ވެލެންސިއާގެ ކުޅުންތެރިޔަކު މިލަންދޫ ޓީމަށް ކުޅޭ މައްސަލަ ފެންމަތިވެއްޖެ

ކްލަބް ވެލެންސިއާ އަށް ކުޅެމުން އައި މުހައްމަދު ނިޒާމް (ޕީކޭ) ޓްރާންސްފާ ނަހަދައި ށ.މިލަންދޫ ޓީމަށް ކުޅޭ މައްސަލަ ފެންމަތިވެއްޖެއެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި މި މައްސަލަ ފެންމަތިވެފައި ވަނީ ޓީސީ ސްޕޯޓްސް ކްލަބް އަދި މިލަންދޫ ބައްދަލު ކުރި މެޗުގައި ނިޒާމް މިލަންދޫގެ ފުރަތަމަ އެގާރައިގައި ކުޅުނު ފަހުންނެވެ.

އެގޮތުން މި މައްސަލަ މިހާރު ޓީސީން އެފްއޭއެމްގައި ޖައްސާފައިވާކަން ވެސް ރާއްޖެއެމްވީ އަށް ވަނީ އެނގިފައެވެ.

ރާއްޖެއެމްވީ އަށް މައުލޫމާތު ދެއްވަމުން އެފްއޭއެމްގެ ޖެނެރަލް ސެކެރެޓަރީ ހުސެއިން ޖަވާޒް ވިދާޅުވީ، ޓްރާންސްފާ ނަހަދައި މިލަންދޫ އަށް ކުޅުންތެރިޔަކު ކުޅެމުން އަންނަ މައްސަލައެއް ޕްރިމިއާ ލީގުގައި ކުޅޭ ކްލަބަކުން އެފްއޭއެމް އަށް ހުށަހަޅާފައިވާ ކަމަށާއި، އެ މައްސަލަ މިހާރު ބަލަމުން އަންނަ ކަމަށެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ޓްރާންސްފާއާ ނުލާ ނިޒާމް މިލަންދޫ ޓީމަށް ކުޅޭ މައްސަލަ ބައެއް ކްލަބްތަކުގެ ސަމާލުކަމަށް ވަނީ ލީގު ފެށުނުއިރު އައިސްފައެވެ. އެހެން ނަމަވެސް އެކަމަށް އެފްއޭ އިން ފިޔަވަޅެއް އަޅާފައެއް ނުވެއެވެ.

މީގެއިތުރުން ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ނިޒާމް ވަނީ މި ސީޒަނުގައި އޭއެފްސީކަޕްގައި ވެލެންސިއާގެ ޓީމް ލިސްޓުގައި ހިމެނި އެ މުބާރާތްވެސް ކުޅެފައެވެ. އެގޮތުން ވެލެންސިއާއިން ރިލީޒް ނުދެނީސް އޭނާ އަށް އެހެން ޓީމަކަށް ކުޅުމުގެ ފުރުސަތެއް ނޯންނާނެއެވެ.

ގަވައިދު ބުނާގޮތުން ޓީމް ލިސްޓުގައި ނުހިމެނޭ ނުވަތަ ޓީމްގައި އެ މެޗުގައި ކުޅުމަށް ފާހަގަނުކުރާ ކުޅުންތެރިޔަކު ކުޅުވައިފިކަން ސާބިތުވެއްޖެނަމަ އެ ކުޅުންތެރިޔަކު ކުޅުނު މެޗުން އެޓީމަށް ލިބިފައިވާ ޕޮއިންޓާއި ގޯލް އުނިކުރެވޭނެއެވެ. އަދި ޑިސިޕްލިނަރީ ކޯޑުގެ ދަށުން، އެ ކްލަބާއި ކުޅުންތެރިޔާ މެދު ފިޔަވަޅު އެޅޭނެއެވެ. އަދި އިދިކޮޅު ޓީމަށް ތިން ޕޮއިންޓާއި، ދެ ގޯލް ލިބިދެވޭނެއެވެ.

އެގޮތުން ޓީސީން ހުށަހެޅި މައްސަލަ ސާބިތުވެއްޖެނަމަ، ނިޒާމް އަދި މިލަންދޫ އަށް އެފްއޭއެމް އިން ފިޔަވަޅު އެޅުން މަޖުބޫރުވެގެންދާނެއެވެ. އަދި ނިޒާމް މިލަންދޫ ޓީމުގައި ހިމެނިގެން ކުޅުނު މެޗުތަކުން އެޓީމު އަތުން ޕޮއިންޓްތައް ގެއްލިގެންދާނެއެވެ.