ޕެރިސް މާސްޓާސް: ދުނިޔޭގެ ރޭންކިންގެ އެއްވަނަ ނަދާލް ކަށަވަރުކޮށްފި

ޕެރިސް މާސްޓާސްގެ ފުރަތަމަ މެޗު ކާމިޔާބުކޮށް ދުނިޔޭގެ ރޭންކިންގެ އެއްވަނަ ސްޕެއިންގެ ރަފައޭލް ނަދާލް ކަށަވަރު ކޮށްފިއެވެ.

ފްރާންސްގެ ޕެރިހުގައި މިހާރު ކުރިޔަށްދާ އެޓީޕީ ވޯލްޑް ޓުއާގެ ޕެރިސް މާސްޓާސްގެ ދެވަނަ ބުރުގައި ނަދާލް ވަނީ ދެކުނު ކޮރެއާގެ ހިޔޮން ޗޮންގް ސީދާ ދެ ސެޓުން ބަލިކޮށްފައެވެ. އެއް ގަޑިއިރާ 48 މިނެޓަށް ދިގު ދެމިގެންދިޔަ މި މެޗުގެ ސެޓުތަށް ނަދާލް ގެންގޮސްފައިވަނީ 7-5 އަދި 6-3 އިންނެވެ.

މި މެޗުން މޮޅުވުމާއެކު މިއަހަރު ނިންމާލާއިރު ނަދާލްއަށް ވަނީ ދުނިޔޭގެ ރޭންކިންގެ އެއްވަނަ ކަށަވަރު ކޮށްފައެވެ. އެގޮތުން ނަދާލްއަށް އެއްވަނަ ކަށަވަރު ވެގެން ދިޔައީ ދެވަނައިގައި އޮތް ސުވިޓްޒަލޭންޑުގެ ރޯޖާ ފެޑެރާ މި މުބާރާތުގައި ވާދަ ނުކުރަން ނިންމުމާ ވިދިގެންނާ މި މަހުގެ 12 ވަނަ ދުވަހު ލަންޑަންގައި ފަށާ އޭޓީޕީ ވޯލްޑް ޓުއާ ފައިނަލްސް ފެޑެރާ ކާމިޔާބު ކުރި ކަމުގައި ވިޔަސް އޭނާއަށް ނަދާލްއާ އެއް އަދަދަކަށް ޕޮއިންޓް އެއް ނުކުރެވޭނެތީއެވެ. ނަދާލްއާ ފެޑެރާއާ ދެމެދު 1460 ޕޮއިންޓްގެ ފަރަގެއް އޮތްއިރު މި މުބާރާތް ނިމޭއިރު އެ ފަރަގު އިތުރު ވެގެން ދާނެއެވެ.

މިދިޔަ ސީޒަނުގައި އޭނާގެ އަތުގެ ކުޑަ ހުޅަށް ލިބުނު އަނިޔާއެއްގެ ސަބަބުން ފްރެންޗް އޯޕަންއާ ވިމްބެލްޑަން މުބާރާތް އޭނާއަށް ގެއްލުނުއިރު އޭނާ މިދިޔަ ސީޒަން ނިންމާލީ ދުނިޔޭގެ ރޭންކިންގެ ނުވަ ވަނައިގައި އޮވެގެންނެވެ. އެހެނަސް އޭނާ ވަނީ މި އަހަރުގެ ފްރެންޗް އޯޕަންއާ ޔޫއެސް އޯޕަން ކާމިޔާބުކޮށް ދުނިޔޭގެ ރޭންކިންގެ އެއްވަނައަށް އަލުން އަނބުރާ ޖެހިލާފައެވެ.

ނަދާލް ވަނީ މީގެ ކުރިން ތިން އަހަރެއްގައި ދުނިޔޭގެ ރޭންކިންގެ އެއްވަނައިގައި އޮވެގެން ނިންމާލާފައެވެ. އެގޮތުން 2008، 2010 އަދި 2013 ވަނަ އަހަރު އޭނާ ނިންމާލީ ދުނިޔޭގެ ރޭންކިންގެ އެއްވަނައިގައި އޮވެގެންނެވެ. މިއަހަރުގެ އެއްވަނަ އޭނާ ކަށަވަރު ކޮށްފައިވާއިރު އޭނާއަށް ވުރެ ގިނައިން އެއްވަނައިގައި އޮވެގެން އަހަރު ނިންމާލީ ދެ ކުޅުންތެރިންނަކީ ފެޑެރާއާ އެމެރިކާގެ ޕީޓް ސަމްޕްރާސްއެވެ. އަދި ނަދާލް ވެގެން ގޮސްފައިވަނީ 1973 ވަނަ އަހަރު ރޭންކިންސް ތައާރަފް ކުރެވުނު ފަހުން އެއްވަނައިގައި ރޭންކް ކުރެވިފައި އޮވެގެން އަހަރު ނިންމާލާ އެންމެ އުމުރުން ދުވަސްވީ ކުޅުންތެރިޔާއަށެވެ.

ކެރިއަރުގައި 16 ގްރޭންޑް ސްލޭމް ކާމިޔާބު ކޮށްފައިވާ ނަދާލް ޕެރިސް މާސްޓާސްގެ ދެވަނަ ބުރުގައި ވާދަކުރާނީ ދުނިޔޭގެ ރޭންކިންގެ 36 ވަނައިގައި އޮތް އުރުގުއޭގެ ޕަބްލޯ ކުއޭވާސްއެވެ.