނެ ކަމަށް ވެސް ވަނީ މި އުސޫލުގައި ކަނޑައަޅާފައެވެ.

އާ އުސޫލުގެ ދަށުން ކުންފުނިތަކަށް ސަރުކާރަށް އަހަރަކު 24,000ރ. ދައްކަން ޖެހޭއިރު މީގެ ކުރިން އެއްވެސް ފައިސާއެއް ސަރުކާރަށް ދައްކާކަށް ނުޖެހެއެވެ.