ގަލްފް ކޯޕަރޭޝަނުން ޤަތަރު ސަސްޕެންޑް ކުރުމަށް ބަހްރެއިން އިން ގޮވާލައިފި

ޤަލްފްގެ ޤައުމުތަކުގެ ކޯޕަރޭޝަން (ޖީސީސީ)ގެ މެމްބަރު ކަމުން ޤަތަރު ސަސްޕެންޑް ކުރުމަށް ބަހްރެއިން އިން ގޮވާލައިފި އެވެ.

ބަހްރެއިންގެ ޚާރިޖީ ވަޒީރު ޚާލިދު ބިން އަހުމަދު އާލް ޚަލީފާ، އާދީއްތަ ދުވަހު ކުރެއްވި ޓްވީޓެއްގައި ވަނީ، ޖީސީސީގެ ދެމިއޮތުމަށް އެޅެން އޮތް އެންމެ ރަނގަޅު ފިޔަވަޅަކީ، ޤަތަރު ހަމަ މަގަށް އެޅި، ގަލްފްގެ އެހެން ގައުމުތަކުގެ ހުށަހެޅުންތަކަށް ތަބާވަންދެން ޖީސީސީގެ މެމްބަރު ކަމުން ޤަތަރު ސަސްޕެންޑް ކުރުމަށް ކަމަށާއި، ޖީސީސީ އިން ޤަތަރު ވަކިވިނަމަވެސް މައްސަލައެއް ނެތް ކަމަށެވެ.

މީގެ އިތުރުން އޭނާ ކުރެއްވި އިތުރު ޓްވީޓެއްގައި ވަނީ، ޤަތަރުން އީރާނާއެކު ދުވަހަކަށްފަހު ދުވަހެއް ގުޅުން ގާތްވަމުންދާ ކަމަށާއި، ދެޤައުމު ގުޅިގެން ބޭރުގެ ފައުޖުތަކެއް ތައްޔާރު ކުރުމުގެ މަސައްކަތް ކުރަމުންދާ ކަމަށް ތުހުމަތު ކުރައްވާފައެވެ. އަދި އެކަމަކީ ގަލްފުގެ ގައުމުތަކުގެ ސަލާމަތަށް އޮތް ނުރައްކަލެއް ކަމަށާއި، ގަތަރު ބައިވެރިވާ ގަލްފްގެ ސަމިޓެއްގައި ބަހްރެއިން ބައިވެރިނުވާނެ ކަމަށް އޭނާ ވިދާޅުވި އެވެ.

މިދިޔަ މެއި މަހުގެ ފަސް ވަނަ ދުވަހު، ސައުދީ އަރަބިއްޔާ، ޔުނައިޓެޑް އަރަބް އެމިރޭޓްސް (ޔޫއޭއީ) އަދި ބަހްރެއިން އާއި މިސްރުން ވަނީ ޤަތަރާއި ގުޅުން ކަނޑާލާފައެވެ. ގަލްފްގެ އެހެން ގައުމުތަކުން ޤަތަރާއި ގުޅުން ކަނޑާލައި، ދަތިކުރުމުގެ ފިޔަވަޅު އެޅުމަށް ނިންމީ ޤަތަރު ޓެރަރިޒަމަށް ހިތްވަރުދީ، ހަނގުރާމަވެރިންނަށް ހިޔާވަހިކަން ދޭ ކަމަށް ބުނެއެވެ. ސައުދީ އިސްވެ އޮވެ އެޅި މިފިޔަވަޅަށް ތާއީދުކޮށް، ދިވެހިރާއްޖެ އިންވެސް ޤަތަރާއި ގުޅުން ކަނޑާލާފައިވެއެވެ. މީގެ އިތުރުން، ޤަތަރާއެކު ގުޅުން ކަނޑާލާފައިވާ އަރަބި އެހެން ޤައުމުތަކުގެ ތެރޭގައި ޔަމަނާއި ލީބިޔާ ހިމެނެއެވެ.

ޤަތަރުން ޓެރަރިޒަމަށް ހިތްވަރުދީ، ޓެރަރިސްޓް ޖަމާއަތްތަކާއި ހަނގުރާމަވެރިންނަށް ވާގިވެރިވާ ކަމަށް ބުނެ ކުރާ ތުހުމަތުތަކަށް ޤަތަރުން އިންކާރު ކުރެއެވެ.